Битолскиот пазар нема пари за ХАЦЦП

Вести - Битола

Истекоа роковите за спроведување на стандардите, па можно е затворање на сирењарата и забрана за продажба на јајца на отворено. Затворање на халата за продажба на сирење и можна забрана за продажба на јајца на отворено му се заканува на битолското градско пазариште. До мај годинава истекува рокот што Министерството за земјоделство му го остави на јавното претпријатие „Пазари“ од Битола, да ја почне постапката за воведување на ХАЦЦП стандардите. Но, досега пропишаните правила за безбедна храна не почнеле да се имплементираат. Фирмата се соочува со финансиски проблеми - загуба од 700 илјади денари, па од таму признаваат дека немаат пари за комплетно да го спроведат системот. Ваквите состојби предизвикаа паника кај стотина продавачи на сирење и јајца во битолскиот пазар дека ќе останат без продажбен простор.

- Зошто кај нас да се затвори? Ние плаќаме паушал, па нека воведат услови. Во Битола барем сме во хала, а во другите градови луѓето продаваат сирење од автомобил. Каков ХАЦЦП, од канти на земја продаваат. Вака го вадам лебот откако ме отпуштија од фабрика како технолошки вишок. Со вакви закони ќе остане само индустриското производство, а традиционалното што се негувало сто и повеќе години ќе замре - вели Драги Стојчевски, произведувач на домашно сирење.
Новите стандарди од нив бараат да регистрираат фирма, да постават декларации на производите и да ги продаваат пакувани.
- И да се регистрираме дали ќе може да се издржи. За тезгата плаќаме 4.200 денари месечно, а толку не вадиме. Најверојатно ќе си одиме сите и ќе станеме социјалци. Порано беше друго, се трошеше, народот имаше повеќе пари, сега е се' катастрофа. Земаа цели канти, а сега по половина килограм. Цената на сирењето е иста со години, а потрошувачката е намалена за педесет отсто - се пожали Зоран Јовановски. 
Уредувањето на халата за сирење според ХАЦЦП системот предвидува замена на корозираните тезги со нови, инсталирање топла вода, вентилација, клима. Да се изгради халата за јајца, градски тоалет во пазарот и ред други работи. Дел од купувачите велат дека со ХАЦЦП стандардите барем ќе знаеме што јадеме. 
- Да поминете низ пазар, што се' не се продава по земја, зеленчук, јајца, живина исполегната до храната. Дел не плаќаат паушал, па влегуваат на диво и производите ги изложуваат на земја. Сите велат дека е здраво, природно, домашно, а дел од она што ќе го купите не го задоволува квалитетот. Нека се изложи каде е произведено, увозно е или наше - реагираат купувачите. 
Случајно или не, пред еден месец оставка од директорката функција во ЈП „Пазари“ даде Лазар Ивановски, а за в.д беше поставена Весела Петровска. Таа признава дека доцнат со ХАЦЦП и не ја исклучува можноста да им ги затворат местата каде што се продаваат сирењето и јајцата. 
- Само за промена на тезгите во халата за сирење ќе ни бидат потребни 400 илјади денари, а комплетно за целиот процес околу еден милион денари. Од каде да ги најдеме одеднаш овие пари? Ние ќе се обидеме со сите сили деновиве да почнеме со делумно воведување на стандардите, но не и за целосно - вели Петровска.

 http://bitolainfo.com/index.php?option=com_content&view=article&id=1035:2010-04-25-06-25-40&catid=1:novosti&Itemid=41