„Фершпед“ ја тужи железницата за 1,5 милион евра

Претпријатија од Чешка, од Србија, но и од Македонија со тужби побаруваат од „МЖ-транспорт“ основен долг од околу 8 милиони евра

Ревизорите утврдиле дека „МЖ-транспорт“ работи без дозвола за јавен превоз и без сертификат за безбедност

Шпедитерската компанија „Фершпед“ го тужи државното претпријатие „Македонски железници-транспорт“ и бара надомест на штета од околу 1,5 милион евра, бидејќи за превоз на различни стоки од 1993 до 2003 година претпријатието применувало повисок курс при пресметка на фактурите, утврдиле во Државниот завод за ревизија. Ова е само еден од многуте судски спорови во кои железничкото претпријатие се јавува како тужена странка. Претпријатија од Чешка, од Србија, но и од Македонија со тужби побаруваат од „МЖ-транспорт“ основен долг од околу 8 милиони евра.

- Имајќи ја предвид висината на тужбените барања во делот на главниот долг, евентуалните пресметани и признаени камати и судските трошоци за водење на постапката, може да се создаде можност за влошување на ликвидноста на друштвото - велат во ДЗР.

Дополнително, против „МЖ-транспорт“ се водат уште седум судски постапки со неопределена вредност од кои можат да произлезат одливи на пари што не можат да се пресметаат до завршувањето на постапките. Од друга страна, претпријатието има поднесено тужби кон повеќе купувачи во вредност од околу 6,3 милиони евра, кои во зависност од исходот може да обезбедат прилив на средства на сметката на „МЖ-транспорт“. Ревизорите во извештајот откриваат и дека претпријатието врши превоз на стоки и на патници иако нема обезбедено дозвола за јавен превоз и сертификат за безбедност во согласност со постојната регулатива. Во ДЗР укажуваат дека во 2009 година надлежното министерство на „МЖ-транспорт“ му издало дозвола за јавен превоз со рок на важење од пет години иако притоа претпријатието не поднело доказ од Централниот регистар за економска и финансиска способност.

Наедно, претпријатието не презентирало ниту доказ дека е осигурено во осигурителна компанија преку писмен документ што ќе гарантира дека е способно да надомести евентуална штета во случај на несреќа во однос на патниците, багажот, околината или трети лица, што е обврска во согласност со меѓународните договори и Законот за железници. Ревизорите утврдиле и дека „МЖ-транспорт“ работи без сертификат за безбедност, што е исто така спротивно на регулативата. Во ДЗР укажуваат дека поради неневремена исплата на ратите за локомотиви и вагони што биле земени на лизинг од Швајцарија постои можност „МЖ-транспорт“ да ги загуби овие средства.

600 вработени од Железница се испратени на принуден одмор. 300 вработени од Транспорт и околу 300 вработени од Инфраструктура издале решенија за принуден одмор поради намалениот обем на работа и неможноста да ги покријат трошоците. Најавуваат дека вработените ќе ротираат со принудниот одмор. Само мал дел од оние кои се на принуден добиле решенија за принуден на неограничено време.

Проценките се дека двете компании со оваа мерка ќе заштедат околу 20 милиони денари месечно или 2 милиони евра годишно.