Економски вести

Холандската ДХБ ја купува ИК банка

Банката Демир Халк, основана во Холандија, потпиша договор за купување 62 отсто од ИК банка

ИК банка доби нов странски газда. Банката вчера соопшти дека веќе е потпишан договор за продажба на нејзиниот мнозински пакет акции на банката Демир Халк. Станува збор за банка основана во Холандија. Според сознанијата на „Утрински“, оваа банка купила пакет од околу 62 процента од акциите на ИК банка, со што практично ја добива управувачката позиција во таа наша банка. Засега не е позната цената што ќе ја плати ДХБ за ИК банка. Европската банка за обнова и развој и натаму ќе биде значаен акционер, со пакет од 25 отсто од акциите. ЕБОР досега поседуваше поголем процент, но таа продаде дел од своите акции, учествувајќи во конзорциумот заедно со други домашни правни и физички лица, кои поседуваа акции во ИК банка.

„Договор за купопродажба на контролниот пакет акции беше потпишан помеѓу конзорциумот од акционери на Извозна и кредитна банка и банката Демир Халк, основана во Ротердам, Холандија“, се вели во соопштението што беше испратено вчера од ИК банка.

Од ИК банка информираат дека банката Демир Халк е основана во 1992 година. Свои филијали и експозитури има во Холандија, Германија, Белгија и претставништво во Турција. Нејзината актива се проценувала на околу 2 милијарди евра. ДХБ е активна во кредитирање правни и физички лица, како и пласмани на пазарите во развојот.

Според веб-страницата на ДХБ, банката се основала во 1992 година според холандските закони како комерцијална банка со турски капитал. Од септември 2005 година нејзиниот капитал ја има следнава структура: 70 отсто поседува ХЦБГ холдинг Б.В., додека 30 отсто од акциите се во сопственост на Турки Халк банкаси. Притоа, ХЦБГ холдинг Б.В. е сто отсто во сопственост на Халит Џингилиоглу, а негова главна дејност е финансиски холдинг. Сега се очекува дозволи за оваа зделка да дадат нашата централна банка и властите во Холандија. „По добивање дозвола од регулаторните власти во Македонија и од Холандија, ДХБ ќе стане мнозински акционер“, информираат од ИК банка. Оттаму уште и додаваат дека досега најголемиот акционер ЕБОР - Европска банка за обнова и развој од Лондон и натаму останува значаен инвеститор во банката со 25 отсто.

ИК банка нагласува дека во изминатата 2007 година постигна особено добри резултати, кои се континуитет на низа исклучително успешни деловни години. Вкупниот капитал (активата) на банката порасна за 33 отсто и изнесуваше 113 милиони евра, кредитното портфолио забележа пораст од 40 проценти, а депозитната база 47 отсто. Моментно мрежата на филијали и експозитури на ИК банка брои вкупно 19, а мрежата на банкомати 42 локации.

„Новиот акционер и стратегиски партнер на ИК банка се очекува да го задржи и зголеми трендот на раст и развој преку своето интернационално искуство и своите ресурси, со што ќе се овозможат додатни можности и поволности за македонските претпријатија и граѓани“, се вели во соопштението од ИК банка. (Н.Н.Ф.)

http://www.utrinski.com.mk/?ItemID=4795FB23FD32074F8D5FCBD01520E3C4