Битолски сообраќај (општо)

Улиците плачат за крпен живот

Граѓаните на Битола се жалат дека во големиот број дупки ги кршат возилата, а локалната власт дека тие се последица на зимата и оти наскоро ќе ги санираат

Дупки зинаа низ битолските улици по зимата, која беше со обилни врнежи од снег и дожд, поради што беа истурени големи количини сол и ризла. Возачите реагираат дека освен неколку поглавни сообраќајници, кои се во солидна состојба, низ другите поради распуканиот асфалт мора да возат слалом и да ги избегнат ударните дупки.

- На секој метар има или дупка или крпеница. Зијан имаат амортизерите, споните, паѓаат зглобови... Можеш и гума да скинеш, а потребно е почесто балансирање на тркалата. Ако едно возило по европските патишта може да помине 200 илјади километри, кај нас ќе издржи многу помалку поради ваквите патишта - реагираат битолчани.

Лошата состојба на градските улици најмногу по џеб ги удира таксистите што по цел ден со автомобилите кружат низ сообраќајниците.

- Ех, се гордееме со градска Битола, а низ улиците дупки зинати и со пречник од метар. Ортаклак врзавме со механиничарите. Половина од годишната заработувачка ни завршува кај нив. На градот му е потребна инфраструктура, преасфалтирани, а не крпени улици - велат таксистите.

Критика за патната инфраструктура упати и локалната опозиција. Советникот од СДСМ, Златко Ќурчиевски, иронично му порача на градоначалникот Владимир Талески следниот пат кога премиерот Никола Груевски ќе ја посети Битола, да не го шета само низ улицата врз која е ставена ладна асфалтна база, туку и низ другите за кои рече дека се во очајна и катастрофална состојба.

- Во општина Битола се' уште постои турска калдрма. Веќе сте пет години на власт, поминавте еден манадат, добивте реизбор - обвини Ќурчиевски.

Во сличен стил забелешки упати и Борис Чоревски, исто така советник од СДСМ. Рече сите советници да се фатат за рака и да излезат да прошетаат низ улиците да видат во каква очајна состојба е градот.

- Да се одделат средства за крпење на дупките, да не прска водата по пешаците кога низ улиците минуваат автомобили - рече Чоревски.

Градоначалникот Талески признава дека зимата предизвикала поголеми оштетувања на патиштата, но досега не можеле да ги санираат поради лошите временски услови. Тоа ќе се случи со пролетната санација.

- Оваа зима имавме многу снег, многу вода и факт е дека голем дел од улиците се во ситуација во која инвестициите овој пат ќе бидат поголеми од претходните години. Ние одиме на целосно санирање на улиците, а помалиот дел ги санираме онолку колку што е можно за да издржат колку една сезона, да не трошиме многу пари- вели Талески.

Според него, штом се создадат услови екипи на „Нискоградба“ ќе излезат на терен и ветува дека голем дел од улиците ќе бидат реконструирани. За турската калдрма вината ја префрлува на претходните градски власти.

- СДСМ во претходните мандати над турската калдрма стави еден и пол прст асфалт и еве го сега цел асфалт испукан. Јас за тоа не сум виновен, јас тогаш не бев градоначалник. Ако сакате ќе ви набројам улици каде што ѕирка турската калдрма, каде што се стави асфалт, без менување на подземната инфраструктурата, водоводните цевки, одводна канализација, ниту тампониралениту ја извадиле калдрмата - врати Талески.

http://dnevnik.com.mk/?ItemID=82658DB05E50BF4B9819FF678FDE99A5