Интернет и телекомуникации

Ја испушта ли шансата третиот мобилен оператор ВИП да биде сериозен играч на македонскиот телекомуникациски пазар? Иако како нов оператор државата му даде погодности во делот на интерконекцијата, каде што ВИП плаќа по пониска цена, компанијата минатата година регистрирала загуби во работењето од дури 5,7 милиони евра.

Само за споредба ваква шанса и попусти не добија новите фиксни оператори, иако Европа укажа дека не треба да се фаворизираат компании. Ова денеска го објави телевизијата Канал 5.

“ВИП на пазарот е присутен речиси година и пол, а достигна удел од само скромни 10,7 отсто. Моментната пенетрација на корисници во мобилната телефонија е околу 106 проценти. Според официјалните податоци околу 1,3 милиони корисници има ’Т-Мобиле’, 740.000 ’Космофон’, а на ВИП отпаѓаат само околу 240.000. Според заводот за статистика, лани бројот на корисници во мобилната телефонија се зголемил за повеќе од 40 отсто. Од нив пак, на ВИП се претплатиле само скромни 10 отсто, останатите како подобри ги одбрале ’Комосфон’ и ’Т-Мобиле’. Од ВИП тврдат, загубите се во рамките на планираните активности. Минусот најмногу го објаснуваат со инвестициони активности во поставување на базните станици“, се вели во информацијата на скопската телевизија.

Граѓаните пак најчесто остануваат верни на операторите што први ги избрале за разговор.

Понатака, повикувајќи се на сопствени извори, Канал 5 објавува дека по заминувањето на Борис Немсиќ од челната позиција на “Мобилком Австрија“ разнишани се и директорските позиции на филијалите на Балканот, во Србија и Македонија.

“Наспроти податоците кои укажуваат дека ВИП има најмал број на корисници заложбата на Владата за влез на трет мобилен оператор со кој ќе се срушат високите цени за телефонскиот импулс се покажа успешна. По вегувањето на третиот мобилен оператор на пазарот во земјава, цените на услугите во ’Космофон’ и ’Т-Мобиле’, кај одредени пакети се намалија речиси двојно“, објавува телевизијата.

Околу 900.000 лица, односно 44 отсто, користат интернет во Македонија, сметано до крајот на 2008 година. Ова претставува зголемување за 125 отсто од 2006 година, кога во земјава имало 400.000 корисници на глобалната мрежа, покажале податоците од испитувањето на светската Интернет статистика (IWC),објави на нивната интернет страница, пренесува Нетпрес.

За споредба, во Словенија Интернет користи 64 отсто од населението, во Грција 46 отсто, Хрватска - 44 отсто. Помалку од македонските граѓани, Интернет користат граѓаните на Црна Гора, околу 41 отсто, Бугарија - 32 отсто,  Србија -31 отсто, а во Босна и Херцеговина и во Албанија Интернет корисници се само 16 отсто од населението.

Според податоците на (IWC), околу 1,6 милијарди луѓе во светот ја користат глобалната мрежа, сметано до крајот на 2008 година. Водечки земји во светот се Исланд со 86,3 отсто корисници на Интернет и Канада со 84,3 отсто.

Дремељ потврди дека наскоро планираат спојување на Космофон и на Он.нет во една компанија, бидејќи нивното работење како одвоени субјекти би било многу скапо

Телеком Словенија вчера и официјално го презеде управувањето во Космофон и во Германос, двете компании што пред еден месец ги купи од грчки ОТЕ за 190 милиони евра. Генералното собрание на Космофон го именуваше новиот Борд на директори со кој ќе претседава Душан Митиќ, а за членови се назначени Филип Огрис Мартиќ, Боштјан Краљ кој ќе биде и прв човек на Германос, Дејан Калеников и Оливие Понсин кој е именуван за генерален директор на Космофон. Бојан Дремељ, претседателот на Бордот на директори на Телеком Словенија, не откривајќи многу за идните планови во двете компании, рече дека Космофон и Германос наскоро ќе претрпат промена на брендовите и имињата, но дека тоа не треба да ги загрижува вработените.
- Не дојдовме за да го стесниме работењето, бидејќи наша намера е целата сила да ја посветиме на растот и да станеме прв телекомуникациски оператор во Македонија кој на корисниците ќе им нуди сеопфатни услуги - додаде Дремељ.

Телеком Словенија во Македонија е присутен од март 2006 година кога влезе во интернет провајдерот Он.нет. Дремељ го потврди пишувањето на ВЕЧЕР дека во догледно време планираат да направат спојување на Космофон и Он.нет во една компанија, бидејќи нивното работење како одвоени правни субјекти би било многу скапо.
- За да дојдеме до тој чин потребни се подготовки и темелна анализа. Претходно ќе донесеме нови услуги, ќе пренесеме одредени знаења, но свесни сме дека тука постои огромно знаење и резултати што ни ги оставаат нашите претходници - потенцира Дремељ.

Приоритетите на Телеком Словенија во земјава најмногу ќе се фокусираат на искористување на бенефитите што произлегуваат од трговските, оперативните и инфраструктурните врски меѓу Он.нет, Космофон и Германос, а преку составување на сеопфатна понуда за македонскиот корисник. Дремељ најави дека и покрај светската криза ќе продолжат со вложувања во развој на бизнисот во Македонија. Тој најави дека 30 милиони евра ќе инвестираат во дигиталната телевизија за која од неодамна Агенцијата за електронски комуникации им издаде лиценца за работа. За него, македонскиот телекомуникациски пазар е интересен со добри потенцијали за развој.
- Правната рамка е добро поставена, но постојат многу нешта да се стават во функција од регулаторен аспект. Очекувам дека тоа ќе се развие со проближувањето на Македонија во ЕУ. Засега очекувам фер услови на работење, подеднаков третман и добра соработка со регулаторните органи - рече Дремељ.

Првиот човек на Космофон, Оливие Понсин не обелодени дали нивниот влез ќе значи и пониски цени на услугите, само најави дека корисниците можат да очекуваат фер цени.