За проневера на патарините приведени 87 инкасанти

Во мрежата биле 92 лица кои користеле лажни фискални сметки за патарина. Од еден инкасант за една смена од 12 часа наплаќале по 1.000 денари. На организаторите им бил даван месечен надомест - поткуп од 100 до 500 евра

Продолжение на „Змиско око“

Два милиони евра е сумата што, наместо на сметката на Агенцијата за патишта, завршила во џебовите на деведесетина инкасанти од наплатните рампи за патарина на „Македонија пат“ на Коридорот 10. Во продолжението на акцијата „Змиско око“ од пред три години, вчераутро полицијата приведе 87 од осомничените членови на групата, кои со десетина возила за спровод беа донесени во Основниот суд Скопје, на распит пред истражен судија. Вкупниот број на осомничени е 92 лица, петмина од нив се во бегство и полицијата трага по нив. 

- Пронајдени се доста материјални докази што укажуваат на тоа дека групата е организирана. Осомничените лица работеле по претходен договор со цел за себе да прибават противправна имотна корист - истакна министерката Гордана Јанкулоска.

Во почетокот на минатата година била отворена истрага, во која биле користени т.н. посебни истражни мерки и која завршила вчераутро со апсењето на групата. Во неа, според полицијата, учествувале 89 инкасанти, раководител и заменик-раководител на одделението за наплата на „Македонија пат“ и еден поранешен вработен во претпријатието.

Инкасантите на наплатните рампи, освен неиздавање, оперирале и со лажни фискални сметки, кои биле изработувани на оригинални бланко-котури за фискални сметки што ги земале од наплатните станици. За нивната изработка биле задолжени тројца членови од групата, од кои еден е поранешниот вработен на „Македонија пат“, кој имал искуство во работата со фалсификувани фискални сметки, бидејќи токму поради тоа бил избркан од работа. 

- Фалсификуваните фискални сметки ги изработувале на соодветна компјутерска опрема, изработена програма и термални печатачи. Од еден инкасант за една смена од 12 часа наплаќале по 1.000 денари - објасни Јанкулоска.

Како услов за влегување во криминалната шема, според МВР, инкасантите на организаторите да им даваат месечен надомест, поткуп што се движел од 100 до 500 евра во зависност од модусот на оперирање на инкасантите, а пари се давале и за добивање место на наплатна рампа каде што има поголема фреквенција, особено во туристичката сезона.

Во претрес кај девет лица и службените простории на наплатните рампи од Коридорот 10 - Миладиновци, Отовица, Сопот, Романовце, Петровец и Стоби - биле пронајдени програмата за печатење на лажните фискални сметки, печатачи, бланко-котури, пари, но и подготвени фискални на кои можеа да се забележат датуми од овој месец, односно сметки што осомничените планирале допрва да ги делат на наплатните рампи. 

Според кривичната пријава, групата се товари за злоупотреба на службената положба и овластување, примање поткуп, противзаконско посредување, злосторничко здржување и фалсификување исправа. 

Патарините - златна кокошка за вработените

Од застареното пола-пола и неиздавање сметки, се премина на пософистициран систем со издавање фалсификувани сметки. Така и возачите со сметка и парите в џеб

Со години се чека на автоматизираниот систем за наплата

Трипати последователно полицијата открива криминални работи на патарините, а системот за наплата останува ист!? Кој е главен организатор на империјата останува енигма. Останува нејасно зошто и по толку случаи на злоупотреба на наплатните станици не се преземаат порадикални акции, слични на полициските, и да се смени сегашниот начин на наплата, кој по сé изгледа дава широки можности за манипулации. Полициската истрага како по правило највисоко стигнува до шефовите на смена. Решение за проблемот со патарините во моментов нема. Автоматизацијата на рампите, која се најавува со години, се остава за некои идни времиња. 

Пред четири години беа уапсени 72 лица вработени во „Македонија пат“, потоа во мај 2008 година уште 26, а минатата недела дури 97. Со годините толку се усовршија методите за поткраднување, па од застареното пола-пола и неиздавање сметки, се премина на пософистициран систем со издавање фалсификувани сметки. Така, ем возачите со сметка ем парите в џеб. 

Од Министерството за транспорт и врски одговараат неодредено зошто и по секојдневните случаи на злоупотреба на патарините, за што информираа и телевизиите, сé уште не е имплементирана автоматизацијата на наплатните станици. Во Бугарија и други земји пристапиле кон поедноставен начин: странците плаќаат патарина на влез во државата, а домашните возачи при регистрација на возилата.

- По извршени анализи од страна на Агенцијата за државни патишта, предложено е воведување на интегриран систем за готовинска и безготовинска наплата на патарина без користење на човечки фактор, кој ќе биде управуван од Агенцијата. Со воведувањето соодветен ефикасен наплатен систем се очекува да се елиминираат недостатоците и злоупотребите во наплатата на патарината, односно да се оневозможи корисниците на автопатот да избегнуваат плаќање на патарина. Веќе се обезбедени средства од Европската банка за обнова и развој, избран е консултант и се очекува во почетокот на 2012 година да биде изработена тендерска документација и да биде објавен тендер - изјавуваат од Министерството за транспорт и врски. 

Според неколкумина поранешни директори во „Македонија пат“, и порано имало земање пари под рака поради што биле поднесувани пријави. Но тогаш, велат, сé било решавано во рамките на фирмата, без асистенција на полицијата. Многумина биле суспендирани на одредено време, избркани или биле парично казнети.

- Идејата за автоматизирани наплатни станици како во многу држави не е нова. Предлози со готови елаборати има уште пред десетина години, откако имаше неколку бркања едноподруго од работа поради проневера. Но сé остана само на хартија. Зошто оттогаш никој ништо не сторил не се знае - велат нашите соговорници. 

Друмската мафија, на која наводно и се застана на патот во долготрајниот судски процес, се покажа дека е активна и поорганизирана од порано и дека некои луѓе во кабините и понатаму продолжија да крадат. Некои нејзини членови беа и претходно осомничени, но поради недоволни докази судењето беше вратено од почеток.