Инфраструктура (општо)

АЛБАНИЈА ГИ НУДИ ПРИСТАНИШТАТА

Албанското пристаниште со подобрена патна инфраструктура може да биде исплатливо за извоз и увоз на стоки од и до Македонија по морски пат

Драч е второ најблиско пристаниште по солунското, кое е често блокирано поради штрајкови

Пристаништето во Драч,поради блокади на солунското пристаниште за домашните бизнисмени е една од најсериозните опции за транспортот на стоки од и во Македонија. Ова беше заклучено на вчерашната презентација на можностите и предностите на албанското пристаниште во Стопанската комора на Македонија. Драч е второ најблиско пристаниште по Солун, кое има излез на три мориња - Јадранско, Јонско и Средоземно - и е исклучително стратегиски битно за економијата во регионот - изјави Стевица Чарапиќ, претседател на групацијата на шпедитери.Тој истакна дека иако е блиску, на пристаништето во Драч се' уште му недостига добра инфраструктура, патна и железничка поврзаност. Бизнисмените очекуваат македонската и албанската влада со заеднички напори во најскоро време да го надминат тоа. Генералниот директорот на пристаништето во Драч, Едуард Ндреу, истакна дека изминатите три години се инвестирани околу 50 милиони долари и се направени суштински промени во насока на поголема безбедност на стоката, обезбедување поволни тарифи и професионално работење.

- Пристаништето во Драч е предност за македонските бизнисмени. Подобрената инфраструктура, тарифите, начинот на работа и безбедноста се поволностите што ги нуди нашето пристаниште - изјави тој.Според претседателот на Албанската стопанска комора, Илир Жила, во изминатите години се инвестирани огромни пари за подобрување на капацитетите и на работењето на пристаништето, но за еден шлепер да стигне до таму има многу други прашања како царината, патиштата и бирократијата.

- Нашата Стопанска комора отвори канцеларија за заштита на бизнисите и таа ќе им биде на располагање и на македонските бизнисмени во Албанија, каде што ќе може да ги пријават сите попатни проблеми, кои ќе бидат веднаш решени - посочи Жила. Пристаништето во Драч се наоѓа во централниот дел на албанското крајбрежје, оддалечено 160 километри од македонско-албанската граница. Од граничниот премин Ќафасан е оддалечено три часа. Капацитетот на пристаништето изнесува 3,8 милиони тони годишно. Во минатата година е остварена размена на стока од три милиони тони, 700.000 патници, 120.000 автомобили и околу 40.000 камиони. Тоа е најголемото пристаниште во Албанија и преку него се врши над половината од албанскиот увоз и извоз. Драч е завршна точка на западниот дел од Коридорот 8 поради што стопанствениците потенцираа дека треба да се доизгради патната и железничката инфраструктура и апелираа до властите да го забрзаат процесот. Покрај презентацијата на пристаништето во Драч, во минатата недела на македонските бизнисмени им беа презентирани и можностите на црногорското пристаниште во Бар. За следната недела, претседателот на Стопанската комора на Македонија, Бранко Азески, најави гости од пристаништето во Бургас, Бугарија.

Горан Ризаов