Споменик Филип II - Битола

БИТОЛА - Политиката го спречила коњаникот Филип Втори да дојава на градскиот плоштад „Магнолија“ во Битола. Овој факт, конечно, го призна градоначалникот на Битола, Владимир Талески. Иако една и пол година откако споменикот Филип Втори е сместен во дворот на Општината, Талески убедуваше дека неговото непоставување е од технички причини. Опозицијата побара одговорност од Талески за потрошените над 350.000 евра за изградба на овој споменик во Битола.

Градоначалникот Владимир Талески, најверојатно, попушти на притисокот на јавноста и на медиумите и ги отвори картите дека политичките односи со соседна Грција биле причината да не биде поставен споменикот посветен на античкиот крал Филип Втори во центарот на Битола, иако споменичниот комплекс од над 100 м2 пред Градскиот часовник е веќе изграден. Сепак, Талески, во свој стил, вината за оваа ситуација ја префрли и на новинарите.

„Досега не беше тоа причината зошто споменикот на Филип Втори не е поставен на ’Магнолија‘, имавме технички проблем. Но, самото тематизирање на овој случај од медиумите, кои се разбира се најголемата сила во секоја држава, поставувањето на споменикот и навистина стана политичко прашање. Знаеме дека до шестиот месец од оваа година треба да се одлучува за важни прашања за Република Македонија. Затоа, не би сакале од тој аспект да го нарушиме процесот што е веќе започнат“, изјави Талески.

По оваа искреност на градоначалникот, остана да виси и прашањето дали воопшто коњаникот Филип Втори ќе биде поставен на градскиот плоштад „Магнолија“ во Битола. Талески наедно најави дека ќе ја преиспита целата ситуација иако тој лично би сакал Битола да има споменик на античкиот крал Филип Втори како дел од нашата историја. По ваквите изјави на Талески, не само што остана вчудовидена битолската опозиција туку и најголем дел од битолската јавност. Особено што Талески со месеци ги убедуваше граѓаните дека се' додека не се направи перфектна музика на фонтаната, која е дел од споменичниот комплекс, споменикот на Филип Втори нема да биде поставен. Опозицијата јавно го постави прашањето до Талески што стана со потрошените стотици илјади евра од буџетот на Општината за изградба на овој споменик.

„Сто илјади евра од парите на битолчани потрошивте само за скулптурата на Филип Втори и 250.000 евра за партерното уредување. Ако потрошивте 350.000 евра и, на крај, не добивте резултати, тоа значи дека не сте ја завршиле работата како што треба и дека некој треба да ја понесе одговорноста за бесцелно потрошените пари на граѓаните. Зошто се направи толку лоша политичка процена, а во исто време се заборави на загинатите бранители од Битола, кои цели девет години останаа без споменик“, обвини Валентин Груевски, лидер на ЛДП во Битола. Битолската опозиција уште го обвини Талески дека направил и уште една сериозна грешка со тоа што со своето име и презиме се потпишал на постаментот каде што требаше да стои коњаникот на Филип Втори. „Сте поставиле плоча на постаментот на која сте се потпишале со целото ваше име и презиме. Ве прашувам дали вие сте заслужен за овој споменик и дали сте дале денар од вашите пари за изградба на Филип Втори или, пак, тоа се пари потрошени од граѓаните на Битола“, праша Борис Чоревски од СДСМ. Градоначалникот не му одговори на прашањето.

Инаку, споменичниот комплекс во најголем дел е завршен. Изградена е фонтана со музички и светлосни елементи, а околу неа се поставени штитови и копја. Подигнат е и постамент од мермер. Единствено се чекаше да биде поставен и коњаникот Филип Втори, кој од ноември 2008 година стои покриен со церада зад општинската зграда на отворено, каде што вработените од Општината околу него ги паркираат своите автомобили. Коњаникот Филип Втори е претставен со прстот вперен кон народот. Од плоштадот „Магнолија“ требаше да се гледа по должина на целиот Широк сокак. (А.Б.)