Трамвај Скопје ( Лесна железница / LRT )

ОД НОВА ГОДИНА ТРЕБА ДА ПОЧНЕ ИЗГРАДБАТА НА ТРАСАТА

Трамвајот на брз колосек

Нема проблеми со сопственоста на земјиштето, а и подземната електрична инсталација е добра, па реално е до март да се заврши првата траса, од Ново Лисиче до комплексот банки, тврдат градските власти

Симулација на првата траса, која ќе минува од Ново Лисиче до комплексот банки

За амбициозниот проект на градските власти за трамвајот граѓаните имаат различно мислење. Едни цврсто веруваат и го поддржуваат проектот, кој треба да го реши проблемот со јавниот превоз, а други се скептични и велат дека идејата ќе остане само желба.

Градските власти се сигурни дека депото и првите три километри од трасата за трамвајот ќе бидат изградени до крајот на мандатот на градоначалникот Трифун Костовски, во март 2009 година.

Од друга страна, велат дека нема начин како да го задолжат следниот градоначалник да ја доврши инвестицијата, вредна милиони евра. Од одделението за односи со јавноста тврдат дека ниту формално-правно Градот не може да го обврзе наследникот на Костовски да продолжи со изградбата на трасите.

- Ние се надеваме дека јавноста ќе биде таа што ќе врши притисок за да се заврши почнатото, зашто засега не постои друг начин - вели Љупчо Пандиловски од одделението за односи со јавноста.

Градот обезбеди 10 милиони евра, колку што се потребни за почеток на инвестицијата, односно за изградба на депото, првата траса, од Ново Лисиче до комплексот банки и набавка на неколку шински возила.Италијанската корпорација, која неодамна беше избрана на конкурсот за изработка на основниот проект за изградба на трамвајски сообраќај, треба најдоцна до Нова година да го достави проектот. Во меѓувреме, Градот ќе бара изведувач за изградба на големото депо во Ново Лисиче и на првите три километри од трасата.


Од Градот не можат да гарантираат дали идниот градоначалник ќе го заврши проектот, кој предвидува четири линии

- Ако се' оди според планот, првата делница ќе се изгради брзо, оти нема проблеми со сопственоста на земјиштето. Реално, може да се почитуваат роковите, бидејќи Скопје има многу добра електрична подземна инсталација, што е предуслов. Ќе ни одземеше многу време ако поставувавме нова. Треба да се направат само две трафостаници за целиот проект. Размислуваме каде би било пофункционално да минува трамвајот: на средина од булеварот „Јане Сандански“ или на крајот од двете коловозни ленти. Проектот се прави исклучиво според Генералниот урбанистички план (ГУП), кој предвидува трамвајска траса - вели Ненад Томиќ од одделението за сообраќај.Од Градот соопштуваат дека се предвидени четири траси. Едната ќе почнува од мостот кај Сарај, каде што треба да се изгради и мало депо. Главната гаража ќе биде кај населбата Ново Лисиче.

- Се предвидува во главното депо да се сервисираат возилата, но и да се врши секојдневно техничко и хигиенско одржување. Потребни се околу 50 шински возила за цел град, а за првата траса ќе бидат доволни 6 до 8 единици - вели Томиќ.

ИНФО-За 12 минути од Ново Лисиче до Ѓорче Петров

Првиот трамвај ќе биде прототип од „Раде Кончар“ или од „Шкода“. Во Европа се тренд широкошински линии од 143,5 сантиметри за возилата да можат да ги користат и железничките пруги. Возилата ќе бидат климатизирани и со дигитална информативна табла. Од Градот предвидуваат од Ново Лисиче до Ѓорче Петров да се патува околу 12 минути и да има 22 попатни станици.

http://dnevnik.com.mk/?ItemID=5F4FC1C922473D48A398C29E7D22EE27