Нема веќе на шопинг со воз во Солун

Укинувањето на железничката линија Скопје - Солун најмногу ги погоди македонските студенти што учат на тамошните колеџи

Сања Наумовска
Миркица Поповиќ

Одлуката на грчките железници да ја укине железничката линија меѓу Скопје и Солун, освен шопинг-туристите, најмногу ги погоди македонските студенти што учат на тамошните колеџи. Брзиот меѓународен воз нудеше можност за секојдневна и евтина врска со јужниот сосед. Опциите што сега им остануваат на располагање на македонските граѓани се патувањето со автомобил или со автобусите на туристичките агенции, кои од Скопје за Солун имаат тури само три пати неделно, а и билетите се поскапи. Ново превозно средство ќе треба да бараат и голем број сезонски работници од пограничниот дел што работат во северниот дел од Грција и патуваат секојдневно. Без воз извисија и љубителите на шопинг-турите до Солун. Повратниот билет Скопје - Солун чинеше 1.500 денари, додека, пак, билетите за студентите и за младите до 26 години беа поевтини и изнесуваа само 1.200 денари, со можност тој да биде искористен во рок од два месеца од датумот на издавање.

Дали одлуката за укинување на железничката линија е конечна, ќе се знае до почетокот на март, велат во „Македонски железници-транспорт“. Закажани се неколку средби со грчките и со српските колеги на кои треба да им се најде решение, возот, сепак, да продолжи да сообраќа кон Солун. Ниту една линија во патничкиот железнички превоз не е профитабилна, освен можеби кај супер брзите возови“, велат во МЖ. Затоа ќе треба да се утврди дали висината на загубите ќе ја надмине неопходноста линијата да остане функционална.

„Кога ќе се соберат сите елементи потребни за една линија да функционира, ангажирање вработени, плати, одржување и други давачки. Трошоците секогаш се поголеми од приходите. Сепак, линиите се одржуваат од економски и од социјални причини, со помош на државата и на локалните власти“, објаснуваат од МЖ. Една од опциите со кои би се намалиле трошоците на грчките железници е кон јужниот сосед да сообраќаат само македонски и српски вагони. На маса ќе бидат ставени и други предлози, но одлуката, сепак, ќе зависи од грчките колеги.

Решението да ги запрат сите меѓународни и голем број локални линии наиде на големи реакции и кај јужниот сосед. Од прес-канцеларијата на грчките железници „Трен ОСЕ“ за „Утрински“ образложија дека причината зошто се укинати сите меѓународни линии и дел од домашните е непрофитабилноста. Оттаму велат дека се' уште е рано да се знае што ќе се случува со линијата и не би можеле да предвидат дали би се воспоставила повторно доколку некоја друга компанија изрази интерес да ја преземе оваа линија под своја капа. Земајќи го предвид финансискиот колапс со кој се соочуваат грчките железници, по предлогот од ММФ да бидат продадени 49 отсто од акциите на ОСЕ на приватна компанија и големите отпуштања во компанија со што се преполови персоналот, очигледно е дека укинувањето на овие линии до неодредено време е единствениот начин да се закрпат дупките во компанијата. Сепак, одлуката беше големо разочарување и за Грците што ја користеа оваа линија да стигнат до Скопје и до Белград, но најмногу за македонските граѓани и студенти на кои ова им беше единствена евтина опција за патување до Солун. Со укинувањето на визниот режим кај некои од нашите граѓани се постави прашањето дали се размислува за воспоставување брзи возови што би стигале до Солун за два часа, кои покрај студентите, ќе им бидат од голема корист и на бизнисмените, со оглед на тоа дека би можеле изутрината да стигнат во Солун, да ги завршат работите и повторно да се вратат вечерта за само два часа. Поради добро организираниот јавен превоз и такси-линиите, граѓаните можеа многу лесно да избегнат плаќање за паркинг и дополнителни трошоци за бензин. Меѓутоа, наместо брзи возови, сега линијата гасне комплетно.

„Тажно е што се прекинува оваа линија. Можеби не беше ова најбрзиот или најсредениот воз, но, сепак, беше пристоен и услужуваше и студенти, и млади, и постари што немаат сопствено возило или сакаа поекономично да патуваат до Солун за викенд. Цената на билетот беше минимална во споредба со трошоците за зелен картон, бензин, патарини и паркинг што треба да ги платите за тоа патување. Од друга страна, возот има и еден романтичен и социјален момент на запознавање нови луѓе, склопување нови пријателства, што им даваше можност и на странските туристи да запознаат дел од македонскиот менталитет. На крајот на краиштата, жално е што се става крај на оваа линија во време кога низ целиот свет се работи на насочување на граѓаните кон користење на возот како поеколошко и поевтино сообраќајно средство и изработка на супер брзи возови за долги дестинации“, вели една поранешна студентка во Солун, која пет години двапати месечно ја користела линијата Солун - Скопје.

Возот Солун - Скопје - Солун возеше на оваа релација двапати во денот, наутро и попладне во 17 часот. Овој брз воз беше „спасител“ и за голем број граѓаните што патуваа кон Велес, Неготино, Гевгелија и Демир Капија, бидејќи како меѓународен, беше значително побрз од обичните домашни линии.