Инфраструктура (општо)

Македонија и Бугарија ќе бараат пари за железничко поврзување од ЕУ

Нашата држава треба да изгради пруга од 85 километри до границата со Бугарија

Министрите за транспорт и врски на Македонија и на Бугарија, Миле Јанакиески Петар Мутафчиев, се уверени дека железничкото поврзување на Скопје со Софија ќе биде остварено за време на нивниот мандат. Македонија треба да изгради пруга од 85 километри до границата со Бугарија, а од бугарска страна се недовршени само уште шест километри. Ова го потврдија двајцата министри во Охрид по потпишувањето на документот за соработка за изградба на пругата, која е дел од Коридорот 8 и се протега од Варна во Бугарија до Драч во Албанија.

Токму ваквото железничко поврзување на Европа со Кавказ, подрачје богато со нафта, и регионалното поврзување меѓу трите земји се добра основа, сметаат министрите, да се побараат средства од Европската комисија за финансирање на македонско-бугарското поврзување со железница. До крајот на оваа година ќе биде завршена потребната техничка конструкција, а наредната година и финансиската и потоа ќе се бараат финансиски средства од европските фондови.

Според министерот Јанакиески, на Македонија и' се потребни над 200 милиони евра за изградба на пругата од Скопје до бугарската граница.

Инаку, железничката пруга од Скопје кон бугарската граница започна да се гради пред 15 години, а веќе десет години се запрени сите работи на оваа траса. Според Јанакиески, државата одвојува прилично големи средства за да се конзервира и да се зачува од уништување она што е направено досега.

Двајцата министри најавија и подобро авионско поврзување на Скопје со Софија со четири лета неделно, како и формирање заедничко тело за подобрување на поштенскиот сообраќајот. (МИА)