Инфраструктура (општо)

Министерот за транспорт и врски Миле Јанакиески најави сериозни ангажмани за реализација на проектот Коридор 8 во делот на железничкиот сообраќај. Како што изјави Јанакиески, од буџетот за 2009 година ќе се одвојат 10 милиони евра за изработка на физибилити студија за конечна реализацијата на проектот доизградба на Коридор 8 во железничкиот дел. Меѓутоа, за зажувувањето на оваа долгогодишна идеја потребни се многу повеќе средства.
„За продолжување на активностите за изградба на железничкиот дел од  Коридор 8 е предвидена почетна инвестиција во висина од 10 милиони евра, но во текот на 2009 година ќе биде утврдена конкретната финансиска конструкција“, информираат од Министерството за транспорт и врски.
Коридорот 8 мора да ни стане визија за идниот развој бидејќи Македонија станува раскрсница и стратешки транспортен јазол на Балканот. Како континентална земја, ние мора многу повеќе да ги користиме предностите на транспортот со железница бидејќи без развиена мрежа на пруги, нема економски развој.
Пругата кон Бугарија се гради повеќе години. Работите се запрени и она што досега е изградено стои само како за декор.
Неофицијално, за реализирање на железничкиот дел од проектот Коридор 8, потребни се најмалку 345 милиони евра за делот кон Бугарија и уште околу 300 милиони евра за делот од Кичево до Албанија. Делот од железницата од Коридор 8 од Куманово до Кичево веќе е железнички поврзан, а се работи за околу 150 км постоечка железничка пруга.
Првичната замисла од Министерството за транспорт и врски беше давање на целиот Коридор 8 под концесија, а ако тоа не е можно, тогаш концесии ќе се даваат етапно односно делница по делница.
„Во однос на изработка на техничката документација за железничкото поврзување кон Албанија, ЈП „МЖ Инфраструктура“ на 29 септември годинава распиша оглас за доделување на договор за јавна набавка за подготовка на тендерска документација и обезбедување на подлоги за изработка на претпроект и студии за изградба на пругата од Кичево до границата со Албанија. За спроведување на оваа јавна набавка се обезбедени средства од Буџетот на Република Македонија, а се очекува изработката на целокупната потребна документација да заврши во следните 3 години“, велат од Министерството за транспорт и врски.
Македонија мора да најде начин да ја продолжи пругата кон Бугарија и Албанија бидејќи се покажа дека домашната економија со хендикепот во железничката инфраструктура во овие два правци засекогаш може да остане зависна од политичките или од економските проблеми што ги има со соседна Грција, односно по правецот север-југ. Доказ за тоа се вагоните натоварени со стока од македонски компании што со денови не можеа да поминат на грчка територија до солунското пристаниште, а од таму до потрошувачите во светот. Проблемот е идентичен и за увозните компании, чии контејнери по неколку месеци се заглавени по европските пристаништа. Познавачите велат дека Македонија, како најзасегната, треба да биде двигател во барањето пари и во обезбедувањето поддршка од Италија, Албанија, Бугарија и од Турција, земји што покрај нашата ќе имаат огромна економска корист од доизградбата на инфраструктурата по Коридорот 8, преку што треба да се поврзат Јадранско и Црно Море.
Македонија мора да има железнички излез на трите мориња.
Коридорот 8 започнува во Бари и Бриндизи, Италија, продолжува во Драч и Валона во Албанија, од таму преку Ќафасан, Струга, Кичево, Скопје, Куманово, Бељаковце, Крива Паланка од Македонија преминува во Софија, Пловдив, Бургас и завршува во Варна, во Бугарија. Вкупната должина на железничката пруга долж Коридорот 8 изнесува 1.300 км.
Делот од Коридорот 8 што минува низ Македонија е во должина од 309 км и поделен е на три дела и тоа: источен дел во должина од 89 км, пруга во изградба (од границата со Бугарија, преку Крива Паланка, Бељаковце, Куманово), централен дел со постоечка пруга во должина од 154 км (Куманово-Скопје-Кичево) и западен дел во должина од 66 км. Овој дел е во фаза на студија, а почнува од Кичево, па до границата со Албанија.