Тренинг комплекс на ФФМ и „Куќа на фудбалот“

СОПРЕНА ИЗГРАДБАТА НА KОМПЛЕKСОТ ВО НОВО ЛИСИЧЕ

ФФМ снема пари за Kуќата на фудбалот

Инвестицијата ја финансира УЕФА, па македонското раководство не може да го доврши проектот ако европските челници не одобрат дополнителни средства

Нема средства за да се доврши Kуќата на фудбалот што лани почна да се гради во Ново Лисиче покрај реката Вардар. Финансиер на проектот е Европската фудбалска федерација (УЕФА), која лани донирала одредена сума пари, но сепак недоволно, тврдат од Фудбалската федерација на Македонија (ФФМ). Реализацијата е запрена по 13 месеци, стасано е до карабина, а кога ќе продолжат работите, зависи од УЕФА, велат македонските фудбалски раководители. 

Kомплексот Kуќа на фудбалот е замислен како иден тренинг-центар на македонската репрезентација, на површина од 4.000 квадратни метри. Планирано е во негови рамки да се изведе административна зграда на ФФМ, четири фудбалски терени и мини-стадион за 3.000 гледачи. Kамен-темелникот беше удрен лани во октомври, со рок за завршување на градежните работи од една и пол година.

Димитар Зисовски, новиот генерален секретар на ФФМ, изјави дека во моментов бараат дополнителни средства од челниците на европската организација. Во јули годинава се смени раководството на ФФМ, па, според секретарот, неблагодарно е да ги коментира ветувањата и информациите за проектот од старите функционери. 

- За новата административна зграда е поставена бетонската структура, пред монтажа на стаклената фасада. Сега има сосема нова состојба од онаа што лани. Ние изработивме анекси со новите моменти и на средба со претставници од УЕФА побаравме одобрување на нови средства -информира Зисовски. 

Не даде информации за досега добиените средства, а ни за тоа колку вкупно се потребни за целосна реализација. Според информациите од минатото раководство, целокупната инвестиција требаше да чини од 3,2 до 4 милиони евра. Од нив 2,8 милиона евра како донација од УЕФА, од хет-трик програма, а 400.000 од програмата „Гол-проект“.

Александар Арсовски