Kлучка Бит-Пазар

„Детелинка“ ќе го намали метежот на Бит-пазар

Градоначалникот на Скопје, Коце Трајановски, и градоначалникот на Чаир, Изет Меџити, вчера пресекоа црвена лента и по девет месеци градежни активности официјално ја пуштија во употреба клучката „Детелинка“ на надвозникот кај Бит-пазар. Станува збор за модерно сообраќајно решение чии краци гледани одозгора наликуваат на детелинка со четири листа, по кои се врти согласно правилото од десна страна.

Ова е прво решение од овој тип во Скопје, кое беше почнато во мандатот на бившиот градоначалник Трифун Костовски. Специфично за клучката е што повеќе ги нема семафорите кај надвозникот на Бит-пазар кон Чаир, со што е избегнат застојот на возилата.

- Клучката претставува сообраќајно решение кое овозможува поголема фреквенција на возилата и движење по принципот вртење в десно. Проточноста е зголемена непрекинато во двете насоки, со брзина од 40 километри на час - рече градоначалникот Трајановски.
Според неговите објаснувања, овој зафат е важен и од еколошки аспект бидејќи е елиминирано работењето на моторите на возилата во место кога стојат на црвено светло, односно намалена е концентрацијата на издувни гасови и потрошувачката на гориво.

Градоначалникот Меџити, на вчерашното официјално пуштање во употреба на новата клучна изрази благодарност од името на жителите на Чаир. Тој рече дека станува збор за многу убав проект со кој ќе се намали метежот на улицата Цветан Димов како и на Бит-пазар.

- Се надевам дека со проширување на „Цветан Димов“ во иднина кај трговскиот центар „Чаирчанка“ метежот целосно ќе биде решен - вели Меџити.Вкупната вредност на градежните работи е 39 милиони денари, односно околу 650 илјади евра. Парите се обезбедени од буџетот на Град Скопје. Вкупната должина на сите четири краци е 2,2 километра, а вкупната асфалтирана површина зафаќа 4.100 квадратни метри.

Со изградба на клучката целосно е реконструиран и постојниот натпатник и е обновена постојната атмосферска канализација. Поставено е ново улично осветление, тротоарите се поплочени со павер-елементи и се наместени соодветни сообраќајни знаци.

Со пуштањето во употреба на оваа клучка возачите веќе нема да стојат на црвено доколку сакаат на пример од булеварот Александар Македонски да се качат на Бит-пазар. Досега тие мораа пред надвозникот да чекаат на семафори за да свртат лево кон пазарот. Отсега тие ќе продолжуваат кон т.н. пластичарска улица, па ќе свртат десно и без чекање на семафори, по еден од новите краци ќе се качат директно на надвозникот во насока кон пазарот.

Освен клучката и проширувањето на улицата Цветан Димов, во овој дел од градот е предвидена и изградба на надземен премин меѓу пазарот и поликлиниката, изградбата на подземен паркинг на две нивоа, мини- плоштад, како и на трговски центар на местото на Бит-пазар.