Општина Василево прави максимални напори за изнаоѓање средства за реконструкција на дотраениот Здравствен дом во Василево.

Градоначалникот Ване Стојанов деновиве со писмо се обрати до стопанските субјекти од општината за донирање на средства за реконструкција на Здравствениот дом.

Објаснувајќи им ја неопходноста и итноста од санација и реконструкција на овој објект, и потребата за жителите од Василево и од неколкуте населени места кои гравитираат кон општинскиот центар, вработените во општинската администрација лично ги посетуваат сопствениците на стопанските субјекти.

Во таа насока, во Домот на културата во Василево се организираат и кино проекции. За симболични 50 денари граѓаните можат да ја покажат својата хуманост на дело и притоа да погледаат добар филм.

Досега, обезбедени се средства од 3000 американски долари од Мировниот Корпус за промена на столаријата, со посредство на нивниот волонтер во општина Василево, Џејмс Карлин и околу 450.000 денари, неопходни за комплетирање на оваа активност од буџетот на општина Василево.

Општина Василево, со Одлука на Владата во средината на 2009 година го има добиено на времено користење објектот Здравствен дом, и од тогаш прави перманентни напори за негова реконструкција, со што би се создале квалитетни услови како за работа на вработените, така и за здравствените услуги кон пациентите.

Како прв неопходен чекор, општината изготви техничка документација, односно основен проект за реконструкција на објектот, од каде точно се гледа кои активности треба да бидат превземени и колкав буџет би бил неопходен за реализација на истите. Согласно проектната документација неопходно е промена на целокупната столарија, обновување на подовите и таваните, поставување плоча над приземјето, обновување на фасадата, внатрешно малтерисување, поставување изолација, олуци, громобранска инсталација, интервенции во електриката и санитариите, со еден збор се работи за целосна реконструкција чија проектна вредност е околу 5 милиони денари.

Во објектот во моментот има лекар од примарното здравство и стоматолошка ординација, кои пружаат здравствена заштита на повеќе од 2000 граѓани. Меѓутоа условите во кои тие работат се далеку од нормалните.

Локалната самоуправа ќе биде активна во напорите за обезбедување средства се до постигнувањето на целта: создавање оптимални услови за работа во објектот, односно негово целосно реконструирање – дециден е градоначалникот на општина Василево, Ване Стојанов.