Вандализам и примитивизам

РЕЦИКЛИРАЊЕТО СО РЕКОРДЕН ПОРАСТ ГОДИНАВА

Крадците на железо прават штети од милиони евра

Се крадат железнички пруги, делови од трафостаници, мостови, а штетите се неколкупати поголеми од ќарот на крадците

Повеќе милиони евра е штетата што ја предизвикуваат крадците на железо во земјава. Најголеми штети трпат „Македонски железници“, ЕВН-Македонија, „Телеком“, „Македонија пат“, „Водовод и канализација“ и други претпријатија чија инфраструктура секојдневно е цел на собирачите на железо. Дека тие масовно и често нелегално собираат железни предмети сведочи податокот од Заводот за статистика дека во јули годинава секторот рециклирање бележи пораст од рекордни 10.042 отсто во однос на лани. Овој пораст најмногу се должи на тоа што Владата ја повлече забраната за откуп на старо железо.Цел на крадците се делови од железничките пруги, бакарни жици од сигнализацијата за возовите, метални делови од трафостаници, шрафови од далекуводи, сообраќајни знаци, метални огради од мостови, капаци од шахти, жици од предаватели, делови од хидранти. Се крадат и бисти, надгробни споменици, црковни ѕвона, делови од метални огради, акумулатори, врати од лифтови. Најчесто материјалната штета што ја прават крадците е неколкупати поголема од ќарот од продаденото железо. А неретко го загрозуваат и животот на граѓаните.

Според процените на „Македонски железници“, поради кражбите на метални делови досега имале штета од повеќе од еден милион евра. Најчесто навечер исчезнувале делови од пруги и бакарни кабли од железничката сигнализација. Поради тоа многупати настануваат дефекти на рампите, со што се загрозува животот на луѓето што ја преминуваат пругата.Ако навреме не забележиме украден дел од пруга, може да излета воз полн со патници. Последиците ќе бидат страшни. Крадците не размислуваат за тоа. Важно им е да соберат што е можно повеќе железо. Ние се трудиме да ги санираме дефектите во најкраток можен рок, но понекогаш се многу големи - велат во „Македонски железници“. Само во последниот месец крадците ја оштетиле „ЕВН-Македонија“ за околу 5.000 евра. Пред нецел месец, во Радовиш биле украдени метални делови од трафостаница, поради што стотина потрошувачи една недела останале без струја. Дефектот бил толку голем што екипите на ЕВН, кои интензивно работеле на теренот, не можеле да завршат за седум дена. Слични кражби имало и во Прилеп и во Гостивар.

- Пред извесно време некој ги украл металните шрафови од столб на „Окта“, поради што столбот падна врз наш далновод под висок напон. Направена е штета од неколку илјади евра. Вакви кражби има често. Нестручни лица ги чепкаат трафостаниците и далноводите, со што и сопствените животи ги доведуваат во опасност. Може да настрадаат и наши работници, а неретко трпат и потрошувачите. Најчесто се краде навечер и тоа метални делови. Пријавуваме во полиција, но крадците тешко се наоѓаат - вели Златко Попоски, портпарол на ЕВН.Крадците оперираат и на патиштата низ земјава. Речиси нема патоказ на кој не му недостига дел, од сообраќајните знаци се останати само металните шипки, од семафорите се извадени шрафовите. Се крадат дури и делови од оградите на мостовите. И од „Македонски телеком“ потврдуваат дека се соочуваат со ваков проблем. Од нивната мрежа исчезнуваат бакарни жици и капаци од шахти, кои завршуваат во откупните центри. Цената на килограм железо во откупните складови е од осум до 15 денари, во зависност од дебелината. Во повеќето складови каде што се јавивме ни напоменаа дека не примаат железо за кое е очигледно дека е украдено. Сепак, малкумина ги пријавуваат луѓето што ќе им донесат сомнителни парчиња. Сопствениците на откупните складишта што имаат лиценци велат дека проблемите ги создаваат дивите откупувачи, на кои не им е важно дали граѓаните им носат дел од пруга или ограда од мост. Тие бараат инспекторите да вршат построги и поредовни контроли за да ги казнат тие што го прекршуваат законот.МВР не ги евидентира кражбите на железо особено зашто нема податоци колку овој проблем е присутен во државава и како надлежните институции се справуваат со него.

Даница Тунтевска

dnevnik

Фасадите нападнати од плакати и графити

Откривањето на прекршителите е проблематично, бидејќи треба да се фатат на самото место при лепењето или пишувањето, велат од МВР

За поставување плакати и графити на недозволени места следуваат парични казни

Графити по ѕидовите на Кејот на реката Вардар, недолични цртежи и срамни пораки испишани по зградите и на други јавни објекти, па и на споменици, го нагрдуваат градот. Огласи со чудна содржина, залепени по бандерите, па и заборавени, плакати оставени и искинати го дополнуваат шарениот амбиент на метрополата. Тоа е добредојде за секој странец, турист, па и за скопјаните. Кампањски акции за нивно отстранување постојат, но не се доволни. Закани можат да се чујат само постизборно, кога градот буквално е излепен со ликовите на кандидатите, за парламентарни или за локални избори. Од Министерството за внатрешни работи велат дека е многу проблематично да се откријат виновниците за лепењето плакати на недозволено место. И Градот се брани со истото образложение.

- Стручните служби вршат редовни контроли на јавните површини. Но проблемот е во тоа што прекршителите мора да бидат фатени на самото место како ги лепат плакатите за да бидат казнети - децидни се од градската власт. Тие велат дека за поставување плакати на недозволени места и на јавни површини, како и досега, ќе постапуваат според Законот за изборите и Законот за јавната хигиена.Портпарол на МВР, Борче Пешевски, вели дека казните за тие што ќе бидат фатени како лепат плакати на недозволени места изнесуваат 50 евра за физички лица, а за правни лица се движат од 3.000 до 4.000 евра. За цртање графити, глобата е 150 евра.

За непочитување на Законот за лепењето плакати, од Градот потврдуваат дека досега не е казнета ниту една политичка партија. Надлежните објаснуваат дека учесниците во изборниот процес и другите граѓани што лепат плакати за разни случувања навреме ги потсетуваат на нивните обврски при поставувањето на пропагандниот материјал. Плакатите треба да бидат отстранети по завршувањето на определениот рок.

- Од 2005 година, во согласност со Законот за изборите, Градот Скопје за сите избори поставува паноа за лепење на предизборниот рекламен материјал. Паноата се поставуваат на повеќе локации на магистралните улици во Скопје. Локациите на кои ќе се постават паноата и нивните димензии се пропишани со Одлука на Советот на Град Скопје. Во пресрет на претстојните локални и претседателски избори, Градот Скопје навреме ќе распише конкурс на кој ќе може да се пријавуваат партиите за добивање бесплатен рекламен простор на паноата што ќе бидат поставени. Од пристигнатите пријави, со ждрепка се утврдува распоредот за користење на паноата - велат од Градот. Пред почетокот на политичката кампања спроти претседателските и локалните избори, во март в година, градските служби апелираат до сите учесници на изборите да го почитуваат законот и одржувањето на урбаниот ред. Што се однесува до чистењето и одржувањето на спомениците во градот, во согласност со Законот за спомениците од 2005 година, од Градот велат дека Министерството за култура треба да подготви листа на споменици за кои точно ќе се утврди кој е надлежен да ги одржува, односно да ги чисти. Тоа е потребно за Градот и општините да можат во рамките на своите буџети да предвидат и да издвојат средства што ќе послужат за таа намена.

ЗЕЛС ќе чисти графити

Голема акција за чистење на графитите во сите општини ќе почне на 21 ноември организирана од Заедницата на единиците на локалната самоуправа (ЗЕЛС).

- Општините ќе одредат места каде што ќе биде дозволено да се цртаат графити. Ќе направиме бетонски или билборди од друг материјал, кои ќе бидат високи два и широки три метри. Тие ќе се користат и за рекламирање на кандидатите за локалните и за претседателските избори - објасни Коце Трајановски, претседател на ЗЕЛС.Во отстранувањето на графитите ќе се вклучат и училиштата, вработените од детските градинки, куќните совети, невладините организации, јавни личности, амбасадори, дипломати, а ќе бидат повикани и претставници од Владата.

Анела Петрова

На Градскиот плоштад Македонија веќе неколку дена минувачите имаат нова пречка, покрај градилиштето на кејот 13 Ноември. Со денови никој од надлежните не реагира на овој скршен канделабр. Скопјани се незадоволни што јадрото на градот станува се' по небезбедно и неугледно место за прошетки.

http://dnevnik.com.mk/?ItemID=AC1D6F15E59B6749AC9581B9BE489F8C

Општините ќе бришат графити

Акцијата за бришење на графитите во организација на ЗЕЛС ќе почне денеска, а ќе се приклучат сите скопски општини. Целта е со акцијата да се подигне јавната свест кај граѓаните за чиста околина. Општините ќе имаат обврска да постават бетонски паноа на кој љубителите за цртање графити ќе може да ги искажат своите уметнички афинитети. Подоцна истите ќе бидат наменети за лепење плакати во кампањата на следните локални избори.

Како што соопштуваат од Општина Кисела Вода, графитите ќе почнат да ги бришат денеска, во 11 часот, во основно училиште „Рајко Жинзифов“, во населбата Пинтија. Ќе продолжи во градинката „8 Март“, во Расадник, а графити ќе се бришат и во ОУ „Круме Кепески“ и на други места во општината.