Барокот ги заобиколува телефонските говорници

Се подготвува проект за обнова на јавните телефони во Скопје, но локалните власти нема да се мешаат во изборот на нивниот дизајн, па така тие можеби нема да имаат старински изглед како клупите, канделабрите или другите елементи од урбаната опрема

Од септември ќе почнат да се обновуваат јавните говорници

Јавните телефонски говорници ќе почнат да се обновуваат во септември, а за тоа ќе потпишат договор Агенцијата за електронски комуникации и „Македонски телеком“. Деталите сé уште не се познати, но веројатно ќе се постават современи уреди, кои, освен телефонирањето, ќе нудат и дополнителни услуги, како пристап на Интернет, што е вообичаено во европските земји. Старите и дотраени кабини ќе се заменат, а можно е дизајнот на новите да не се вклопи во архитектонските стилови на новите згради во центарот на Скопје, односно тие да отскокнуваат, за разлика од клупите, канделабрите и другите елементи од урбаната опрема. Локалните власти велат дека нема да се мешаат во изборот на изгледот, бидејќи никој не го побарал тоа од нив.

Договорот меѓу „Македонски телеком“ и Агенцијата за електронски комуникации се подготвува, а тој, како што нагласуваат од АЕК, ќе ги опфати и говорниците.

- Телекомот го доби тендерот за универзалната услуга, а дел од тоа е и обновата на говорниците, односно компанијата ќе има обврска да ги оспособи расипаните уреди. Од нив ќе зависи каков ќе биде дизајнот и дали ќе функционираат на парички или на картички - вели Марјан Пејовски, одговорен за односи со јавноста во АЕК.

Според нив, говорниците се потребни и покрај тоа што речиси не се користат, затоа што најголемиот дел граѓани имаат мобилни телефони.

- Користењето телефонски говорници се намалува, што е и неминовно. Сепак ќе мора да останат оние што се наоѓаат на фреквентни места, како што се автопатиштата и аеродромите, потоа во установите како што се болници и затвори, како и специјални говорници за лица со посебни потреби - велат од агенцијата.
Од телекомот чекаат да го потпишат договорот, па тогаш да пристапат кон обновата на говорниците. Но сé уште не се знае на кој начин ќе го реализираат проектот и како ќе изгледаат јавните говорници.

- Во наредниот период „Македонски телеком“ почнува голем процес на модернизација на својата мрежа, при што се разгледуваат повеќе можни решенија за да се одреди оптималниот начин за надградба и на телефонските говорници. Тендерот за даватели на универзална услуга пред еден месец заврши, ние сме избрани, но чекаме да го потпишеме договорот, па потоа да почнеме со реализација на проектот. Од идниот месец би требало да почнеме со подготовките - соопшти Верче Георгиевска-Рупиќ, портпаролка на телекомот.

Сé уште не се знае дали говорниците во центарот на градот ќе бидат во некој старински стил, како и новите згради. Надлежните од градот велат дека бидејќи не добиле иницијатива од операторите, засега нема да учествуваат во изборот на дизајнот.

- Градот нема изворни надлежности за поставување телефонски говорници и, доколку надлежните компании што се занимаваат со фиксна телефонија иницираат поставување говорници на јавни површини, со задоволство ќе се разгледа иницијативата. Во моментов нема иницијативи од операторите за фиксна телефонија, па така не може да се коментира сé што би било предмет на разгледување - соопшти Неделчо Крстевски, портпарол на градот.

Најпознатите стилизирани телефонски говорници се црвените британски кабини дизајнирани во 1930-тите години. Една имаше и во Скопје, пред пабот „Лондон“ на централниот плоштад, но беше отстранета кога соседниот угостителски објект го презеде просторот. Познати се и бразилските говорници наречени „големо уво“ поради својот дизајн, бидејќи висат над главата на корисникот.