Поевтино до солунскиот аеродром отколку до скопскиот

Скопје е можеби единствениот град во Европа во кој не постои никаков јавен превоз до аеродромот. Советниците на ЛДП во градот пред една година поднесоа иницијатива за воведување на посебна автобуска линија, но надлежните никако да го доразгледаат предлогот
Скопјани и странските туристи со години се соочуваат со истиот проблем - како да се стигне од и до аеродромот „Александар Велики“. Додека во другите европски градови е нормално до аеродромите да има градски превоз, а некаде и метро, воз, трамвај, кај нас сé уште работата е на ниво на иницијатива за организирање ваков вид превоз. Советничката група на ЛДП од градот пред една година поведе ваква иницијатива, која сé уште не стигнала на дневен ред на седниците на советот. - Пред една година ја поднесовме оваа иницијатива, а автобус до аеродромот „Александра Велики“ сé уште не е воведен. Скопје е можеби единствениот град во Европа во кој не постои каков било јавен превоз до аеродромот. Воведувањето автобуска линија до аеродромот ќе им заштеди дополнително пари на сите што патуваат со авион. На седницата од 8 април 2010 година, градоначалникот Коце Трајановски и претставниците на ЈСП „Скопје“ посочија дека треба да се разгледаат повеќе варијанти за организирање на автобускиот превоз до аеродромот, како и да се добијат дозволи од Министерството за транспорт и врски. Требаше да се испита и дали концесионерот на аеродромот,,Александар Велики“, компанијата ТАВ, е заинтересирана за воведување ваков превоз. Помина цела година, а никој од надлежните не одговори, па излегува дека никој не е заинтересиран за оваа автобуска линија. Превозот до аеродромот би можел да е и градски и приградски, или комбинација од двата - вели Зоран Шапуриќ, координатор на советничката група на ЛДП. Од турската компанија ТАВ, која стопанисува со аеродромот „Александар Велики“, велат дека постои интерес за воведување ваква автобуска линија, ама чекаат таа да стане финансиски исплатлива. - ТАВ не се откажал од таквата иницијатива. Долго време се правеше бизнис-анализата. Кога ќе увидиме дека ваквиот проект ќе биде финансиски оправдан, тогаш може да се активира таква линија - информираат од ТАВ. Сличен став имаат и надлежните од јавното сообраќајно претпријатие „Скопје“. - Линија до аеродром засега не може да се воведе, зашто таа ќе носи голема финансиска загуба. Советниците од ЛДП, кои се иницијатори за воведување на линијата, треба да кажат и кој ќе ги финансира загубите. ЈСП не е во таква можност - вели Мишо Николов, директорот на ЈСП „Скопје“. ЛДП не се согласува дека се работи за неисплатлива инвестиција, затоа што постојано има патници што се возат од аеродромот и до него. - Превозот до аеродромот не би му носел загуби на ЈСП, туку напротив, линијата би била рентабилна, особено ако се има предвид постојаното зголемувањето на патниците што летаат со авион. Исто така, треба да се има предвид и фактот дека ЈСП добива големи субвенции од градот. Доколку, пак, ТАВ не сака да ги прими автобусите, што би било своевиден европски преседан, автобуската линија би можела да завршува пред паркингот на аеродромот, што е на само педесетина метри од пристанишната зграда - додава Шапуриќ. Скопјани, пак, молат бога да се организира редовен превоз до аеродромот, како што беше случајот пред дваесетина години, кога до таму возеа автобусите на ЈАТ. За нив превозот до таму со такси е вистински грабеж. - Редовно патувам со авион во странство, таква ми е работата. Најголем проблем ми е како да стигнам до аеродромот и да се вратам од таму. Затоа што од дома до аеродромот со такси ми требаат најмалку 900 денари. Но за враќање е ужас. На аеродромот нема ниеден таксист од скопските компании што возат по таксиметар. Таму те чекаат диви превозници, кои до град бараат од 1.200 до 3.000 денари. Не дај боже, пак, да си странец. Жив ќе те одерат. Ама кога немаш избор, ќе си платиш, како да се возиш во странство, а не дваесетина километри од центарот на градот. Поевтино е да стигнеш до Белград, на пример, зашто повратниот автобуски билет е 1.900 денари. И шопингот до Солун е поевтин. Целодневна прошетка до таму чини 800 денари - вели Неда Божиновска од Ѓорче Петров. Градските власти нé известија дека воведувањето ваква линија не е нивна надлежност, туку за тоа треба да се погрижи или јавното претпријатие за аеродромски услуги или Министерството за транспорт и врски. Затоа, пак, одговорните од приватното претпријатие „Слобода превоз“ велат дека не би имале никаков проблем да сообраќаат по таа линија доколку им се даде таква шанса. - Постои желба и имаме превозни капацитети, ама треба да се види во Министерство за транспорт и врски дали се заинтересирани за таа линија. Доколку има, би се пријавиле за тој вид превоз. Само претходно треба да се направи проекција на трошоците, на трасата по која би возеле автобусите, дали ќе има доволен број патници. Проблем е и тоа кога полетуваат и слетуваат авионите. Треба сé да се усогласи - изјави Ленин Јовановски, директор на „Слобода превоз“. Од Министерството за транспорт и врски не успеавме да добиеме никаков одговор.

     Ќе може ли некој да ми каже дали ЈСП има намера да пушти автобус или комбе на следниве релации (во заграда е наведен бројот на жителите според пописот 2002):

    И да ги прашам - што корист? Ќе речат дека за линиите надлежен е град Скопје. А благодарение на немањето превоз, многу места значително ги намалија своите жители. Споредете ги пописните резултати од 2002 и од 1994 година.

Со Градски до аеродром за 150 денари!?

Доколку УО на ЈСП ја одобри новата линија таа би сообраќала од хотелот Александар палас-МАТ-Рекорд-Транспортен центар-хотел Континентал-аеродром и обратно

За 100 до 150 денари граѓаните ќе може да се возат со јавен превоз до скопскиот аеродром Александар Велики, а автобусите ќе поаѓаат од хотелот Александар Палас. Ова е предлогот на Јавното сообраќајно претпријатие (ЈСП) доставен до Град Скопје, а даден на барање на советничката група на ЛДП. Доколку Управниот одбор на ЈСП ја одобри новата линија, градските советниците само формално ја потврдуваат. Сепак, повеќепати досега се поднесуваа иницијативи за воведување на редовна автобуска линија, но епилог немаше. Последиците, пак, најмногу ги чувствуваа патниците кои при секое доаѓање на Скопскиот аеродром се соочуваат со вистинско патешествие кога треба да најдат превоз од и до метрополата. Легалните таксисти нудат превоз, но наплаќаат и до 800 денари во еден правец, а дивите и тројно поскапо, цена што многу граѓани не можат да си ја дозволат.
- За да се оствари најавениот возен ред ќе треба да се ангажираат пет возила со десет возачи, а годишниот трошок заедно со патарините за новата линија би изнесувал 270 илјади евра или трошоците по тура би чинеле 4.294 денари. Сметаме дека на оваа линија ќе работиме со загуби и поради тоа ќе бараме и субвенции од Градот - вели директорот на ЈСП, Мишо Николов.
Трасата што ЈСП ја предлага за движење на автобусите би се движела од хотел Александар Палас-МАТ-Плоштад Рекорд-хотел Холидеј Ин-Транспортен центар-хотел Континентал-аеродром Александар Велики и обратно. Автобусите би сообраќале од единаесет до шест пати во текот на денот, што зависи од фреквенцијата на патници на аеродромот кои најмногу ги има во петок и недела, а најмалку во четврток. Пресметките ЈСП ги правела според редот на летање на авионите за месец април наредната година.

Советникот на ЛДП, Зоран Шапуриќ очекува да се реализира предлогот за воведувањето на линија до аеродром, но тој смета дека овие тури ќе бидат исплатливи и ЈСП нема да има потреба од субвенции.
- Доколку ЈСП во една тура има и само дваесет патници во еден правец и исто толку во другиот правец ќе има приход од 6.000 денари, а претпријатието пресметало дека трошоците за една тура ќе му изнесува 4.200 денари. За разлика од ЈСП, пак автобусите што ги носат вработените на "ТАВ Македонија" направиле пресметки на 3.000 денари од тура - истакна Шапуриќ.

Досега имаше неколку иницијативи за воведување на директна линија од метрополата до аеродромот. Некои од нив потекнуваа од советниците во Град Скопје, а обиди имаше и од аеродромските власти. Според нивното објаснување, и покрај напорите да се најде компанија која ќе врши превоз на патниците од и до аеродромот тие биле неуспешни, бидејќи приватните превозниците не се заинтересирани за опслужување на оваа линија најверојатно зашто ја сметале за нерентабилна.

Новите сопственици на аеродромот ТАВ Македонија, велат дека тие немаат обврска да воведат автобуска линија. Сепак, посочуваат дека преговараат со заинтересирани компании и доколку има конечен договор тогаш ќе воведат линија.

Од Козле до Карпош само пеш

Од Козле до Карпош само пеш   Сообраќајната наука укажува дека автобусите треба да се на главните коридори и да се чести, велат од ЈСП       НЕМА АВТОБУСКИ ЛИНИИ МЕЃУ СОСЕДНИ НАСЕЛБИ Бутел со Кисела Вода, Козле со Аеродром, Козле со Карпош и со Кисела Вода, Аеродром со Кисела Вода... Има десетици градски населби што не се поврзани меѓу себе со директна автобуска линија. Иако некои од нив се оддалечени и само неколку километри, за да стигнете од едно на друго место мора да се возите со два автобуса. Оваа неповрзаност на општините е голем проблем за скопјани. На интернет-порталот на ЈСП меѓу најчесто поставуваните прашања од граѓаните се токму оние за конекцијата помеѓу населбите. „Дали ќе има нова автобуска линија од Драчево до Аеродром, ќе се воведе ли повторно линијата со бројот ‘6’ од Пржино до Карпош, кога ќе пуштите линија до Пинтија, што е со релацијата од Ченто до Дом на печат“, се само дел од многуте прашања на граѓаните. Одговорот на ЈСП на повеќето од нив е дека воведувањето нови линии е во надлежност на градот. - Ако сакам да одам од Козле до Карпош, јас треба да сменам два автобуса и да изгубам повеќе време отколку кога би одел пеш. Ај да станува збор за населби што се во рурални средини, но овие се речиси во центарот на градот, на само неколку километри. А да не го спомнувам тоа што ќе треба да платам четири билети, два за одење и исто толку за враќање - вели Јовица Симонов. Директорот на јавното сообраќајно претпријатие „Скопје“, Мишо Николов, вели дека сообраќајната наука дава одговор на прашањето за автобуските линии. Во согласност со правилата на секој поголем град, неопходно е да има неколку дијаметрални и многу радијални линии. Со тоа би се задоволиле потребите на граѓаните за јавен превоз, додека поврзувањето на општините од различни делови на градовите не се практикува. - Автобусите не се доволно чести, но ние правиме напори да ја подобриме таа ситуација. Засега ја следиме состојбата и наскоро ќе ги засилиме линиите на „41“, „2“, „57“ и „5“. Инаку, има многу населби што не се поврзани со една линија, но замислете ако треба да се поврзуваат сите населби со посебни линии? Сообраќајната наука укажува дека автобусите треба да се на главните коридори и да се чести. На пример, патник од Козле се качува со линијата „57“ до Центар и потоа со „15“ патува до Карпош. Сметам дека ако двете линии се чести и редовни, патувањето најдобро ќе се реализира - објаснува директорот Николов. Граѓаните често реагираат и за немањето директна автобуска линија до аеродромот „Александар Велики“. Од ЈСП велат дека сé уште се водат разговори со турскиот концесионер ТАВ и дека наскоро ќе имаат конкретно решение за овој проблем. За Љубин и за Скопско Поле само еднаш дневно Во однос на приградските населби автобуските линии се уште поретки, за некои денови има по неколку автобуси, а викенди нема ниту еден. Пример за ова е Скопско Поле и автобусот со број „10“, кој преку неделата само еднаш тргнува од Транспортниот центар, и исто толку од Скопско Поле, а за време на викендите нема ниту еден автобус. Слична е состојбата и со автобусот „32“, кој сообраќаа до селото Љубин. Во текот на неделата има само еден правец, од селото кон Скопје, а повратен нема, додека за време на викендите нема никаков градски превоз. До селото Марино, од Транспортен центар тргнуваат само два автобуси, а кон Скопје има дури четири. Доколку жителите сакаат преку викенд да дојдат во градот, тоа мора да го направат со сопствено возило или, пак, со такси, затоа што автобуси нема.       Автор: Александра Денковска   Фотографија: Маја Јаневска Илиева