Стан во Охрид купуваат само странци и иселеници

Интересот за купување на недвижности е намален како резултат на степенот на  преголемата презаситеност и изграденост на станови и оние кои се во градба, сметаат од агенциите за недвижности.

Како што вели Никола Иванчиќ оваа година се почесто купувачи од странство и оние кои времено или постојано престојуваат во странство, а се од Македонија  пројавувале интерес за недвижности во градот, додека охриѓани во многу мал процент.

Со оглед на тоа дека цените на недвижностите се движат периодично во зависност од побарувачката, има забележителен пад на цените.

Во зависност од локацијата становите во Охрид се движат од 600 - 1.200 евра по метар квадратен.

Струмица и Штип во станбена ренесанса

Соња Јованова

Кога во април годинава, по пауза од цели две години, општина Штип издаде градежна дозвола за изградба на 150 станови во населбата Сењак 3, веќе беше јасно дека коцката е фрлена и дека тоа ќе поттикне голем број градежни активности. Тоа се потврди кога градоначалникот на Штип веднаш потоа најави изградба на уште три станбени објекти покрај реката Отиња. Штипјани сега велат дека градот со право ќе заличи на универзитетски центар во Источна Македонија, потсетувајќи дека во Штип 15 години наназад немало интерес од приватните инвеститори да градат нови згради.

 Ако во Скопје градежните компании се израдуваа на мерката на Владата за државна помош со станбените кредити, мислејќи дека така ќе си ги продадат веќе изградените станови кои подолго време им стојат непродадени, во останатите градови градежниците препознаа шанса за станбена изградба која подолго време беше замрена. Па така, во Штип веќе почна изградба на комплекс со 150 станови, во Струмица на три локации се градат станбени комплекси, секој со по околу 300 станови. Во Кавадарци се најавува изградба на станбен блок со 85 станови на местото познато како Памучна станица

“Капитал“ беше во посета на неколку градови во Источна Македонија и забележа дека не е само Скопје во градежна станбена ренесанса. Штип, но и Струмица, каде што само на местото на поранешната касарна полека, но сигурно никнува цел еден мал град, можат слободно да му парираат на главниот град по бројот на почнати проекти во станбената изградба. Инвеститорите немаат прецизен одговор на што се должи градежниот “бум“, но објаснуваат дека делумно влијание имаат и најавените државни субвенции за полесно купување стан. Некои од нив признаваат и дека се зголемила потребата на пазарот, главно поради тоа што гастербајтерите од странство препознале сигурна инвестиција во недвижностите.

Штип полека го менува ликот!

Инвеститорот Роберт Димитров, познат и како сопственик на кабелскиот оператор Телекабел, почна да ја гради луксузната зграда во штипската населба Сењак 3, која треба целосно да биде готова за две години. Објектот ќе има 150 станови и 10 ВИП апартмани, 4.000 метри квадратни деловен простор и катна гаража на два ката.

“Штип веќе е голем град, а со оглед на тоа што во последните 15 години се нема изградено нова зграда, интересот за нашиот станбен комплекс е голем. Досега имаме продадено околу 40 станови, а се уште сме во фаза на изградба, односно на самиот почеток. Луксузните станови ќе бидат на највисоките катови, а ќе бидат со површина од 120 до 400 метри квадратни“, додава Димитров.

Инвестицијата на Димитров вреди 10 милиони евра. Цената на становите се движи од 650 до 850 евра за метар квадратен, во зависност од поставеноста на станот и начинот на плаќање. Толку се движи и просечната цена на нов стан во Штип, иако според локалните жители, сепак е нереална и превисока.

Драган Тренковски, 29-годишен штипјанец, го затекнавме на тезга како продава овошје и зеленчук во близина на заградениот простор каде што треба да никне новиот станбен комплекс на Димитров. Ни раскажа како сè уште живее со своите родители, но посакува да си купи свој стан, бидејќи наскоро планира свадба. Вели дека нема готовина, но е заинтересиран за поволните станбени кредити кои се најавуваат по Нова година. Тоа што е вработен во администрација му дава мала надеж дека ќе се квалификува за субвенционираните станбени кредити.

“Јас би зел таков кредит, ама мислам дека од банка нема да ми одобрат, затоа што сум на договор од три месеци, иако работам во јавно претпријатие. И платата ми е мала, само 9.000 денари. Лошо е што и државните субвенции пак се за тие што имаат и убави плати и убава работа, тие што и без субвенции можат да си купат стан.“

Слично размислува и Марјан Соколов, кој нема постојана работа, а живее од земјоделство.

“Јас имам некоја заштеда и од моите родители и од земјоделството, ама пак не се осудувам да земам кредит колку и да изгледа поволно. Тоа е долг период за враќање, а сите знаеме колку ни е стабилна државата и којзнае утре за што ќе ми притреба заштедата, така што не би влегол во таков зафат. Се знае кој може да си го дозволи тоа. Треба да си вработен под Буџетот, а родителите и двајцата да земаат пензија“, вели Соколов.

Струмица 2014?!

Ако Скопје за две години добие сосема изменет лик поради големиот број нови градби, дефинитвно истото ќе се се случи и во Струмица. Како најголем град во Источна Македонија, Струмица доживува инвестициска преродба. На влезот во градот од Радовиш ве дочекува слика на осум речиси завршени згради, кои се градат една до друга како во блок, и многу градежни работници. Тоа е населбата Парк, во близина на градскиот парк, каде што веќе по Нова година станбено-деловниот центар ќе го добие својот лик. На ова место порано постоело претпријатието Зеленило на струмички Комуналец, а сега се гради ексклузивен комплекс. Зградите ги градат две фирми, струмичката Сара инженеринг и скопската Адора инженеринг на Ванчо Чифлиганец. Комплексот ќе има вкупно 280 станови, од кои три станбени згради со 100 станови гради Чифлиганец.

Освен на овој локалитет, вистинска градежна експанзија се случува и на местото на поранешната струмичка касарна. Таму полека никнува нов миниград. На 40 хектари веќе е почната изградба на станбен блок за 1.600 жители, а од идната година ќе се градат и пензионерски дом, градинка, црква, училиште, студентски дом, образовни, културни и здравствени организации и установи.

Еден од управителите на струмичката градежна компанија Сара инженеринг, Бранко Стамболиски, вели дека и на овој локалитет учествуваат со станбена изградба.

“Овде треба за период од 7,8 години да се изградат 800 станови, но моментално веќе две згради се веќе почнати“, вели Стамболиски.

Вкупно 54 објекти треба да се изградат на целата територија на касарната. Просечната цена на становите ќе се движи од 590 евра до 690 евра по метар квадратен, цена што според инвеститорите е реална и не претставува проблем за Струмичани.

“И така дури 50% од луѓето што купуваат станови во Струмица се гастербајтери, најмногу од Швајцарија, а има и од Германија и повеќето од нив купуваат во готово“, коментираат инвеститорите.

Струмичани се скептични во однос на државната субвенција за станбени кредити.

“Голем ризик е, да не речам дека ми личи на измамнички трик. Никој не кажува што по тие пет години државна помош, колку ќе се зголеми каматата. Има многу неодговорени прашања во врска со оваа мерка“, вели Милица Витанова, жителка на Струмица.

ПРОЕКТОТ "КУПИ КУЌА, КУПИ СТАН" ЗА ГРАДЕЖНИЦИТЕ ЗНАЧИ ПОЛНИ РАЦЕ РАБОТА

Поевтини станови само на периферија

Како дополнителен позитивен ефект се смета тоа што со ограничената цена на становите што ќе се купуваат со владина поддршка на најмногу 900 евра за квадрат, конечно ќе заживее станбената изградба на периферијата на Скопје и во внатрешноста на државата, каде што со децении е замрена

Владиниот проект наречен "Купи куќа - купи стан", чија цел е граѓаните полесно и поевтино да дојдат до покрив над главата, ќе му даде импулс и на градежниот сектор во државата, категорични се градежниците. Вториот позитивен аспект на кој тие типуваат е тоа што преку ограничената цена на становите што ќе се купуваат со владина поддршка на најмногу 900 евра за квадрат, конечно ќе заживее станбената изградба на периферијата на Скопје и во внатрешноста на државата, каде што со децении владее мртвило.

И Групацијата за градежништво при Стопанската комора на Македонија и Градежната комора при Сојузот на стопански комори се единствени во поддршка на проектот за кој сметаат дека ќе им отвори многу работа на градежните фирми, што за нив е најважно. Во двете комори се воздржани за проценките дали овој проект ќе помогне за спуштање на цената на станбениот квадрат, која последниве години вртоглаво расте и оставаат тоа и другите бенефити за градежниците да се видат кога ќе почне да се спроведува.
-Здружението за градежништво при СКМ овој проект го поддржа уште во стартот, зашто ќе има градење, ќе заживее станбената изградба - вели Марија Петреска од ова Здружение.

Ист е ставот и на претседателот на Градежната комора при ССК, Сеат Кочан.
-Го поздравуваме секој напор на Владата да го развие пазарот и да помогне да се продаваат нашите производи. Како ќе влијае на цените на квадратот ќе видиме. Ќе чекаме да се донесат подзаконските акти, да се утврдат сите детали за проектот, па ќе почнеме да ги правиме бизнис-плановите - истакнува Кочан.

Тој смета дека Владата не е во право кога вели дека претходното решение за намалување на ДДВ за новоградбите од 18 на 5 отсто не дало ефекти, па додава дека данокот не треба да се врати на старо, зашто во комбинација со проектот Купи куќа купи стан" данокот од пет отсто ќе даде вистински ефект. Според него цената на становите и покрај намалениот ДДВ не паднала, туку пораснала затоа што во меѓувреме поради зголемената побарувачка се зголемила цената на градежното земјиште.

-Ако пред две години сопственикот на земјиштето од инвеститорот добиваше 18 до 25 отсто од нето-површината на објектот, сега тој процент порасна на 35. Тука отиде разликата од намалениот ДДВ - објаснува Кочан.

Затоа тој предлага да се интензивира продажбата на државното градежно земјиште наменето за станбена изградба и смета дека со пониските цени што ги дава државата ќе му се даде дополнителен позитивен ефект на проектот Купи куќа, купи стан".

Државниот завод за статистика потврдува дека трошоците за купување земјиште се во пораст. Трошоците за набавка, подготовка и комунално опремување на квадрат земјиште за градење во 2009 година изнесувале 9.711 денари, а лани - 14.426 денари, во услови кога трошоците за градење биле помали за 4.662 денари.

Кочан посебен акцент става на можноста преку овој владин проект од центарот на Скопје и поголемите градови во државата, кои веќе се гушат од објекти, станбената изградба да се пресели на периферијата на главниот град и во градовите од внатрешноста, каде што сега практично и ја нема. Статистиката го поткрепува и овој податок. Според најновата публикација за градежништвото издадена од Државниот завод за статистика од вкупно 5.152 станови изградени лани во државата, 2.062 се во Скопскиот регион. Најатрактивни локации за градење биле Кисела Вода и Карпош, каде што се изградени 363, односно 328 станови, а многу атрактивни за градежниците биле и Аеродром и Центар, каде што се изградени по повеќе од 250 станови. Во пелагонискиот регион речиси сите станови биле сконцентрирани во Битола, каде што од вкупно 362 се подигнале 233, додека во Прилеп, на пример се изградиле само 48 станови. Градежниците биле доста активни и во Гевгелија, каде што изградиле 107 станови, во Струга со 284 и во Охрид со 267 новоизградени станови. Интензивна градба имало и во Полошкиот регион, каде што се регистрирани 960 нови станови од кои 395 во Тетово, 250 во Гостивар и 171 во Боговиње. Во североисточниот дел од државата времето како да запрело. Изградени се само 154 станови, безмалку сите во Куманово.

Од овие причини стартот на проектот го очекува сопственикот на градежната компанија Кат Костов", Атанас Костов, кој гради евтини станови на не многу атрактивни локации во Скопје. Тој вели дека неговите станови во скопски Припор со цена под 900 евра за квадрат се вклопуваат во проектот Купи куќа, купи стан". И тој и Љупчо Бораниев од компанијата Бортас" сметаат дека нема шанси проектот да го опфати центарот на Скопје и поатрактивните делови на градот, каде што цената на квадратот не може да се спушти поради скапото земјиште. Тие велат дека во атрактивните делови на градот земјиштето е и до 30 пати поскапо отколку во периферните и во градовите од внатрешноста. На пример, во Хиподром, Маџари, Ченто приватни сопственици продаваат евтино земјиште и државата има плацови што ги продава со почетна цена од едно евро за квадрат. За разлика од таму во Карпош квадрат од една градежна парцела се продава и за над 100 евра. Затоа, становите во одделни градови во внатрешноста се продаваат и за половина од цената на тие во Скопје.

Владата плаќа половина рата или половина учество
Проектот "Купи куќа - купи стан", што треба да стартува на први јануари идната година има две варијанти: пола-пола рата за првите пет години и 50 отсто учество за купување стан, односно изградба на куќа. На првиот начин ќе се субвенционира половина од месечната рата за период од пет години. Каматата во првите три години не смее да биде поголема од 4,99 отсто годишно. Средствата за субвенционирање на ратата се неповратни.

Во втората варијанта државата ќе плати половина од учеството за кредитот, кое не смее да надмине 25 отсто од неговата висина, а каматата треба да е пониска од ЕУРОЛИБОР + 4,5 отсто. Парите за учеството што ќе ги добие од државата корисникот ќе треба да ги врати по 20 години на пет еднакви рати. И во двата случаја државната помош се дава за кредити до 50.000 евра, квадратниот метар од станот или куќата што се купува заедно со ДДВ не смее да надмине цена од 900 евра, а рокот на отплата не треба да е пократок од 20 години.

Пет илјади нови станови стигнуваат на пазарот

Соња Јованова

Скопје се гради!

Економската криза и слабата ликвидност на економијата не ги спречуваат градежните компании да „растураат“ со бизнисот во Скопје. Нивните проценки се дека околу 5.000 нови станови во моментов се градат во метрополата 

Во екот на градежната експанзија меѓу главните играчи, приватните фирми, од неодамна се јави и Јавното станбено претпријатие, кое преку изградба на комерцијални станови за продажба се наметна како сериозен конкурент на градежниците

---------------------------------------------------------------------------------------------------------------------------------------
350 милиони евра е пазарната вредност на становите што моментално се градат во Скопје
1.050евра е просечната цена на станбен квадрат во новоградба во Скопје
---------------------------------------------------------------------------------------------------------------------------------------

Градежен „бум“ се случува во Скопје и тоа не е само поради владиниот проект „Скопје 2014“. На многу локации во главниот град се градат станбени комплекси, стандардни и луксузни, а во последните неколку години очигледна е и експанзија на деловни и трговски центри. Засега, економската криза и слабата ликвидност на стопанството не ги натера градежните компании да забават со активностите. Не ги плаши ни колапсот во градежништвото во некои земји од регионот и во развиените земји, каде што бизнисот со недвижности стагнира или забрзно паѓа. Напротив, поради нивните инвестиции, главниот град во последните неколку години рапидно се шири и речиси нема слободна локација на која не се гради.

Во екот на градежната експанзија се појавија неколку главни играчи, приватни инвеститори, а од неодамна се наметна и Јавното станбено претпријатие, кое преку изградба на комерцијални станови за продажба се позиционираше како сериозен конкурент на градежниците. Но, се чини дека и покрај тоа што има интензивна изградба и на цели станбени комплекси, во Скопје побарувачката с$ уште е поголема од понудата. Така барем велат во градежните стопански комори, од каде што анализирале дека годишно во цела држава се градат од 5.000 до 5.500 станови, наспроти реалната побарувачка и до 10.000 станбени единици годишно. „Капитал“ го анализираше моменталниот сооднос на понудата и побарувачката на станбен простор, но и трендот на изградба на ексклузивни станбени комплекси, кои евидентно поставуваат нови стандарди во домувањето.

Адора инженеринг, Бетон, Соравија, Панорама резиденс, Бортас, Настел, Импексел 2, Никоб инженеринг се само дел од имињата на главните инвеститори на новите станбени објекти во Скопје. „Капитал“ разговараше со нив и според трендот на изградба, нивна слободна проценка е дека за две години Скопје ќе добие околу 5.000 нови живеалишта, што практички е еден мал македонски град. Ако се земе предвид дека просечната цена на еден метар квадратен за становите во Скопје е околу 1.050 евра во моментов, а нивната просечна големина е 65 м2, се работи за бизнис вреден околу 350 милиони евра.

Ванчо Чифлиганец, сопственик на градежната компанија Адора инженеринг, вели дека изградбата на нови станбени комплекси е работа на која треба сите да се радуваат, бидејќи повлекува развој во сите сфери. Адора инженеринг во моментов, освен во Скопје, гради и во Охрид и во Струмица. Во Скопје лани почна, а веќе привршува со изградба на 143 станови под Водно, два станбено-деловни објекти во Аеродром, а доколку се соберат заедно со становите што Адора ги гради во Струмица и во Охрид, излегува дека само за една година оваа компанија изградила 561 стан.

„Цените по кои се продаваат нашите станови се од 700 евра во Струмица до 1.400 евра за најскапите во Скопје. Ние нудиме квалитет, но не претеруваме со луксуз, а долгорочно, становите на Адора се поевтини и до 40%, затоа што се изградени со енергетски ефикасни материјали“, објаснува Чифлиганец.

Во меѓувреме, во Аеродром се чисти теренот и за изградба на уште три нови згради кај поранешните воени бараки, наспроти Воената амбуланта. Ќе ги гради градежната компанија Бетон на површина од околу 18.000 метри квадратни. Според проценките на инвеститорот, продажбата на становите ќе оди лесно, водејќи се од тезата дека се голема градежна компанија со искуство зад себе. „Имаме три договорени локации со сопствениците на бараките и ќе почнеме станбена изградба. Земјиштето го имаше Акционерското друштво за стопанисување со станбен и деловен простор, па државата им го одзеде корисничкото право и сега сопствениците, според новиот закон, можат да си го купат земјиштето за едно евро за метар квадратен, по што ќе почнеме да градиме. Проектите се готови, чекаме само да го откупиме земјиштето. Секогаш кога ние сме граделе станбена зграда сме немале проблеми со продажбата на становите, затоа што с$ уште владее мислењето дека големите фирми градат најквалитетни станови“, смета Трајко Трпевски, генерален директор на Бетон.

Градежниците поделени во однос на цените на становите

Ако се земе предвид податокот дека во Скопје се градат двојно помалку станови од побарувачката, тогаш е логично зошто цените на станбен метар достигнуваат цени како во некои европски метрополи.

Во Македонија цените нагло пораснаа во 2007 година, најмногу поради оптимизмот кој завладеа дека земјава ќе стане членка на НАТО, за последнава година да паднат и сега се со тенденција на дополнително благо опаѓање поради зголемената понуда. Градежниците пак, тврдат дека и покрај зголемената понуда на станови, нема простор за намалување на цената, најмногу поради поскапувањето на градежните материјали, но и поради тоа што Владата не ја продолжи мерката за намален ДДВ при продажба на станови.„Не се согласувам со констатациите дека цените на становите се високи, затоа што во земјава се плаќаат истите цени за градежни материјали како и во Европа. Во иднина очекуваме понудата да порасне не само од нови, туку и од стари станови кои ќе се продаваат од сегашните сопствениции притиснати од кризата. Ќе се градат и социјални станови со поддршка на хуманитарни организации и со поддршка на европски фондови, така што реално, само најквалитетните и најдобрите ќе можат да прават бизнис во градежништвто“, објаснува Чифлиганец.

Трпевски од Бетон пак, смета дека во моментов на пазарот на недвижности продажбата на станови не оди толку лесно, што може да доведе до благ пад на цените за станбен метар. „Сакале или не сопствениците, становите ќе поевтинат. Само за пример, во Ново Лисиче приватни фирми ги купија локациите и се направија можеби 8-10 згради. Колку што знам, продажбата тешко оди, а цената ја држат на 1.000 евра за метар квадратен. Мислам дека ќе мора да ја спуштат цената ако сакаат да ги продадат. Ми се чини дека цената на становите нема да се качува. Дури сметам дека треба да се спушти. Според мене, за да можат да се продадат сите новоизградени станови, цените, генерално, ќе се спуштат за минимум 10% до 15%“, додава Трпевски.

Државата со градежна офанзива ќе ги руши цените на становите!

И Акционерското друштво за изградба и стопанисување со станбен и деловен простор (ЈПССДП) влезе во комерцијалениот дел од градежниот бизнис. Освен социјални станови и станови за млади брачни парови, од септември годинава почна со интензивна изградба на станови за комерцијална продажба. Директорот Цветко Грозданов за „Капитал“ вели дека во иднина очекува пад на цените, како резултат на намалениот ДДВ, но и поради најавените проекти „Купи куќа, купи стан“ или „Пола пола рата“.

„Становите кои претпријатието ги продава во моментов се за 15%-20% поевтини од тие што моментално ги нудат приватните градежни компании. Сега сме фокусирани на изградба на комерцијални станови на атрактивни локации во Скопје. Прво почнуваме со една зграда кај Католичка црква, приближно околу 56 станови, понатаму ќе следува изградба на уште една зграда кај Педагошки факултет, а се размислува и за градење во Ѓорче Петров, што севкупно е околу 300 станови“, вели Грозданов.Тој додава дека цените на овие станови ќе бидат повисоки од вообичаените по кои досега продаваше ЈПССДП, поради тоа што ќе се градат на атрактивни локации каде што комуналиите се поскапи. Грозданов објаснува дека е неопходно приоритет на претпријатието да биде изградба на комерцијални станови со цел добивката да се реинвестира во градење социјални станови, но и бидејќи како државна компанија имаат обврска да го раздвижат пазарот и преку зголемена понуда да ја намалат цената на станбен квадрат.

Во Реонскиот центар во скопската населба Ново Лисиче веќе почна изградба на комплекс од седум станбени згради со 350 станови и подземна гаража, што е вкупна инвестиција на ЈПССДП од 13 милиони евра. Цената на овие станови нема да биде повисока од 850 евра за квадратен метар, велат од ЈПССДП.

Агенциите за недвижности моменталната сотојба на пазарот за недвижности ја оценуваат како летаргична. Оттаму велат дека граѓаните кои сериозно биле заинтересирани да купат нов стан сега најавуваат дека ќе ги чекаат ветените државни субвенциии и поевтините станови. „Очекуваме пазарот на недвижности да стагнира, затоа што мерките притискаат цените на становите да се намалат. Секако дека тоа психолошки ќе делува на луѓето и тие ќе почекаат за купување стан“, вели Сашо Поп Илиевски од агенцијата Хепинес.

Домашните производители апелираат

Да се користат квалитетни градежни материјали!

Компаниите што ги снабдуваат градежниците со материјали сметаат дека сите инвеститори кои сакаат да имаат квалитетна градба мора да внимаваат на материјалите што ги користат. Во компанијата за производство на адитиви во градежништвото Адинг сметаат дека во Македонија се почеста е нелојалната конкуренција.

„Правило е градежните компании да користат материјали кои се тестирани и кои имаат атестна документација. Ние како фирма такви продаваме и во земјите од Европската унија. Но, во Македонија има мали фирми-инвеститори кои за пониски цени набавуваат неквалитетни градежни материјали и со тоа сакаат да заработат, но не ја поевтинуваат цената на становите. Тоа значи дека држат цена како злато, а продаваат ѓубре. И на крај се случува отпосле да дојдат и да купат поквалитетни материјали за санација на истата градба. Во принцип, за сево ова си постои закон, меѓутоа треба и почести контроли за да се види како се гради“, смета Александар Делев, директор на технички сектор и институт во Адинг.

---------------------------------------------------------------------------------------------------------------------------------------

Васко Давидовски, менаџер за маркетинг и продажба во Соравија

„Луѓето се свртија кон недвижностите како единствен сигурен пласман на слободен капитал. Се намали и ДДВ од 18% на 5%, со што пазарот доби дополнителна стимулација и на страната на понудата и на страната на побарувачката. Во исто време зголемената миграција кон Скопје исто така предизвикува пораст на побарувачката. Ова се дел од причините што оваа гранка доживува експанзија токму во овој период.“

Неим Хусеини, сопственик на Импексел 2

„Свесни сме дека изградбата на големи станбени комплекси носи големи ризици, но имаме поддршка од банките. Лошо е што во моментов поради проектот на Владата за субвенционирани станбени кредити се јави застој во продажбата и се притиска и за намалување на цената на становите. Одговорно тврдам дека нема простор за пад на цената, затоа што цените на градежните материјали се отидени нагоре.“

Ванчо Чифлиганец, сопственик на Адора инженеринг

„Пазарен закон е поголема побарувачка да резултира со пораст на цени и обратно, но не смее да се заборави дека цената е збир од трошоци на градба, што значи дека колку и да е ниска побарувачката на станови, цената на метар квадратен не може да падне под цената на градба на станбен простор. Повеќе сум убеден дека во случај да нема побарувачка, едноставно ќе се намали изградбата на станови, a капиталот ќе се пресели од градежништвото во некој подоходовен сектор.“

http://www.kapital.com.mk/mk/prilozi_edicii.aspx/77640/pet_iljadi_novi_stanovi_stignuvaat_na_pazarot.aspx?iId=2510

Скопје – втор најдобар град за инвестирање во недвижнини во Европа

Главниот град на Македонија, Скопје е на второ место на листата на европски градови во кои е најдобро да се инвестира во недвижнини.

Според рангирањето направено од Глобалниот водич за недвижнини, на прво место е Будимпешта, а зад Скопје на третото место е Амстердам. Меѓу топ 20 градови за инвестирање во недвижнини се и Истанбул, Загреб, Талин, Берлин, Рим, Рига, Кишинев, Варшава, Букурешт, Братислава, Љубљана, Виена, Брисел, Софија, Прага, Хелсинки и Париз.

Ќе има ли доволно кираџии за новите недвижности?