Отворен турскиот културен центар „Јунуз Емре “во Скопје

Културниот центар „Јунуз Емре“во Скопје денеска свечено беше отворен во присуство на повеќе важни личности од Македонија и Турција.

Културниот центар ќе има за цел да ги развива и продлабочи пријателските и меѓукултурните односи меѓу Турција и Македонија преку различни проекти, културни активности  и курсеви, со што ќе ја афирмира меѓусебната култура уметност и историја.

„Со отворањето на овој центар ќе се придонесе за подобро запознавање на турскиот и македонскиот јазик како и запознавање на културата и религијата на двете земји, “изјави турскиот министер за надворешни работи Ахмет Давутоглу.

Министерката за култура на Македонија, Елизабета Канчевска Милевска изјави дека со отворањето на овој центар ќе се зајакне соработката во полето на културата.

„Вистинските придонеси се градат врз ова и токму заради тоа владата на Македонија и министерството за култура со изградба на новиот турски театар, со промоција на Куршумли Ан како турски културен центар обновата на спомен домот на родителите на Ќемал Ататурк и отворањето на овој центар демонстрираме силна културна политика во развојот и негувањето на културно поле„ изјави Канчевска Милевска  на денешното свечено отворање.

СО НАД 80 МИЛИОНИ ДЕНАРИ ОД МИНИСТЕРСТВОТО ЗА КУЛТУРА И ОД ДОНАТОРИ

Македонска опера и балет доби европски лик

Големите инвестиции во културата последниве години ја опфатија и Македонската опера и балет. Повеќе од 80 милиони денари од буџетот на Министерството за култура и од донатори се вложени во целосна и темелна реконструкција на објектот. Министерката за култура ја посети реновираната МОБ

Со инвестиции во износ од 73 милиони денари од буџетот на Министерството за култура и уште 10 милиони денари од донации, во последниве три години целосно е обновен објектот на Македонската опера и балет, соопштија министерката за култура Елизабета Канческа-Милевска и директорот на МОБ, Оливер Арсовски.

Со овие средства целосно е променета сценската технологија и механика, целосно е санирана покривната конструкција и фасадата, како и санитарните јазли, а реновирани се и работните простории на вработените - и гримиорните и канцеларискиот простор, фоајето, оркестарската школка... Направена е и посебна билетарница која е достапна за сите граѓани и уредена е салата Империјал во која веќе се одржуваат камерни концерти. Во моментов во процедура е реновирањето на т.н. Летно фоаје (поранешната дискотека) што се одвива со финансиска помош од Општина Центар, а во план и преговори е обновата на салонот за публика, односно целосна промена на столчињата и подната подлога, со што ќе може да се каже дека објектот на МОБ е целосно обновен.

Сите овие интервенции за подобрување на уловите за работа, според директорот на МОБ Арсовски, доведоа до подобри резултати на уметниците што се огледува во се поголемата посетеност на оперските и балетските претстави.
-Балетот повеќе не игра на музика снимена на ЦД, како што се практикуваше со години наназад, туку соработува со оркестарот - нагласи Арсовски.

Министерката за култура Елизабета Канческа - Милеска која ја посети МОБ посочи дека сите овие инвестиции се како за подобрување на условите за работа и статусот на уметниците, меѓу кои и решеното трајно вработување на 150 уметници кои со години работеа во МОБ со договор за дело, така и за поквалитетна уметничка понуда за публиката која во последно време може да види и слушне далеку поквалитетни гостувачки уметници и на редовниот репертоар, а не само во посебни пригоди какви што се Мајските оперски вечери.

Инаку, директорот Арсовски најави дека оваа традиционална оперска манифестација годинава ќе биде отворена со премиерна изведба.

http://www.vecer.com.mk/?ItemID=DF1FC498CF9A8D4BAA6CFEB93CE7A90D

Прилепскиот театар се реновира по 40 години

Дарко Штаргоски	Коментари (0)

„Војдан Чернодрински“

Актерите од Прилепскиот театар конечно ќе добијат услови за работа достојни за нивната професија. За прв пат по 40 години, а во пресрет на театарскиот фестивал „Војдан Чернодрински“ и 60 годишнината од постоењето на Прилепскиот театар, се реновираат просториите за работа и вежби на актерите.

До сега тие работеа во крајно мизерни услови, во простории со руинирани тавани, искршени прозори, мувлосани ѕидови, слика недостојна за никого, а посебно за уметноста.

„Просториите во кои работеа актерите, кои и сами ги видовте и ги снимивте, беа во една крајно лоша состојба.

-На мое лично негодување и жалост морав да гледам во какви услови работат актерите, но сега тоа се измени и ние како куќа се погриживме да добиеме средства за тоа да се подобри“, изјави Тони Чатлески, Директор на Центарот за култура „Марко Цепенков“ - Прилеп.

Инвестицијата ќе чини над 20 илјади евра. Од театарот се надеваат дека во иднина ќе се реализира и долгонајавуваната идеја за изградба на нов театар во Прилеп, а се очекуваат и пет нови вработувања, затоа што сега Прилеп има само 11 вработени актери.

Во Даут-пашин амам почнува борба со влагата

Со задоцнет старт денеска почнува санацијата на објектот од 15 век

Катерина Богоева

Хроничниот проблем со влагата во објектот Даут-пашин амам на Националната галерија на Македонија, каде што се наоѓа и вредната колекција на уметнички дела од националната поставка, денеска ќе почне да се решава со користење на средствата од американската донација што во висина од 54 илјади американски долари на галеријата и' беа доделени минатата година. „Ќе почнеме со исколчување на просторот и со отворање на планираниот дренажен канал“, изјави вчера конзерваторот, стручен советник Лазар Шуманов, кој ќе го врши потребниот надзор на работите, додека истите ќе ги изведуваат, фирмата „Металелектрик“ Миодраг ДООЕЛ - Скопје и Конзерваторскиот центар - Скопје.

Минатата година беа отворени и се' уште се видливите сонди, поради детектирање на патот по кој се движи влагата во монументалниот објект изграден во втората половина на 15 век, а во наредниот период ќе се работи и на системот за дренажно одведување на подземните води. Ќе се заменува оштетениот и лошо изведена покривен покривач од бакарен лим чии делови во изминатите години во неколку наврати беа и мета на крадците на бакар, а планирано е поставување на вертикални и на хоризонтални олуци. Во ѕидовите на фасадата ќе бидат инјектирани потребните средства за заштита, а Конзерваторскиот центар ќе работи на санација на куполите во двете централни простории. Планирано е изработување на нови прозорски крила и др. Поради одржувањето на летните културни настани, на објектот најпрво ќе се интервенира странично, за влезот да остане слободен. Интервенциите со користење на американскиот грант, како што посочуваат од Националната галерија треба да завршат до крајот на оваа година, но тоа е само дел од целосната, неопходна заштита која е елаборирана во веќе изготвен проект за што ќе бидат потребни многу повеќе средства. „Годинава повторно ќе аплицираме за средства во американската амбасада, бидејќи и тие знаат дека доделените средства се доволни само за оваа првата фаза од потребната санација на влагата. Очекуваме и во 2011 година повторно од нив да добиеме грант што ќе му овозможи на објектот потрајна заштита од влага, најмалку десет години“, изјави вчера директорката на Националната галерија, Маја Крстевска. Проблемот со влагата во Даут-пашин амам трае со децении, а на него со години наназад, укажуваа повеќе стручни лица не само од земјава, туку и од странство. Иако во септември минатата година кога беше и доделен американскиот грант беше најавено дека работите од првата фаза ќе бидат завршени за една година, тие фактички се пролонгирани, делумно, и поради непредвиденото подолго траење на тендерската постапка. Галеријата на крајот на минатиот милениум беше реконструирана, куполите беа покриени со бакар и беа поставени олуци, но влагата остана. Кустосите што таму работат укажуваат дека таа хронично им штети на чувствителните акварели, но и на скулптурите кај кои е евидентирана црвоточина. Од влагата се рони и паѓа и оштетениот релјеф.

Амам е заштитен со закон како споменик на културата. Редизајнот на неговиот ентериер датира од 1982 и од 1999 година.