Проект „Старите касарни за нов развој“

Општините со нивните спектакуларни планови за изградба на фабрики, универзитети, трговски центри во отстапените касарни, ќе ја претворат државава во големо градилиште. Речиси сите општини со кои контактиравме велат дека од март ќе почнат тендерите за продажба на земјиштето во касарните. Потоа според планот, Министерството за транспорт и врски ќе ги продава објектите.

За инвестиции во касарните мошне загреани биле големи компании како „Веро“, „Тинекс“, „Агрокор“, „Делта“, „Туш“, како и градежните гиганти „Бетон“ и „Гранит“.

- Секако, дека ќе учествуваме на тендерите, но ако прават како во Скопје каде често пати се продава земјиштето по цена и до 30 отсто од вредноста на станот, ништо не правиме. Во некои места во Скопје, парцелите се продаваа по 1.200 евра за квадрат, што на крајот излегува дека станот треба да се продава по 3.000 евра за квадрат. Кој ќе плати толку? Во такви зделки можат да влезат само сомнителни фирми, како оние „Фиком“ и „Платина“ - предупредува директорот на „Бетон“, Трајко Трпевски.

На сличен начин резонираат и погоре спомнатите компании. Министерството за одбрана го интересира само становите за офицерите на АРМ, кои ќе се продаваат според привилегирани услови.

- Во моментов ги обработуваме податоците од анкетата меѓу припадниците на АРМ. Бројки засега нема да соопштуваме, но интересот е задоволителен. Врз основа на бројки и анализи ќе се градат службените станови во касарната Илинден во Скопје, како и во касарните во Тетово, Прилеп, Велес, Штип, Куманово и Кичево - вели Сашко Димов, портпарол на МО.


Нова Битола под Пелистер


Најимпресивен е планот на градот Битола, кој со касарната „Стив Наумов“, на располагање има дури 100 хектари земјиште, лоцирано под Пелистер. Од таму велат дека се при крај со изработката на Деталниот урбанистички план (ДУП), односно дека во моментов се работат заштитно - конзервативните работи.

- Очекуваме во март да почне продажбата на земјиштето, а потоа Министерството за транспорт и врски да ги објави тендерите. Маркици имаме предвидено за основно училиште, полициска станица, градинка, амбуланта, црква, станбена населба, понатаму 150 локации за куќи со парцели од 100 квадратни метри, хотел, два градски центри од кои еден ќе биде како мал ринг со плоштад и наоколу со мали дуќанчиња, а другиот дел ќе го земе универзитетот. Ќе се изградат и спортски терени, аква парк, филмско студио, ќе се зачува старата тврдина „Ќепане“, а кај стариот радар на АРМ ќе се направи кула со репетитори за телевизиите и ресторан, како и еден конгресен центар - објаснува Трајче Котевски од општината Битола, задолжен за проектот.
По Битола, многу амбициозен план има и општината Струмица која има на располагање 38 хектари.

- Завршивме со промената на ГУП (Генерален урбанистички план), во тек се измени во Деталниот урбанистички план. До март очекуваме да почне објавувањето на тендерите. Ќе се гради пензионерски дом, куќи, студентски град со образовен центар, НВО центар, потоа дневен центар за деца со посебни потреби, младински културен центар, а овде исто така ќе ги преместам комуналното претпријатие и пожарната. Ќе изградиме и црква. За станбени згради ќе има 55 локации. Можам да кажам дека интерес покажаа сите градежни компании од Струмица, „Адора“, „НИТ Пром“, „Де лукс инженеринг“, како и „Бетон“ и „Гранит“ од Скопје - вели Зоран Заев, градоначалник на Струмица.

Планот за охридската касарна го прават во ЗУА (Завод за урбанизам и архитектура) во Скопје. Се очекува проектот да биде завршен за еден до два месеци. На површина од 23 хектари ќе се гради универзитетски град со студентски дом со базени.

- Ќе има и средношколски центар, реонска амбуланта, односно надградба на веќе постојната, а ќе се гради и црква. Во план е и изградба на трговски центар, за што веќе интерес покажаа домашни и странски инвеститори како грчки „Веро“, „Тинекс“, хрватски „Агрокор“, словенечки „Туш“ и српската фирма „Делта“ - објаснува Бранко Арнаудов, раководител на секторот за урбанизам во Охрид.


Американски инвестиции во Дебар


Општината Дебар има само 12 хектари од некогашната касарна, но големи планови. Градоначалникот на Дебар деновиве заминал за САД за да преговара со американски инвеститор кој би сакал да отвори фабрика за преработка на земјоделски производи.

- Ние завршивме со сите работи, чекаме само уште мислење од МО. Дебарската касарна ќе биде пренаменета во индустриска зона. Во касарната ќе се гради и универзитетски центар, каде што ќе има дисперзирани студии од тетовскиот и од битолскиот универзитет. Во кругот на касарната ќе има и угостителски објекти. Се очекува тендерите да бидат распишани во јуни - вели Низамедин Папранику, претседател на советот на општината Дебар.