Овие тројца вработени во Железница Инфраструктура од оваа канцеларија веќе неколку недели го регулираат целиот железнички сообраќај на Коридорот 10. Движењето на сите возови, преглед на сите станици и сите наредби до машиновозачите доаѓаат од овој центар. Ова е телекомандниот центар на Железница, прв од ваков тип на Балканот. Тука се работи деноноќно, на овие монитори можат да се забележат сите возови од влезот во Македонија на Табановце па се до излезот од земјава во Гевгелија. Системот дава целосна контрола на пругата, овозможува од едно место да се врши регулирање на сообраќајот а веднаш ги детектира и сите проблеми на пругата долж Коридорот 10. Според железничарите е прв чекор за модернизирање на железничкиот сообраќај.

- Ова е новиот телекоманден центар на Инфраструктура. Од овде се регулира целиот сообраќај на брз и ефикасен начин. Тука работиме 24 часа. На овие монитори гледаме се што има на терен, изјави Марјан Јованов од ЈП МЖ Инфраструктура.

Инвестиција е вредна околу 10 милиони евра. Со ова полека се напушта стариот начин на контрола што досега го вршеа вработените со црвени капи.

Ваков систем се планира да се постави и на целата железничка мрежа но откако ќе се поврзе со Коридор 8 кон Бугарија и кон Албанија.

Кире Коцевски