Моделарство, макетарство и колекционерство

Томо Леов ги изработува макетите на возовите за шест месеци, а за најголемата потрошил 2.000 евра

Скопјанецот Томо Леов веќе дваесетина години изработува необични макети на железници. Досега направил повеќе од десет "гигантски" макети. Вели дека љубовта кон возовите ја наследил од дедо му, кој работел како железничар. Тој ужива да ги гледа железничките станици, а љубовта кон возовите му помогнала да ја избере и животна професија - вонредно да ги полага испитите за машиновозач.

Леов вели дека негово најголемо достигање е железницата по која се движат четири воза, а може да ги контролира еден човек. Таа е долга околу два метра и широка 70 сантиметри. За изработката на и таа железница Леов потрошил најмалку шест месеци и околу 2.000 евра.

- Во омилената макета вложив многу време. Вистинска реткост е што покрај железничките пруги низ макетата минува и импровизирана река низ која тече вода, за разлика од другите макети во кои коритото на реките е обоено. На макетата поставив и канделабри, кои "вистински" светат и го осветлуваат патот на возовите - вели Леов.

Тој во мај лани изработил макета по нарачка за потребите на Железничкиот училиштен центар во Скопје. Таа макета е голема девет квадрати и возовите се движат на четири нивоа. Тој објаснува дека на неа не внимавал многу на естетиката туку на техниката, бидејќи била наменета за едукација на учениците.

Поради високата цена на материјалите што се потребни да се изработи една макета, Леов вообичаено "урива" една макета за да изработи нова. Досега не срушил само две макети - омилената и таа за во Железничкиот училиштен центар.

За изработка на една макета му се потребни најмалку шест месеци. Пред да почне да ја работи макетата прво го одредува просторот и ја бележи патеката низ која ќе поминуваат пругите. Потоа ги поставува подлогата, која е направена од дрво, пругите и електронската мрежа. Последна фаза при изработката на макетите е "шминката" и додавањето на деталите, како и поставување на возовите, кои ги купува.

- Прв чекор за разубавување на макетата е изработката на гипсениот релјеф. Потоа се нанесуваат трева и дрвја, кои ги правам од гумирани и од сунѓерести материјали. Една од тајните при изработувањето на релјефот околу макетите се боите, кои се направени на природна база - објаснува Леов.

Тој своите макети ги изложил и на саемот "Технома 2001".

- На "Технома" сфатив дека Македонците немаат сериозен пристап за макетарството. Тие се уште мислат дека макета на железница е играчка за деца. Во странство, за вљубениците во ова хоби постојат посебни клубови и макетарството е развиено на поголемо ниво - вели Томе.

Макетарот Леов планира да изработи макета на Старата железничка станица во Скопје од пред земјотресот и да ја постави на пригодно место во Новата станица.

Дневник - Андријана Андова - 11.02.2004