Маџир маало ќе се урбанизира

Во населбата Маџир Маало нема да има заштитени објекти, овде се предвидува изградба на објекти за колективно домување, верски и комерцијален објект.

По барање на жителите, Управата за заштита на културното наследство одлучи оваа населба да не биде третирана како амбиентална зона, а објектите да не бидат конзервирани.

Според Нацрт Деталниот Урбанистички План (ДУП) кој денеска го изгласаа советниците на општина Центар, овде се предвидува изградба на објекти за колективно домување со максимална дозволена висина од 20 метри или приземје плус пет ката. По барање на општината со укрупнување на повеќе катастарски парцели во средиштето на Маџир маало е предвидена изградба на верски објект, додека по должината на булеварот Кузман Јосифовски Питу во планот е вцртан комерцијален објект со повеќе намени.

Градоначалникот на центар Владимир Тодоровиќ вели дека верскиот објект е вцртан во планот по барање на жителите на населбата и на сопствениците на земјиштето каде е предвидена неговата изградба

„Еден дел од сопствениците бараат поставување на верски објект, но ќе чекаме да се искажат граѓаните на јавната анкета“ – рече Тодоровиќ.

Примарната сообраќајна мрежа од ГУП от се задржува и намените остануваат исти.

Силвана Вановска од проектантската куќа Инпума која го изготви Нацрт планот вели дека согласно ДУП от предвидени се 450 жители на еден хектар и 30 проценти зеленило во рамките на градежната парцела, доколку паркирањето биде решено под земја.

-----------------

Извор: http://kajgana.com/makedonija/madzir-maalo-ke-se-urbanizira

Edited by Граѓанин - 15-Jul-2011 at 05:44

Супер, од уште еден градски сегмент, од готово вересија...

Да се собереме десет, без појма од архиектура и градежништво, момци, ќе направевме подобар план и ќе го развиевме Скопје на ранг на силен локален центар. Зашто бре при очи не сакаат да гледаат што уствари прават. Кој ќе је плати цената за 20 години. Ало, знам дека читате, па толку ли сте безидејни, без осет за простор, за потреби, за иден развој на градот. За среќа постојат средства кои може да се применат и новиов замислен лик на Маџир Маало да го снема. Се извинувам на дозата гнев во овој пост, ама не можам да се соземам и да прифатам да уништат уште еден градски сегмент. Не може Центар да биде спална соба, не може цело Скопје да биде спална соба. Не може само станбени згради да редите низ Скопје!

Originally posted by <Fresno> А да го видиме планот?

Па фала Богу...
Околностите се тие - јули, 250 степени под сенка, одмори, Инпума, Тинекс...не ветуваат многу, ама да видиме што ќе биде...не брзајте толку со заклучоци...

СТАРОТО ГРАДСКО ЈАДРО ВЕЌЕ НЕ Е ЗАШТИТЕНА ЦЕЛИНа

Крај за куќите во Маџир Маало

Нацрт-планот предвидува згради со приземје и пет ката, голем комерцијален објект висок 20 метри, црква сред маалото и градски автопат

Ќе го прифатат ли жителите на Маџир Маало новиот Нацрт-детален урбанистички план кој предвидува таму да се изградат 20-метарски згради или ќе се изјаснат негативно на претстојната јавна анкета, во обид да си ги задржат куќите? Маџир Маало го изгуби статусот на заштитена амбиентална зона затоа што Управата за заштита на културното наследство утврди дека веќе нема објекти што треба да бидат заштитени. Жителите на ова старо градско јадро со децении живеат во супстандардни услови зашто, поради неколку причини, немаше урбанистички план и никому не му беше дозволено да гради и да доградува. Но притиснати од потребите за поквалитетно домување, многумина на диво ги доградија и реновираа старите куќи, па сега не им одговара да ги напуштат, особено кога имаат можност и да ги легализираат доградбите за 1 евро за квадрат.

Згради, црква и градски автопат

Советот на Општина Центар на последната седница го усвои Нацрт-планот за Маџир Маало, според кој таму наместо куќите, предвиден е простор за станбени згради, голем трговски центар и црква, а задржана е и трасата на булеварот Крушевска република, кој ќе минува сред маалото. Токму трасата на овој булевар, кој е дел од неизградената примарна сообраќајна мрежа од градски автопати и е од исклучително значење за идниот развој на Скопје, беше еден од камените на кој се сопнуваше планот за маалото. Поради заштитата како амбиентална целина, со цел маалото да остане, имаше обид во Генералниот урбанистички план да се измени трасата на булеварот и тој да се помести до Транспортниот центар, но тоа не успеа.

- Досега за ова подрачје немаше донесено ДУП, иако имаше повеќе обиди. За објектите во него постоеја заштитно-конзерваторски основи, поради тоа што тие не смееја ниту да се реновираат ниту да се доградуваат или надградуваат. Но, во новиот Нацрт-план тие веќе не постојат - рече при излагањето пред Советот архитектот Силвана Вановска од проектантската куќа „Инпума“.

Планот предвидува колективно домување со здружување на повеќе помали катастарски парцели, односно згради со приземје и пет ката, со максимално дозволена висина од 19 и 20 метри. По должина на булеварот Кузман Јосифовски Питу, од Транспортниот центар до комплексот банки, предвиден е комерцијален објект со повеќе намени, исто со висина од 20 метри.

Во средиштето на маалото е вцртана маркичка за црква, а паркирањето е подземно, во рамките на секоја градежна парцела. Освен магистралата улица Крушевска република, како собирни улици се предвидени булеварите К.Ј. Питу и Никола Карев, сервисна е улицата Ѓуро Ѓоновиќ, а станбени се улиците 59, Прилепска, Титовелешка, Маџир Маало, Анте Хаџи Митков, Охридска и Петричка.

Ќе успее ли планот?

Советникот Јован Тагасовски од СДСМ во расправата изрази сомневање дека планот може да се реализира.

- Дали оваа сообраќајна мрежа е соодветна на густината на населеноста според овој план? Покрај кејот на Вардар има пристапна улица за објекти со висина од 19 и 20 метри. Таа не ќе може да одговори на густината на овие облакодери. Преголема е концентрацијата на згради, а нивната висина треба да се намали - забележа Тагасовски.

Советничката Благородна Мојсовска-Крстевска потенцираше дека маџирмаалци досега живееле како во 15 век, но сепак успеале да се изборат овој дел повеќе да не биде амбиентална зона.

- Луѓето живееја во супстандардни услови и поради недонесувањето на планот, па не смееја ништо да градат. Сега ќе бидат обесправени оние што го почитуваа законот, па не реновираа чекајќи го планот, на сметка на оние што изградија дивоградби и сега ќе си ги легализираат. Може да се случи некои од сопствениците на парцелите каде што е предвидена зграда да не се согласат со тоа и објектите да си останат во сегашната состојба. На тој начин нема да се постигне економски развој - вели Мојсовска.

Таа додаде дека планот имал 42 забелешки од страна на стручната ревизија и предложи јавната анкета да трае подолго од вообичаеното и притоа да се земат предвид сите забелешки на граѓаните.

Советниците од опозицијата се интересираа и на чие барање ќе се гради црквата и дали земјиштето е државно или приватно? Градоначалникот Владимир Тодоровиќ одговори дека црквата се прави на барање на граѓаните.

- Иницијативата потекна токму од оние што се сопственици на земјиштето каде што треба да се гради црквата. Ќе бидам искрен, со тоа се сложија само некои од сопствениците. Во анкетата ќе видиме дали и другите ќе се согласат - рече Тодоровиќ.

Во планот се предвидени 450 жители на еден хектар и 30 проценти зеленило во рамките на една градежна парцела, што ќе биде доволно ако паркирањето биде под земја. Опфатот на планот изнесува 18,63 хектари.

http://www.dnevnik.com.mk/?ItemID=CE58EE75B740AB46AE8B36AC7A570B64

Се сложувам со тебе алекс, во овој дел највеќе ке се прилагодат висококатници над 30+ спрата, модерни згради ,+ модернизација на железничката станица, пробивање на урабаниот автопат со улицата крушевска република ,башка тука е и новиот веро, исто така фали и реконструкција и на НБРМ , пред некој ден влегов внатре, сеуште е тој стариот стил на канцеларии од 60-тите години.

А зошто да не се изградат деловни објекти во овој дел заедно со комерцијални објекти, зошто баш згради? Јас не знам каде овие луѓе ќе живеат, ќе паркираат, кон кои улици ќе се движат, ќе гледаат кон балконите на други луѓе и имам впечаток дека ќе постане Дебар Маало, мислам дека дебели пари се вртат околу ова. Ќе сместиме уште неколку илјади луѓе во строгиот центар на градот?

Мислам дека ова е шанса барем ние, форумашиве од билд, на некој начин да покажеме дека сме против ова и некако да ја анимираме јавноста, преку некакви статии и слично. ОВА НЕ СМЕЕ ДА ПОМИНЕ!

Планерите морале да стават станбени згради, затоа што така е предвидено во Генералнит урбанистички план.

Се сложувам дека треба да го видиме планот пред подетално да дискутираме, но самото споменување на станбени комплекси во овој дел дава и те како простор за разговор.

Мислам дека железничката станица треба да биде природна граница на центарот од станбениот дел (Аеродром).