Гинекологија ќе се доградува

Ќе се откаже ли Владата од изградбата на болницата кај „Панорама“ во Скопје?

Турските инвеститори се соочија со голем проблем - сопственици на земјиштето од 9.000 квадрати се приватни лица

Билјана Јовановска

Современата болница што требаше да биде изградена пред две години на местото на некогашниот хотел „Панорама“ на Водно, во која турска компанија ќе инвестира 35 милиони евра, се' уште е во фаза на проект. Се чека позитивна одлука на Владата, бидејќи турските инвеститори сметаат дека власта, која се декларира како отворена за странски инвестиции, нема валидна причина за да се откаже од еден олку значаен проект.

Турската „Универзал груп“ уште во 2004 година го купи хотелскиот комплекс сосе 9.000 квадратни метри земјиште, но кога почнаа градежните работи, на виделина излезе дека некој експресно или, наводно, од поодамна го купил земјиштето што се водело како државно и го користел хотелот „Панорама“, односно дека инвеститорот платил нешто што не е во сопственост на нашата држава, туку на приватни лица.

Станува збор за земјиштето околу „Панорама“, кое е неопходно за изградба на болницата за која се тврди дека ќе биде најсовремена на балканскиот простор. За нејзината изградба е информирана и Светската здравствена организација, бидејќи таа треба да биде во синџирот од 82 болници кои се наоѓаат на три континенти.

Во меѓувреме, турските инвеститори нарачаа и добија три проекти за болницата, ја започнаа и изградбата, за што се потрошени неколку милиони евра, но од поодамна сите работи се запрени. Спорно е земјиштето кое уредно го купиле.

За хотелот „Панорама“, како што вели Јуксел Чалишкан, сопственик на градежната фирма што треба да работи на изградбата на болницата, се јавуваат многумина заинтересирани да го откупат, но за такво нешто не станува ни збор. Презедовме обврска пред Светската здравствена организација дека ќе изградиме најсовремен болнички комплекс, со кој ќе ги кренеме здравствените стандарди во Република Македонија, објаснува Чалишкан, и со некакво откажување сериозно би го нарушиле и имиџот на вашата држава.

Во болницата, која ќе се изгради најмногу една година по надминувањето на спорните прашања што го кочат проектот, освен што ќе има најсовремени медицински апарати, пациентите ќе добиваат третман на европско ниво. Замислено е, како и во другите болници во синџирот, итните случаи веднаш да бидат примени од лекарот или, како што велат, „една минута по влегувањето во болницата“. Ќе бидат вработени најмалку 400 лица, главно од Македонија, но ќе има и докажани специјалисти од светот. Во вашата земја има многу врвни лекари, но ним им се потребни современи услови за работа и третман на болните, појаснува Сание Чалишкан, задолжена за медицинскиот кадар и опремувањето на болницата. Во срцето на Европа видовме дека во здравството се работи со застарена технологија и сакаме да помогнеме да се надмине овој проблем, потенцира Чалишкан.

Инвеститорите од Турција сметаат дека проблемите што им ги посочувала претходната власт, а делумно и оваа, се вештачки и дека, всушност, некој бега од конкуренцијата. За такво нешто нема причина, категоричен е Јуксел Чалишкан, сопственик на градежната фирма „Јуксан“, и ова го поткрепува со примерот од истанбулската Капали-чаршија. Таму, раскажува, постои улица со 120 златарски дуќани и, без оглед на конкуренцијата, сите одлично работат и заработуваат цели 400 години.

Проблемот со изградбата на болницата, чија инвестиција е тешка цели 35 милиони евра, неодамна министерот за здравство на Турција им го предочил на македонските власти. Тогаш била покажана подготвеност да започне реализација на овој проект, но конечниот, официјален одговор, зависи од Владата што треба да одлучи дали сака или се откажува од оваа странска инвестиција.

Работите се' уште се статус кво, но во случај на нови пролонгирања, турските инвеститори правдата најнапред ќе ја побараат пред македонските, а потоа и пред меѓународните судови, бидејќи платиле нешто што сега не е во нивна сопственост.