Kлучка Бит-Пазар

Преместувањето на подземните инсталации се очекува да биде најголемиот проблем при реконструкцијата на клучката кај Бит-пазар, која треба да добие форма на детелинка, сметаат градските власти. Електричните и телефонските кабли, водоводните и канализациските цевки, како и другата инфраструктура досега ја кочеа работата на повеќе градски и општински проекти, а истата ситуација најверојатно ќе се повтори и на овој проект, чија реализација треба да почне за околу една недела, а според процените би требало да трае околу четири месеци.

- Овие проблеми се појавуваат бидејќи не постои ефективен катастар пред се на електричните водови, а во помала мерка и на телефонските кабли. Динамиката на извршувањето на градежните работи, како за почнувањето, така и за изградбата на клучката „Детелинка“ во голема мера ќе зависи од решавањето на проблемот со подземните инсталации - велат од градската управа.

БЕЗ СЕМАФОРИ ВО СИТЕ ПРАВЦИ

Градежната фирма „Гранит“, која треба да го изведе проектот, веќе ги почнала предизведбените работи на клучката. Се вршат геометарските премери и се сондира градилиштето.

- Сите административни процедури се завршени. Добивме и градежна дозвола од општината Чаир. Оваа недела ќе се утврдат фазните привремени решенија за тоа како ќе се одвива сообраќајот додека траат градежните работи. Со тоа ќе се исполнат сите услови „Гранит“ да го организира градилиштето и да почне изградбата. Таа треба да трае 120 дена и да чини околу 40 милиони денари. Градот ги обезбеди потребните пари - додаваат градските власти.

Со реконструкцијата на клучката таа треба да добие форма на сообраќајна детелинка и да овозможи движењето на возилата по неа да се одвива без употреба на семафорите. Така, на пример, тие што се движат во правец од Автокоманда кон пластичарската улица, за десно ќе треба да завртат пред надвозникот, а за лево да поминат под него и потоа двапати да завртат десно. На ист начин ќе се организира и поврзувањето на Бит-пазар со пластичарската улица. Наместо како досега возилата да чекаат на семафорот за да завртат лево на крајот од надвозникот, тие ќе треба да го искористат спротивниот крак и двапати да завртат десно.

Ова сообраќајно решение за една од најоптоварените раскрсници во градот се најавуваше уште пред четири години од поранешната градска управа.

ИНСТАЛАЦИИТЕ БИЛЕ ПРОБЛЕМ ВО ПОВЕЌЕ ПРОЕКТИ

Голем број градежни работи што градот или општините ги изведувале во последниов период биле одолжувани поради проблеми со дислокација на подземните инсталации. Тоа речиси секогаш значело дека треба да се преземат дополнителни зафати за кои се издвојувале дополнителни суми пари што не биле предвидени за изградбата на тие проекти.

Сите јавни претпријатија и компании што имаат подземни инсталации, како „Водовод“, „ЕВН“, „Т-хоум“, „Топлификација“ и слично имаат свои регистри за тоа каде им се наоѓаат цевките или каблите, но се уште не е направена заедничка база на податоци што би можеле да ја користат сите што треба да ископуваат некоја површина. Засега пред да се изврши некоја работа треба да се собираат посебни податоци од секоја фирма, со што се усложнуваат административните процедури пред почетокот на градбите.

Досегашни проблеми со инсталациите

КОНТИНЕНТАЛ. Најнов е примерот со втората фаза од клучката кај хотелот „Континентал“, односно изградбата на кружниот тек на крајот од улицата Беласица. Досега се преместуваше топлификациската мрежа, се интервенираше на водоводот и на канализацијата, а неодамна биле откриени кабли што не биле регистрирани, па сега се чекаат екипи на ЕВН за да го преместат. Во меѓувреме градежниците работат на споредни работи.

СЛОВЕНИЈА. Сличен проблем имаше и на булеварот Словенија, кој се градеше околу пет години. Освен електричната мрежа и телекомуникациските инсталации, градежниците таму требало да се справат и со гасоводните цевки на „Гама“.

ИЛИНДЕН. Неодамна почнаа подготвителните работи за проширувањето на булеварот Илинден. И таму биле забележани инсталации за кои не била доставена соодветна проектна документација до градските служби. Поради тоа од градот најавија дека нема да преземат одговорност ако за време на градежните работи се оштети некоја од нив.

НАРОДНИ ХЕРОИ. Требаше да се преместат електричните кабли и цевките за атмосферската канализација за да се изведе проширувањето на раскрсницата меѓу улиците Сава Ковачевиќ и Народни херои, каде што беа изградени дополнителни сообраќајни ленти во должина од по 65 метри.

ВЛАЈКО. И при изградбата на надземниот премин „Влајко“ во населбата Влае се појавија слични проблеми. При копањето на темелите биле откриени подземни инсталации, електрична мрежа и канализација. Поради тоа проектантите мораа да бараат друго место за да се ископаат таканаречените „бунари“, во кои се постави основата на конструкцијата.