Голем Ринг

Роза Петкова

Наместо со катни гаражи, Општина Центар ќе го решава паркирањето во „Големиот ринг“ со подземни паркиралишта. Поради реакциите од станарите, кои пред три години се противеа да се градат овие објекти блиску до нивните згради, Општината ги смени двете катни гаражи, едната на малиот паркинг зад зградата на МАТ, а другата зад хотелот „Бристол“ во подземни гаражи. Тие се вцртани во најновите измени на ДУП „Голем ринг - Запад“, за реонот од „Рамстор“ до Владата, за кој се расправаше на последната седница на Советот на Општина Центар. Советниците дебатираа дали паркирањето во центарот треба да биде под или над земја и кое ќе биде поисплатливо и поевтино за изградба. За разлика од градоначалникот Владимир Тодоровиќ кој ја бранеше позицијата дека паркиралиштата треба да се градат под земја, претседателот на Советот, Владимир Здравев, инсистираше на локацијата зад МАТ да се врати катната гаража, затоа што наводно тоа го сакале и жителите. Советникот Љубомир Тасев, пак, предупреди дека подземните паркиралишта не се добра инвестиција затоа што чинат поскапо од тие на површина, поради присуството на подземни води на подрачјето на Скопје, а тврдеше и дека инвеститорите ќе бидат позаинтересирани за катни гаражи бидејќи со нив можат и да пренаменат дел од просторот во деловен. - Проблем со подземни води веќе има трговскиот центар „Беверли Хилс“ каде постојано работат пумпи, а друг пример е Ново Лисиче каде 500 подземни гаражи се неупотребливи бидејќи пливаат во вода и станарите не ги користат - рече Тасев.
Градоначалникот Тодоровиќ објасни дека ја избришале катната гаража на спорната локација затоа што просторот е мал и не може да се добијат доволно места за паркирање. Станарите, пак, и натаму се противат на какви било промени околу станбените блокови на Градски ѕид.
- Не сакаме ниту катни гаражи ниту подземни паркиралишта. Ќе ни го уништат и тоа малку зеленило што го имаме. Добро ни е вака, а паркирањето се реши со рампите што ги постави јавното претпријатие за паркиралишта на општината, па сега за секој станар има слободно место - вели Светлана Михајловска, претседателка на еден од куќните совети. Планот за западниот дел на „Голем ринг“ го опфаќа просторот ограничен со улиците Мито Хаџивасилев-Јасмин, Македонија, Даме Груев, ВМРО, Кеј 13 Ноември и Св. Климент Охридски. Според потписникот на планот, Силвана Вановска од проектантската куќа „Ин-пума“, измени во него се висината на новата зграда на театар Центар, која од 35 метри е променета на 40 метри за да се вметнат кулисите кои се предвидени со проектот за театарот. Станбените објекти од Градски ѕид се нацртани во одделни парцели во кои не влегуваат и зелените површини околу зградите, што значи дека отсега зеленилото ќе се третира како јавен простор и за нив ќе биде надлежна Општината. Планерката објасни и дека зад зградата на „Трготекстил“ се предвидува подземно паркиралиште со рампа, хотелот „Бристол“ се прогласува за заштитен споменик на културното наследство, а зградата до него во која порано беше сместена „ИК банка“ сега во планот е означена како дивоградба.