Објекти од културата (општо)

ГОДИНАВА ЌЕ БИДАТ ГОТОВИ НЕКОЛКУ КУЛТУРНИ ОБЈЕКТИ

Ќе се отворат нови музејски и театарски врати

Нови лакирани штици што живот значат, завеси без децениска прашина, гледалиште што ќе мириса на ново, услови за големи и поголеми претстави ќе има во новата зграда на Народниот театар од Велес, „Јордан Хаџиконстантинов-Џинот“, чија изградба се очекува да заврши до јуни годинава. Во групата капитални градби чија изградба треба годинава да заврши се и Музејот на македонската борба, Музејот на жртвите на комунизмот, како и Спомен-домот на Тоше Проески. По градбата во сите објекти ќе почне и внатрешното уредување и опремување со соодветни театарски елементи и музејски постановки, експонати.

Најзагреани за својот нов објект се актерите од велешкиот театар „Јордан Хаџиконстантинов-Џинот“, кои со децении работат во својата ладна, стара, дотраена зграда.

- Со нетрпение очекувам да биде завршена новата театарска зграда и да се подигне завесата. Така театарската магија да ги привлече велешани, да биде поблиска до секој жител на градот, кои и досега знаеја да уживаат во театарот. Се надевам дека тие очекувања ќе ги оправдаме - вели Слободанка Чичевска, која 30 години настапува на велешката сцена.

Можност и за опера и балет

Според најавите од раководството на „Ј.Х.-Џинот“, со новата зграда граѓаните на Велес ќе имаат можност и првпат да присуствуваат и на опери и балетски претстави во својот град.

- Новата зграда ќе има одлични и современи технички можности, која дава можност за нов концепт на репертоарската политика. На големата сцена ќе има претстави што досега не сме можеле да ги играме поради техничката ограниченост, така што ќе понудиме класика од домашни и странски автори. На малата сцена ќе го афирмираме камерниот театар, кој нам, актерите, ни е потребен како ментална хигиена. Во план ни е и куклена сцена со репертоар за деца, кој нема да биде инцидентен, туку постојано преку годината би се играле претстави за оваа публика - вели Јордан Витанов, директор на театарот „Јордан Хаџиконстантинов-Џинот“.

До средината на годинава градежните машини ќе го завршат својот дел од работата и врз музејскиот комплекс во главниот град од левата страна на Вардар. Таму на површина од 2.500 квадратни метри ќе стојат готови Музејот на македонската борба и Музеј на жртвите на комунизмот. Како што најавија од Министерството за култура, во нив ќе бидат поставени 105 восочни фигури со личности од нашата историја. Од тие фигури 40 веќе се готови, а во тек е изработката на другите 65 фигури.

- Во двата музеја ќе стојат восочни фигури на истакнати личности од македонската историја, односно на сите што оставиле трага во историјата на македонското револуционерно движење. Ќе има фигури на револуционери, борци, личности од сите струи и фракции на Внатрешната македонска револуционерна организација - најавуваат од ресорното министерство.

Вкупната површина за музејската поставка е околу 1.900 квадратни метри, од кои за Музејот на македонската борба има околу 1.270 квадратни метри, а за Музејот на жртвите на комунизмот околу 620 квадратни метри.

Во рамките на концептот на музејскиот комплекс, освен восочни фигури се најавува дека ќе има и уметнички дела со портрети од личности, како и дела на кои ќе бидат насликани масовни сцени од историјата. Заинтересирани граѓани во музеите ќе може да достават и свои зачувани експонати од револуционерното минато.

Филхармоничарите ќе почекаат до в година

До средината на идната година се очекува целосно да биде готов Македонскиот народен театар. Наскоро ќе се пристапи кон уредување на неговата фасада, ќе се поставуваат скулптури, а ќе се уредува и ентериерот, кој треба да биде во барок-стил. Во таа зграда треба да се смести ансамблот на Македонскиот народен театар.

Голем објект, кој со нетрпение го очекуваат неговите идни станари, е зградата и за Македонската филхармонија, за чија изградба е најавено дека годинава ќе се одвива со забрзано темпо. Таа ќе биде и прва вистинска филхармониска концертна сала во нашата земја, а нејзината градба треба да заврши во 2011 година. Од Филхармонија се надеваат дека тој објект ќе отвори нова страница во градењето на нашата музичка сцена и историја.

- Веројатно очекувањата на сите, и професионалните музичари и граѓаните, се големи, сите со нетрпение ја очекуваат новата сала, тоа што за нас е од особено значење е вистинскиот простор во кој конечно ќе може да работиме, настапуваме и да го покажеме нашиот квалитет. Кога ќе имаме сопствен дом, ќе можеме порелаксирано да работиме, да планираме и да направиме стратегија за комплетен развој на Македонската филхармонија. Новата сала ќе биде центар на музичките збиднувања во нашиот град. Со оглед на тоа што ќе има две сали ќе има можност и за повеќе различни видови концерти. Новиот простор ќе ни отвори можности за реализација на голем број проекти, кои веројатно со години не биле можни - вели Маја Чанаќевиќ, директорка на Македонската филхармонија.

За објектите од областа на културата, освен завршни градби, се најавени и нови градби. Така годинава треба да почне да се гради нова зграда на Турскиот театар, ќе почне реконструкцијата на Универзалната сала во Скопје, а во десетина града ќе бидат поставени и унифицирани монтажни објекти наменети за дејности од областа на културата.  (Т.О.-П.П.)