Железници (општо)

Кризата го преполови транспортот

Превозот со железницата последново тримесечје е намален за 30 отсто, а голем број камионџии седат дома наместо да возат по европските патишта

Превозниците се најмногу оштетени од намалениот обем на работа на металуршките компании

Глобалната криза им ја преполови работата на Македонски железници и на патните превозници. Се проценува дека транспортот со железницата само последново тримесечје е намалено за 30 отсто. Во „Макамтранс“, здружение на камионски превозници, велат дека во други години во ноември и во декември најчесто недостигале слободни камиони за да се извршат сите нарачки. Сега голем дел од камионџиите седат дома наместо да возат по европските патишта. Околу седумстотини камионџии стравуваат дека ќе останат без возилата или становите што ги заложиле како хипотека за кредит за новите камиони што ги купиле годинава.

Превозниците се најмногу оштетени од намалениот обем на работа на металуршките компании „Фени“, „Силмак“, „Макстил“ и „Арцелор Митал“. Железницата и камионџиите се главните испорачатели на нивните производи и репроматеријали на пазарите на Европската Унија, а е замрен и внатрешниот сообраќај.

- Во ноември лани превезовме 58 милиони нето-тон на километар, а годинава само 45 милиони. Состојбата во декември е уште полоша. Во декември 2007 година остваривме транспорт на 54 милиони нето-тон на километар. Месецов постигнавме само 19 милиони и не верувам дека до крајот на месецов ќе ја подобриме состојбата - вели Благоја Крстевски, директор на Македонски железници - Транспорт.Покрај глобалната криза, железницата има штети и од штрајкот на вработените во Солунското пристаниште, кое трае речиси една година. Крстевски тврди дека поради сите проблеми, им се натрупале многу неплатени обврски.

- Поради рецесијата обемот на работа ни се намали за 50 отсто. Како се намалуваа извозот и увозот на Македонија, така опаѓаа нарачките за транспорт на стоки. Најмногу изгубивме со намалениот обем на работа на „Силмак“, „Фени“ и „Макстил“ - вели Билјана Муратовска, претседател на „Макамтранс“.

Според неа, од крајот од минатата година досега превозниците, со лизинг и кредити, купиле 700 нови возила. Камионџиите засега редовно ги исплатувале своите обврски кон кредитните институции бидејќи поради задоцнетото плаќање на извршените услуги се' уште имаат приходи. Но, проблеми ќе се јават од јануари и од февруари в година, кога ќе секнат изворите на исплата, па тие нема да можат да ги плаќаат месечните рати. Затоа уште отсега стравуваат дека банките ќе почнат да им ги одземаат возилата издадени на лизинг, а тие што како хипотеки ги оставиле своите станови може да останат без нив. Транспортните камиони со приколка чинат од 120 илјади евра до 200 илјади евра. Месечната рата за нив се движи од 1.600 до 2.500 евра.Според Државниот завод за статистика, индустриското производство, во кое металургискиот сектор има високо учество, се намали за 9,9 отсто споредено со истиот месец лани. Во октомври дефицитот во трговската сметка се искачи на 2,4 милијарди долари.

ИНФО-Патишта без камиони

Транспортот на стока во Македонски железници во последните два месеца е намален за 30 отсто. Во декември 2007 година железница остварила 54 милиони тон по километар, а месецов само 19 милиони. Работата на патните транспортни компании е преполовена поради помалиот обем на нарачки на металниот сектор.Околу седумстотини камионџии стравуваат дека ќе останат без возила и станови што ги заложиле како хипотека на кредит за новите камиони што ги купиле годинава