Коридор 8

Во железничка инфраструктура Коридорот 8 да биде приоритетен на листата за реализација

Владата ветува и дека ќе се ангажира за подобрување на квалитетот на железничката инфраструктура преку натамошните инвестиции во изградбата на пругата Куманово-Бељаковце-Крива Паланка-Деве Баир, продолжување на ремонтот на Ногаевци-Неготино, заедничка гранична железничка станица Табановце.

Се планира изработка на проектна техничка документација за електрифиција на пругата Скопје–Скопје Север–Ѓорче Петров–Волково-Блаце и заеднички железнички граничен премин со Република Косово и за нова пруга Миладиновци-аеродром Петровец, изработка на целосна техничка документација Кичево-Охрид-Струга и Кичево до Лин, Албанија, подготовка на проектна техничка документација за реконструкција, рехабилитација на железничката пруга Скопје – Кичево како дел од Коридорот 8, изработка на пилот-проект за кракот Зелениково – Драчево – Лисиче – Пинтија – 11 Октомври – Скопје Патничка.

Професорот на Катедрата за железници на Градежниот факултет при УКИМ, д-р Златко Зафировски, за МИА изјави дека е од голема важност Коридорот 8 да биде приоритетен на листата за реализација.

Во минатото, вели Зафировски, железничкиот транспорт имаше доминантна монополска улога во однос на другите видови транспорт. Железничкиот транспорт се уште располага со многу поголеми превозни капацитети. РС Македонија нема излез на море, па стоките и во внатрешниот и во надворешниот транспорт се превезуваат во најголем дел со железничкиот транспорт. Нашата држава како центар на Балканот има голема улога во меѓународниот транспорт (особено на стока), кој е предусловен со постоењето на добра транспортна инфраструктура, укажува професор Зафировски.

Железничкиот коридор 8 е еден од десетте паневропски коридори кои поминуваат и низ територијата на РС Македонија. Трасата започнува од пристаништата Бари и Бриндизи во Италија и поминува низ Албанија, РС Македонија и Република Бугарија, сукцесивно поврзувајќи ги градовите: Бари / Бриндизи – Драч / Валона (Јадранско Море) – Тирана – Скопје – Софија – Пловдив – Бургас – Варна (Црно море).

Оттука, потенцира Зафировски, од голема важност е овој коридор да биде приоритетен на листата за реализација. Проектната документација е готова за цел Коридор 8, па како резултат на тоа, веќе е распишан тендер за изградба на втората делница кон Р. Бугарија, а по неа би требало да следи и за третата делница, согласно најавената стратегија за реализација на проекти од железничката инфраструктутра.

-Проектната документација од Кичево до Лин, исто така е завршена на ниво на Основен проект. Но за почеток на реализација, веројатно ќе се почека да заврши изградбата на автопатот Кичево – Охрид, па потоа би се одело на стартување на реализација. Не помалку е важно да се направи целосна реконструкција на делницата Скопје – Тетово – Гостивар – Кичево, инаку се губи смислата на инвестицијата на делницата од Кичево до Струга (Охрид), објаснува професор Зафировски.

Како што дополнува, неопходно е да се направи физибилити студија за поврзувањето на Меѓународниот Аеродром Скопје со железничката и автобуската станица во Скопје. Постојниот автобуски превоз до аеродромот не е ни оддалеку доволен, а ваква иницијатива смета дека секако би била поддржана и од ТАВ и од Владата.

-Железничкиот транспорт има значајна улога во секоја национална економија. Една држава е економски јака само ако има добра транспортна инфраструктура.Ја поддржувам секоја програма за реализација на проекти поврзани со железничката инфраструктура. Сакам да потенцирам дека ние како професионалци и експерти на Градежниот факултет при Катедрата за железници, постојано ги следиме и новите трендови во оваа област, и во секое време стоиме на располагање за секаков вид на консултации и соработка во врска со модернизација на железниците кај нас, за конечно да имаме железничка пруга налик на европските, изјави за МИА Зафировски.

Во областа на воздухопловниот сообраќај, пак, според плановите на Владата, ќе се креира нова, функционална и одржлива национална стратегија за негов развој.

По завршување на ковид кризата, се ветува дека ќе бидат воведени нови дестинации за зголемување на бројот на летовите, пораст на бројот на патниците, зголемување на нивото на безбедноста и овозможување на ефикасен, уреден, безбеден и еколошки одржлив воздухопловен транспортен систем достапен под еднакви услови за сите.

https://www.24.mk/details/izgradba-no-i-redovno-odrzhuvanje-na-patishtata-so-voveduvanje-novi-tekhnologii

Државата и германската „Вибе“ преку арбитража ќе го решаваат спорот со недоградената пруга Куманово-Бељаковце

Спорот меѓу државата и германската компанија „Вибе“ околу недоградената пруга Куманово-Бељаковце ќе се решава пред меѓународен суд. Министерот за транспорт и врски Благој Бочварски денеска најави дека преку арбитража ќе се решава прекинот со изградба откако фирмата-изведувач „Вибе“ на 29 мај годинава го известила Јавното претпријатие за железничка инфраструктура Железници на РСМ дека бара раскинување на договорот за изведба на пругата долга 30,8 километри.

Министерот Бочварски изјави дека ќе се почека одлуката од арбитражата во однос на раскинатиот договор, но и појасни дека ќе се оди со распишување на нов тендер за довршување на изградбата на оваа железничка делница во 2021 година. Тој појасни дека нискиот степен на реализација на капиталните инвестиции во Министерството за транспорт и врски, којшто заклучно со август изнесува 31,6 отсто, е резултат токму на потфрлувањата што се случуваат на Коридорот 8 за железничко поврзување со Бугарија.

Со претстојниот ребаланс на државниот буџет, најмногу кратења на средства ќе има токму во делот на железничкиот Коридор 8, бидејќи средствата не можат да се реализираат поради тоа што досегашниот изведувач го раскина договорот за пругата Куманово-Бељаковце.

Министерот Благој Бочварски изјави дека е недозволиво пругата кон Бугарија да се гради две и пол децении, како и дека не смееме во иднина да дозволиме да ни се случат слични работи како што е застојот со изградбата на пругата Куманово-Бељаковце. Во делот на развојот на железничката инфраструктура, тој потенцираше дека во неговиот четиригодишен мандат ќе започне со реализација на втората и третата фаза од проектот за железничко поврзување со Бугарија, односно изградбата на железничките делници Бељаковце-Крива Паланка и Крива Паланка-Деве Баир.

Инаку, „Мета.мк“ веќе две недели чека одговор од Јавното претпријатие за железничка инфраструктура Железници на РСМ за тоа до каде е стигната тендерската постапка за избор на изведувач што треба да ја гради делницата од Бељаковце до Крива Паланка, како втора фаза од пругата кон Бугарија. Вториот по ред тендер беше распишан во 2018 година, а требаше токму до есенва да се избере градежната компанија што ќе ја гради делницата долга 33,9 километри. Меѓународниот тендер е стигнат до втората фаза од изборот на најповолен понудувач, при што за изведба на проектот вреден над 140 милиони евра се борат осум компании.

Покрај тоа што од Јавното претпријатие за железничка инфраструктура како инвеститор молчат за поставените прашања, од Министерството за транспорт и врски за потрага по било какви информации во однос на резултатите од тендерската постапка упатуваат токму до инвеститорот. Пругата Бељаковце-Крива Паланка треба да биде завршена со изградба во рок од 48 месеци од воведувањето во работа на идниот изведувач.

„Мета.мк“ со месеци наназад го следи процесот на изведба на железничкиот Коридор 8 во земјава, а месецов објави и детално објаснување за причините на застојот и до каде е стигнато со изградба на пругата Куманово-Бељаковце.

https://meta.mk/drzhavata-i-germanskata-vibe-preku-arbitrazha-kje-go-reshavaat-sporot-so-nedogradenata-pruga-kumanovo-beljakovcze/

Пругата наречена надеж



https://irl.mk/prugata-narechena-nadezh/

Да, да, ја направија до Бељаковце, сега ќе ја прават и до Албанија. Кај и да е, до 2100-та ќе ја изградат.

Ќе има ли пруга од Кичево до Албанија? – Владата даде зелено светло, МЖ-инфраструктура бара пари



https://tv21.tv/mk/ke-ima-li-pruga-od-kichevo-do-albanija-vladata-dade-zeleno-svetlo-mzh-infrastruktura-bara-pari/

Поништен тендерот за изградба на пругата Бељаковце-Крива Паланка, ќе се распишува нов

Владата се одлучи да го поништи тендерот за избор на изведувач за изградба на втората фаза од проектот за железничко поврзување меѓу Северна Македонија и Бугарија. За изградба на пругата долга 34 километри меѓу Бељаковце и Крива Паланка од Коридорот 8 ќе се распишува трет по ред тендер за пронаоѓање на најповолен понудувач, но овој пат ќе се бара градежна компанија што ќе ја заврши целата траса од Куманово до Крива Паланка, односно во пакет ќе се тендерира првата и втората фаза од проектот.

„Владата на Република Северна Македонија на Седницата одржана нa 4.10.2020 година, ја зема во предвид ново настаната состојба што се појави во реализација на изградбата на пругата на Коридор 8, фаза 1 Куманово-Бељаковце поради еднострано раскинување на Договорот со изведувачот. Заради огромното значење на изградба на Коридор 8, како и потребата од ефикасност во изградбата на пругата, се одлучи да се поништи тековната постапка за избор на Изведувач за изградба на фаза 2, Бељаковце-Крива Паланка и повторно да се реобјави јавниот повик со тоа во јавниот повик се прецизира изградба на Фаза 1 и Фаза 2, односно планирана изградба на двете фази од еден ист изведувач“, велат за „Мета.мк“ од Министерството за транспорт и врски.

Инаку, изградбата на пругата меѓу Бељаковце и Крива Паланка претставува втор по големина инфраструктурен проект во моментов во земјава, со проектирана вредност од 147 милиони евра. До крајот на годинава, требаше да се избере изведувач за втората фаза од изградбата на пругата кон Бугарија и градежните работи да отпочнат на терен. Првиот тендер за избор на изведувач беше распишан кон крајот на мај 2016 година, но истиот пропадна. Кон средината на 2018 година, беше распишан вториот по ред тендер за пругата Бељаковце-Крива Паланка, постапката стигна до втората фаза во која влегоа осум компании со своите понуди, но владата се одлучи да го поништи меѓународниот тендер.

Од Министерството за транспорт и врски велат дека во моментов надзорниот орган интензивно работи на правење на пресек во колкав обем е реализиран договорот за изградба на делницата Куманово-Бељаковце. Откако ова ќе се прецизира, ќе се дефинираат новите количини на работи кои преостануваат да се сработат. Потоа, ќе следи подготовка на тендерската документација, која треба да се координира во соработка со Европската банка за обнова и развој (ЕБОР). По одобрување од ЕБОР, веднаш ќе се објави јавниот повик за двете фази што ќе треба да се градат во пакет од Куманово до Крива Паланка.

Европската комисија (ЕК) пак во најновиот Извештај за напредокот на нашата земја на патот кон ЕУ упати критики за доцнењето на изведбата на железничкиот Коридор 8, за кој самата ЕУ обезбеди неповратни средства за земјава за реализација на втората и на третата фаза од проектот во висина од околу 130 милиони евра.

„Изградбата на железничкиот Коридор 8 кон Бугарија се соочува со значителни доцнења со завршени само 28 отсто. Ова ќе има сериозни последици за отворање на последниот дел од коридорот „Ориент/Источен-Медитеран“. Потребен е сериозен напор за да се забрза напредокот во сите фази на овој коридор“, се нотира во Извештајот на ЕК.

https://meta.mk/ponishten-tenderot-za-izgradba-na-prugata-beljakovcze-kriva-palanka-kje-se-raspishuva-nov/

Да ги викнат господа господа Стефан и Неофит на помош? 76 години се гради пругава, а згора на тоа во 2020 ја прават едноколосечна со vmax од 80 (или 100?) km/h. Па на Марс ќе испратат туристи пред пругава да бидне.

Очигледно си го видел теренот и сфаќаш дека треба тунел, ама дали си видел дека моменталниот каков и да е пат поминува низ самиот рудник „Саса“, а од другата страна „Тораница“, односно низ самите јаловински езера.

Инаку, зафатов би чинел гарант минимум милијарда евра, што нели првин треба да се види оправданоста на се, дури и да живееш во Норвешка и парите да ти доаѓаат сами.

Готова пред-физибилити студијата за пругата Скопје-Кичево и најдолгиот тунел на Балканот

Ангажираните консултанти минатиот месец до Министерството за транспорт и врски го доставија целиот сет од пред-физибилити студијата за пругата Скопје-Кичево на Коридорот 8 во финална верзија која е одобрена од сите инволвирани страни. Станува збор за првиот документ од низата што ќе следат во функција на зголемување на брзината и подобрување на безбедноста на оваа железничка делница во согласност со стандардите на ЕУ. Документот е подготвен со средства од Инвестициската рамка за Западен Балкан (ВБИФ) на ЕУ.

„Пред-физибилити студијата дава осврт на состојбата на пругата во овој момент, земајќи ги во анализа сите објекти што се наоѓаат по трасата, од мостови, тунели, згради, уреди за сигнализација и други објекти. Исто така, дава опции за идно подобрување на целата инфраструктура“, информираат за „Мета.мк“ од Министерството за транспорт и врски.

Пругата од скопската населба Ѓорче Петров до Кичево е со должина од 102,6 километри и е изградена во 60-тите години на минатиот век, а пуштена е во употреба во периодот 1968-1969 година. На овој импозантен проект од времето на Југославија се наоѓа и најдолгиот тунел на Балканскиот Полуостров – тунелот „Буковиќ“ долг над 7 километри (7.062 метри) и највисокиот железнички вијадукт во земјава – Србиновски мост, и двата лоцирани на пругата меѓу Гостивар и Кичево.

По изготвувањето на пред-физибилити студијата, треба да следи изработка на детална студија за изводливост на проектот за реконструкција на пругата Скопје-Кичево, со анализа на трошоци и придобивки, како и студија за влијание на проектот врз животната средина. Дополнителни средства ќе бидат потребни и за подготовка на идејниот и основниот проект.

Последен пат оваа железничка линија беше реконструирана неколку години по воениот конфликт во 2001 година во земјава, кога беше оспособена за одвивање сообраќај. Официјално, максималната брзина на движење на возовите е 100 километри на час меѓу Скопје и Гостивар, како и 80 километри на час во делот меѓу Гостивар и Кичево. Сепак, поради недоволните средства за одржување и природните непогоди, брзините на движење на одредени нејзини делови се помали.

Покрај обновата на самата пруга, недостасуваат и современи сигнални уреди, како и електрификација на едноколосечната пруга, како би можело во иднина да се оствари железничкото поврзување меѓу Македонија и Албанија преку нејзино продолжување во правец кон албанскиот град Лин.

Пругата Скопје-Кичево денеска е со потпросечна искористеност на нејзините капацитети, со функционирање на само еден пар патнички возови дневно меѓу двата града. Податоците за возните километри пак во товарниот сообраќај за третиот квартал од 2020 година, покажуваат дека само 1 отсто од нив се реализирале на пругата Ѓорче Петров-Кичево, се наведува во Кварталниот извештај на ЈП за железничка инфраструктура Железници на РСМ.

https://meta.mk/gotova-pred-fizibiliti-studijata-za-prugata-skopje-kichevo-i-najdolgiot-tunel-na-balkanot/