На само осум месеци пред почетокот на најголемата светска саемска манифестација „Експо 2010“ што ќе се одржи во Шангај, македонските власти немаат никаков концепт, ниту, пак, знаат со што ќе се претстави нашата државата на оваа грандиозна манифестација. Традиционално, стотици земји од целиот свет на овој саем ги изложуваат своите достигнувања. Повеќето од нив веќе го имаат детализирано својот концепт и наголемо се подготвуваат за учеството. Кај нас, единствено што се знае е дека Македонија се пријавила за учество и избрала идејно решение за павилјонот во кој треба да се претставиме, но неговата изработка се уште не ни е почната. Избрана е само прва награда за идејното решение, а главниот проект уште не е направен. Манифестацијата почнува во мај, в година во Кина. На интернет-страницата на „Експо 2010“ стои општа информација дека нашата земја, регистрирана под референцата ФИРОМ, е учесник на изложбата меѓу вкупно 192 држави. Од страницата на Министерството за економија се дознава само дека се наградени десетина автори, но не е наведено кој за која награда е избран. Во мај годинава е завршен конкурсот за избор на идејно решение за павилјон, за презентација на Македонија на светската изложба. Изминатава недела никој во Министерството за економија немаше информации до каде е подготовката за нашето учество на саемот. - Побарајте ги заменик-министерот Методија Хаџи Васков, кој е генерален секретар на одборот за учество на Македонија, државниот секретар во Министерството Катерина Костеска или Виктор Мизо, директорот на Агенцијата за странски инвестиции. Јас не учествувам на нивните состаноци и немам информации до каде се работите и“ни рече Исмаил Ебипи, портпаролот на Министерството. За неделава средба со новинарите вети заменик-министерот Хаџи Васков. Според учесниците на конкурсот, од нив се барало да изработат лого, слоган и павилјон со дадени локациски услови. Била дадена површината на просторот на кој Македонија треба да се претстави, а нејзината презентација требало да вклучи повеќе медиуми, меѓу кои видео, музика и изложба. - Македонскиот павилјон ја претставува идејата за постигнување хармонија меѓу индивидуата, урбаниот развој и природата при што фокусот е даден токму на граѓанинот. Во контекст на источната мисла, градот, поединецот и природата се поставени во хармонична целина и“за своето решение вели првонаградената Андријана Савиќ, која, исто така, не знаеше до каде е подготовката за нашето учество на саемот. За разлика од Македонија, некои од земјите учесници веќе имаат објавено слики од своите павилјони на интернет страницата на „Експо 2010“. Во медиумите се известуваше дека во Шангај каде што се одржува настанот, на земјава бесплатно и е отстапен простор од 350 квадратни метри за павилјон. На светската изложба која во 2000 година се одржуваше во Германија, се претставивме под мотото „Македонија, колепка на културата и“земја на природата“, но многумина настапот го оценија како сиромашен. Годинешнава тема на „Експо“ е „Поубав град за подобар живот“.