На општински сајтови застанало времето

На страницата на Општина Шуто Оризари се' уште стои дека градоначалник е Ердуан Исени, а на веб-страницата на Сарај можат да се прочитаат само неколку куси информации на македонски јазик, од која последната е објавена лани на 4 октомври

Повеќе скопски општини заборавиле што значи ажурирање на веб-страниците со нови податоци, па од содржините што ги нудат преку интернет изгледа како за нив да застанало времето и како ништо да не работат. Така, на веб-страницата на Општина Шуто Оризари се' уште стои дека градоначалник е Ердуан Исени, иако веќе цела година таму градоначалник е Елвис Бајрам. Не е агилна ниту Општина Сарај, на чија страница можЕ да се видат само неколку куси информации на македонски јазик, од која последната е од лани од 4 октомври, а последната вест на албански јазик е од 31 март.

Наместо да ја зголемуваат својата транспарентност преку веб-страниците и да овозможат подобра интеракција со граѓаните, општините, случајно или намерно, го забораваат овој начин на комуникација со јавноста. Ретки се општините што преку своите веб-страници нудат можност за електронско поднесување барање за некои документи, барања, проверка на податоци и слично, информации за распишаните јавни набавки, а ниту една не ги нуди на интернет детаљните урбанистички планови и покрај тоа што многу од нив тоа одамна го ветија.

Шуто Оризари и Сарај не гледаат некој голем проблем во тоа што граѓаните не се доволно информирани за нивните активности. Во Општина Шуто Оризари отсечно одговорија дека фотографијата на поранешниот градоначалник Ердуан Исени е повлечена од сајтот, но под празното место се' уште стои напишано неговото име.

- Работиме на нова страница - велат во Шуто Оризари.

Според градоначалникот на Сарај, Блерим Беџети, не е проблем тоа што слабо се обновуваат информациите.

- Не постои никаков проблем, веројатно надлежните ангажирани во Општината за ажурирање на веб-страницата процениле дека треба да оди тоа што е ставено. Еве, наскоро ќе биде поставена и иницијативата за основање средно училиште на нашата територија - вели градоначалникот Беџети.

И Општина Бутел е во ист кош со претходните општини. Од пред Нова година веб-страницата воопшто не им функционира, откако претходно им беше хакирана, бидејќи, според вработените, имала меѓународна адреса. Тогаш текстот за Општината, кој беше напишан на англиски јазик, беше преведен на смешен начин, а тоа беше последното што можеше да се исчита „онлајн“ за Бутел.

Во Општината ветуваат дека од денеска ќе профункционира новата страница.

- Дизајнирањето е веќе завршено. Од фирмата „Форнет компјутер“, која работи на нашата нова веб-страница, имаме информации дека таа најверојатно ќе биде ставена од денеска - вели портпаролката Снежана Клинчарова.

И членот на Советот на општината Центар, Благородна Крстевска-Мојсовска од СДСМ, на завчерашната седница стави забелешка на новата општинска веб-страница.

- Старата страница беше далеку подобра и на неа имаше сто пати повеќе информации отколку на сегашната. Сега не можат да се видат јавните набавки, ги нема донесените урбанистички планови, поставени се само последните неколку службени гласници на Општината, нема известувања за објавувани конкурси ниту за пленарните седници на Советот на општината, иако тоа најмногу ги интересира граѓаните. На претходната страница ги имаше сите урбанистички планови, како и службени гласници и известувања за седниците - рече Мојсовска.

Таа му приговори на градоначалникот Владимир Тодоровиќ зошто, наместо да се ажурираат нови податоци, на веб-страницата се прават анкети за степенот на задоволство на граѓаните од спроведените проекти, за што се трошат 4.000 евра.

Градоначалникот Тодоровиќ одговори дека кога на веб-страницата сакале да постават повеќе податоци, им било речено дека таа нема доволно капацитет да ги прифати сите и дека ќе мора да се прави нов веб-портал.

- Беше спроведена постапка за јавна набавка и работата за новиот веб-портал ја доби формата „Вертиго нет“. Тој ќе ја чини Општината 246.000 денари - објасни Тодоровиќ.

Според портпаролот на Центар, Јовица Ацковски, новиот општински портал се' уште се полни со податоци.

- Поставени се службените гласници од годинава, а од останатите години ќе бидат поставени најдоцна до вторник, кога ќе бидат поставени и распоредот на седници и некои постари активности. Континуирано се внесуваат и јавните огласи, а ќе почне и внесувањето на урбанистичките планови - рече Ацковски.

Останатите општини, односно Карпош, Гази Баба, Аеродром, како и Градот Скопје, редовно ги ажурираат веб-страниците и овозможуваат соодветна интеракција меѓу општината и граѓанинот.

Анела Петрова