Возен парк (ЈСП - двокатни автобуси)

Јавното сообраќајно претпријатие „Скопје“ не гарантира безбеден, удобен, сигурен и квалитетен јавен превоз со двокатните автобуси, изјави вчера в.д. директорот Александар Бошковиќ по средбата со градоначалникот Трифун Костовски. Според него, тие се многу понесигурни од обичните, нископодни возила и би можеле многу полесно да се превртат.

- Знаеме каква е културата на нашите патници и ако треба да се направат некои реформи за да се воведе тој превоз, таа е најважната. Возачот ќе нема прегледност што се случува на горниот кат, а таму е доволно да стојат двајца или тројца за да ја нарушат стабилноста на возилото. Тоа би значело и голема одговорност за нас и плаќање отштети - истакна Бошковиќ.

Тој и Костовски се согласија дека ќе треба да се направат големи промени во изгледот на градот за да може да се возат „даблдекерите“. Улиците, крстосниците, семафорите, надвозниците, дрворедите, како и гаражите и сервисите на јавното претпријатие се приспособени за да се употребуваат нископодни автобуси. Прашањето за сервисот, како и дообучувањето на вработените исто така може да бидат проблем. Според Бошковиќ, ќе бидат потребни дури 500.000 евра само за да се приспособат гаражите на ЈСП и во нив да можат да се сместат и двокатните автобуси.

ЌЕ СЕ ПРАВИ ПРОМОЦИЈА НА НИСКОПОДНИ ВОЗИЛА

Градоначалникот Костовски смета дека пред Владата да го распише тендерот за нови двокатни автобуси требало да го праша градот и претпријатието што сакаат.

- Во денешно време дури и кога некој прави свадба роднините го прашуваат што сака да му купат за подарок, за да не му донесат нешто непотребно. А ние не бевме консултирани за волку голема работа како целосната замена на возниот парк во јавниот превоз. Двокатните автобуси се повеќе се напуштаат во светот. Затоа и порачувам на Владата да поразговара со стручните лица за да утврди што е посоодветно за Скопје. Тие автобуси сепак ќе се купуваат со парите на граѓаните - рече Костовски.

Тој најави дека во наредниве неколку месеци низ градот ќе се возат промотивни нископодни автобуси, за граѓаните да видат какви се тие и потоа да одлучат дали би им одговарале.

- Во преговори сме со неколку производители да ни позајмат по еден автобус на краток период. Тие ќе се користат во превозот за да им покажеме на граѓаните дека се подобри од двокатните. Многу се побезбедни и попрактични. Замислете колкави застои ќе се случуваат на автобуските станици кога повеќе патници од горните катови по истите скалила ќе треба да слезат и да излезат од автобусите - објаснува градоначалникот.

За Бошковиќ несоодветно е и тоа што тие возила нема да можат да користат природен гас, иако претпријатието е целосно опремено со инсталации за тоа еколошко гориво, а 30 од сегашните автобуси веќе го користат.

СУБВЕНЦИИ КОЛКУ ЗА ДВЕ ВОДЊАНСКИ УЛИЦИ

ЈСП годинава доби субвенции за првпат во својата историја, иако тоа е практика во речиси сите европски градови каде што се користи автобуски јавен превоз. Градот од својот буџет му додели 140 милиони денари на претпријатието.

- Тоа се доволно пари за со нив да се изградат две улици како булеварот Водњанска. Но со тоа не го решаваме проблемот со ова претпријатие, само го одржуваме во живот. Пред извесен период формиравме координативно тело со Владата на чело со вицепремиерот Зоран Ставрески, со цел да се најде функционално решение за јавниот превоз. Тоа веќе не функционира и затоа барам повторно да почне да работи. Мора да се најде начин на кој ќе се финансира претпријатието за да не биде постојано во загуба. Исто така треба да се решат и долговите на претпријатието и тие што државата ги има кон него. По Нова Година ќе почнеме да го градиме трамвајот и ЈСП потоа ќе треба да стопанисува со него. Значи треба да сториме нешто за претпријатието да прерасне во вистински носител на јавниот превоз - додаде Костовски.

Бошковиќ објасни дека состојбата е доста неповолна и дека треба голема умешност да се управува такво претпријатие во услови на нелојална конкуренција и сива економија. Посебен проблем е стариот долг на државата за превоз на раселените лица од 2001 година, кој е фактуриран, но нема кој да го плати, па за ДДВ од таа фактура ЈСП веќе должи 6,5 милиони денари.

- Дури 97 отсто од нашите приходи доаѓаат од превозот на патниците. А 69 отсто од билетите се повластени. На тој начин годишно се одлеваат од 250 до 300 милиони денари. Државата отсекогаш преку нас водела социјална политика, но се си има свои граници - смета Бошковиќ.