Противпожарна заштита

СКОПСКАТА БРИГАДА БАРА ОДГОВОРНОСТА да Ја ПОДЕЛат ГРАДОТ И ДРЖАВАТА

Владата да даде пари за пожарникарите

Покрената е иницијатива за измена на Законот за пожарникарството со која би се подобрило финансирањето на единицата

Пожарникарите бараат Владата да го „згасне пожарот“ во скопската бригада

Противпожарната бригада (ППБ) на Скопје бара Владата да направи измени на Законот за пожарникарството. Пожарникарите се жалат дека по децентрализацијата се нашле само под градска капа, наместо одговорноста за осовременување да биде поделена помеѓу градската и централната власт. Најопремената противпожарна единица во земјава беше и најексплоатирана изминативе две години, кога беснееја пожари на територијата на Скопје, но и во целата земја.

- Ако сакаат да дејствуваме успешно при гаснењето пожари и ако сметаат на наша помош секаде низ земјава, нужни се измени во Законот за пожарникарството со кои би се подобрило финансирањето на нашата единица. Таа е во фаза на разгледување од страна на Владата - се вели во извештајот на ППБ, кој денеска ќе биде на дневен ред на Советот на град Скопје.

За најавените нови вработувања во бригадата велат дека тие ќе се реализираат од наредниот месец. Од Градот се одобрени нови вработувања, но потребна е и соработка со Министерството за образование за усвојување на програмата за образување нови кадри. Во извештајот се посочува дека по децении запуштеност, реновирани се одредени сместувачки капацитети на единицата. Оперативниот центар 193, кој досега работел во супстандардни услови, сега е посовремен. Градоначалникот Трифун Костовски донирал пари за набавка на 11 камери во објектот во Автокоманда заради подобрување на безбедноста во овој објект.

Градот распиша јавен оглас за набавка на противпожарна облека по европски стандарди. Амбасадата на САД донирала ситна опрема и потрошен материјал, а збратимениот град Љубљана дал парична помош за набавка на опрема потребна за технички интервенции, последно достигнување на техниката од оваа област.

За шест месеци 474 интервенции

Од 1 јануари до јуни годинава се забележани 474 интервенции на територијата на Скопје, а штетата се проценува на 62,8 милиони денари. Од 474 интервенции, 214 се на градежни објекти, со материјална штета од 19,6 милиони денари, 57 на сообраќајни средства, а 203 интервенции се на отворен простор, со материјална штета од 2,9 милиони денари.

http://dnevnik.com.mk/?ItemID=550D6B3DDBBC464AA5EADDCA76818276