Според експертите изградбата на Нуклеарна централа е реалност и добро алтернативно решение за лошата енергетска состојба во земјава

На земјава и требаат големи и современи енергетски капацитети поради што изградбата на Нуклеарна централа е реалност. Токму затоа оваа алтернатива за решавање на лошата енергетска состојба во земјава треба да стои како отворено прашање, а не да не се турка под килим и да се прави непотребна фама дека тоа е бабарога. Ова е дел од размислувањата на енергетските експерти во земјава кои вчера дебатираа на првата јавна расправа за нацрт-стратегијата за развој на енергетиката во РМ за период од 2009 до 2020 со визија до 2030 година.

Стратегијата еден месец беше достапна на веб-страницата на Министерството за економија за граѓани и стручни лица. Тие имаа пристап до нејзината содржина и веќе ги дадоа своите коментари, а како што нагласи Фатмир Бесими, министер за економија, добар дел од нив ќе бидат имплементирани.
- Стратегијата од понеделник ќе се најде на расправа во Владата - вели Бесими и додава дека е предвидена уште една јавна расправа наесен, за потоа да се подготви првата драфт верзија на Стратегијата.

За академик Глигор Каневче, еден од академиците на МАНУ кои учествуваа во неколкумесечната подготовка на нацрт-стреатегијата, најзначајно е што пуштаме сигнал до ЕУ дека земјава не е црна дупка за енергетиката.
- Ако претходните 20 години не е изграден ниту еден енергетски објект, не значи дека и во следните 20 години ќе биде така - нагласува Каневче. Тој додава дека земјава ја гледа како рамноправен член на ЕУ, која ќе партиципира во заедницата.

Професорот Константин Димитров укажува дека нуклеарната енергија е чиста енергија и таа не ја загадува околината. Во услови кога немам доволно јаглен, гас,а гасните линии Набуко и Јужен Поток се на 500 километри од македонската граница, зошто како алтернатива да не размислуваме дека нуклеарната енергија е реална можност и во земјава.
- Во светот нуклеарките ги градат покрај самите градови, а тие и се сигурни капацитети, бидејќи од 1955 година досега само еден сериозен инцидент се случи, а тоа е Чернобил, потсетува Димитров. Тој појаснува дека штетата од климатските промени е поголема отколку нуклеарната енергија, оти таа нема никаква емисија на јаглен двооксид. Димитров укажува дека ова како алтернатива треба да стои отворено и да не се прави непотребна фама дека е баба рога.
Петар Јохансон, директор на Светска банка, смета дека самата постапка со која се подготвува Стратегијата за енергетика е отворена и транспарентна, бидејќи на јавната расправа се поканети сите релевантни фактори од земјава и пошироко. Тој предлага да има дополнителна секторска анализа за да се утврдат приоритетите, а смета дека е потребно да има и ценовни реформи и тарифи.

Реализација на Стратегијата зависи од тоа колку државата предложените сценарија ќе ги реализира во рамките на своите финансиски можности. Експертите сметаат дека е неопходно да се привлечат странски инвестиции, но и јавно приватно парнерство.
- Капиталот што е предвиден за капитални вложувања да биде одвоени за енергетика, бидејќи тоа е таква област каде што морате многу да инвестирате, но средствата сигурно се враќаат на долг период, предупредува Димитров.

Законот за енергетика е жива материја
Законот за енергетика е жива материја. Тој постојано треба да се дополнува, бидејќи новите директиви се поригорозни во однос на мерките за штедење на енергија, помалата потрошувачка, како и заштита на околината.
Според професорот Димитров, Законот има уште неколку елементи што ќе се додадат, а кои се однесуваат кон заживување на определени подзаконски акти кои ќе ни го забрзаат патот кон приклучување во Европската заедница. Тој смета дека ќе се најде решение коешто нема да биде голема промена во законските одредби, а со тоа ќе се усогалсиме со барањата на заедницата.

http://www.vecer.com.mk/default.asp?ItemID=C0AD75AFE063CA4892E70F259D2B5C1E