Плоштад - Тетово

Со површна реконструкција ќе се подновува градскиот плоштад во Тетово. Наместо досегашните мермерни плочи ќе се поставува гранит, а дел од елементите поради поголема функционалност на просторот ќе се отстранат.

- На градскиот плоштад Илирија немаше ниту една здрава плоча, сите беа искршени или оштетени поради „забот“ на времето. Сега ќе ставиме гранитни плочи што имаат поздрав тампон, за разлика од мермерните кои се поставени пред три децении - изјави Неџати Зулбеари од секторот за урбанизам при општината Тетово.

На плоштадот ќе се отстранат неколкуте големи жардиниери, на чие место ќе се постави зеленило. Идејата е да се овозможи полесно поминување низ плоштадот, а со тоа ќе може да се постават клупи за одмор. Исто така ќе се отстрани меморијалниот ѕид на народните херои, мермерните клупи и фонтаната. Наместо обични светилки ќе се стават сензорски светла.

- Од вкупната површна од 5.400 квадратни метри, најголем дел, 4.700 квадратни метри, ќе биде рамна гранитна површина. Останатиот дел ќе зафаќаат бехатон-плочки, кои ќе се постават на горната страна од плоштадот кон станбено-деловните објекти како и зелениот појас - вели Зулбеари.

Проектот за реконструкција е одобрен од секторот за урбанизам, а општината ќе издвои 290 илјади евра за да се реализира реконструкцијата. Фирмата „На-ер“ го изработи идејното решение, а изведувач е „Еуропроект“.

Досегашниот изглед плоштадот го има од 1970 година кога завршила петгодишната градба. Општината на јавен тендер откупи идејно решение за комплетно преуредување на централното градско јадро со кружен тек, подземен паркинг и шеталиште, но поради немање доволно средства реализацијата е одложена за подобри времиња.