Градинки

Штрковите донесоа градинка во Аеродром

Општината со најголем наталитет во Реонски центар ќе гради градинка на 7.500 квадратни метри, што ќе може да прими 200 деца

Жителите на Ново Лисиче за нецели две години во својата населба ќе добијат детска градинка, со што се очекува да се ублажи проблемот за сместување на децата во Општината Аеродром, која има најголем наталитет во Скопје. Градинката ќе има можност да згрижи околу 200 деца од предучилишна возраст, ќе се протега на 7.500 квадратни метри, од кои 1.400 ќе бидат за објектот од приземје и кат. Објектот се наоѓа веднаш до фудбалското игралиште, кое неодамна почна да се гради.

Темелите вчера со пригодна свеченост ги поставија премиерот Никола Груевски, градоначалникот на Аеродром Ивица Конески и министерот за труд и социјална политика Џељаљ Бајрами, а ги осветија свештеници од Македонската православна црква - Охридска архиепископија. Проектот е на фирмата „Инпума“, а изградбата ќе ја врши „НЃ-инженеринг“. Изградбата на градинката ќе се финансира од државниот буџет, а ќе чини милион евра.

- Ми причинува посебно задоволство што присуствувам на почетокот на изградба на детска градинка со буџетски пари од Владата, нешто што многу недостасуваше во Општина Аеродром и не се случило последните 20 години во Македонија. Локацијата Реонски центар Аеродром, воопшто не е случајна. Општина Аеродром е една од најмладите општини, која има една од повисоките стапки на наталитет во Македонија. Големиот број на млади брачни двојки, како и зголемениот број на деца во Аеродром, е факт што со задоволство го примаме, но и реалност, која нужно побарува нови градинки и зголемување на капацитетите на веќе постојните - изјави премиерот Груевски.

Градоначалникот Коневски рече дека изградбата на детската градинка е резултат на напорното и посветено работење на општината и на големата поддршка на Министерството за труд и социјална работа и на Владата.

Во Аеродром се чека ред за упис во детска градинка. Се фаќаат врски, се прават листи на чекање, а градинките се пребукирани. Општината со над 80.000 жители и со претежно млади брачни двојки има само две градинки - „Бубамара“, со клоновите „Пчелка 1“ и „Пчелка 2“ и „Срничка“, со клоновите „Калинка“, „Црвенкапа“, „Изворче“, „Бамби“, „Чекорче“.

http://dnevnik.com.mk/?ItemID=2EF585AF31AFBB46BC05DE9686306194