Мост за пешаците на Бит-пазар

Според градоначалникот на Чаир, Изет Меџити, изградбата на пешачкиот мост ќе почне откако ќе се помести подземната инфраструктура

Изградбата на пешачкиот мост на Бит-пазар заглави на подземната инфраструктура. Според градоначалникот на Општина Чаир, Изет Меџити, градењето ќе почне откако ќе се поместат водоводната, електричната и другите инсталации, односно сета подземна инфраструктура на локацијата.

- Откако ќе се поместат инсталациите, предвидено е мостот да се заврши за три месеци - изјави Меџити, но не прецизира колку време ќе биде потребно за подземните инфраструктурни зафати.

Пешачкиот мост ќе се гради кај Бит-пазар и ќе го поврзе пазарот со амбулантата од другата страна на булеварот Крсте Мисирков. Со неговата изградба се очекува да се реши проблемот со минувањето на пешаците на оваа фреквентна сообраќајница. Со години булеварот Крсте Мисирков кај Бит-пазар наликува на огромен пешачки премин каде што пешаците недисциплинирано поминуваат кога и каде што сакаат и предизвикуваат застој во сообраќајот и нервоза кај возачите.

Деновиве ќе бидат познати сите детали за текот на изградбата, откако ќе се одржи состанок со сите вклучени страни во проектот. Досега на теренот се вршеа ископувања, за да се добие очекуваната повратна информација за инсталациите од страна на ЕВН и од „Топлификација“, како и од Јавното претпријатие „Водовод и канализација“.

Според градоначалникот Меџити, мостот ќе биде со комбинирана бетонска и челична конструкција. Тој ќе биде од затворен тип, односно покриен, а од двете страни ќе има лифтови за лица со посебни потребни и скали. На средината на булеварот ќе се постави централен столб, со што сегашниот површински пешачки премин ќе се затвори со жардинијери.

Инвеститор на објектот е фирмата „Акцент медија“, а изведувач е фабриката „Карпош“.

- За возврат на „Акцент медија“ ќе и' биде отстапен рекламен простор на мостот на период од 10 до 15 години. Фирмата ќе може да поставува билборди и да издава рекламен простор, а со дел од парите ќе го одржува мостот во исправна состојба, пред се' лифтовите - вели Меџити.

Од „Акцент медија“ велат дека по завршувањето на изградбата на надземниот пешачки премин, тој ќе остане во сопственост на општината Чаир.

- „Акцент медија“ со посебен договор ќе го користи просторот за пропагандни намени и ќе биде одговорна за негово одржување. Фирмата за проектот обезбеди 11 милиони денари, односно 180.000 евра, а евентуалните дополнителни трошоци ќе бидат покриени од општината - вели Небојша Маслинко, директор на „Акцент медија“.

Според Меџити, изградбата на мостот ќе чини 200.000 евра.

Поради темницата тие се претворени во јавни вециња и наркомански дувла. Смреда се шири од нив и ги прави невозможни за користење дури и преку ден кога дневната светлина барем малку ги осветлува

За подземните премини во Скопје, покрај тоа што имаат запоставена примарна употреба, граѓаните велат дека се грдотија за градот. Ова го говори и самата нивна моментна состојба и слика. Двата подземни пешачки премини на булеварот Александар Македонски" се или во полутемница или во апсолутен мрак. Едниот, кај хотелот Континентал" е осветлен и единствниот што е бојосан пред десетина години и не мириса толку многу на свежа урина. Светло нема на влезовите, а уште помалку во средината на премините. Поради темницата тие се претворени во јавни вециња и наркомански дувла. Смреда се шири од нив и ги прави невозможни за користење дури и преку ден кога дневната светлина барем малку ги осветлува. Другиот таканаречен премин, во близина на средните училишта АСУЦ и ЕТУЦ, е ноќна мора. Студентите и учениците што се движат во тој дел од градот велат дека редовно ги користат, но морници им поминуваат кога, ноќе по втората смена, мораат да влезат во темницата. Има два начина да го се преминеме булеварот - над земја, преку оградата, и да не собере, не дај боже, некој автомобил или да влеземе под земја во темница и смрдеа. Јас лично редовно ја одбирам втората варијанта, па затнувам нос и си светам со телефонот за да го поминам преминот", вели студент сместен во домот Стив Наумов". Третиот премин, што е еден од најзачуваните и што е одржуван, е оној кај трговскиот центар Скопјанка во населбата Аеродром. Тоа е единствениот осветлен. Иако е најзачуван, ретко кој го користи, зашто на граѓаните им се морничави празните дуќани во него и неонките полни со фекална вода. За четвртиот, и последен, малкумина знаат, а е на Јужниот булевар зад Старата железничка станица. Изграден е пред повеќе од половина век и служел како подземен премин на тогашната железничка станица. Истиот е заграден и не во функција повеќе од 15 години.

Градските власти велат дека ја евидентирале лошата состојба на подземните премини и најавуваат интервенции од типот на осветлување и вонредно нивно чистење.
- Подземните премини ги одржува ЈП Комунална хигиена и тоа го прави од
средствата наменети за оддржување на јавната хигиена, велат од Одделението за односи со јавност во Градот. Искуствата покажуваат дека подземните премини каде што има продавници, се во активна употреба и со нив нема проблем со одржувањето на хигиената,
безбедноста на минувачите и неовластеното отуѓување на имотот.

Подземните премини што беа примарни капитални инвестиции во програмата на градоначалникот Коце Трајановски се во постапка со која годинава треба да се добие конечен одговор на прашањето дали се технички изводливи и финансиски издржани инвестициите за изградба на истите, велат од Град Скопје.

http://vecer.com.mk/?ItemID=B7797063B2AE9E43A368C3FE1FC62D22