Спортски објекти (општо)

Општина Илинден ги отпочна градежните активности за уредување на просторот за четири нови тениски терени, кои се дел од проектот на Владата и Агенцијата за млади и спорт, со кој е предвидена изградба на вкупно 100 такви терени низ државата. Новите игралишта во Илинден ќе се градат веднаш до спортската сала „Гоце Делчев“. За нив е обезбедена и издадена потребната техничка документација. Согласно предвидените активности, Општината ќе изврши целосно подготвување и уредување на просторот за отпочнување и непречено извршување на градежните работни активности.

Проектот за 100 тениски игралишта ширум државата стартуваше со реализација на терен на 31-ви минатиот месец, со поставување на камен темелник за четири игралишта во Општина Аеродром.

Денес во Министерството за транспорт и врски се одржа јавно наддавање за две парцели во општината Аеродром наменети за спортски и рекреативни содржини. На поголемата од нив која има површина од 25.260 метри квадратни веќе подолго време се најавува изградба на аква парк, додека на помалата која има површина од 6.885 метри квадратни со ДУП-от е предвидена повеќенаменска спортска сала. Парцелите ги доби „Манд интернационал“ од Скопје, која за нив ќе треба да исплати 50.520.000 и 13.770.000 денари. Компанијата треба да ги уплати средствата во рок од 15 дена, да обезбеди одобрение за градба најдоцна 9 месеци од солемнизирање на договорот и да ги изгради објектите во рок од 2 години после правосилноста на одобрението.

Според ДУП-от инвеститорот ќе треба да обезбеди 210 паркинг места во рамки на парцелите, а максималната дозволена висина за градба е 12 метри. Објектите ќе бидат дел од идниот спортско – рекреативен центар на кејот на Вардар во Аеродром. Поголем дел од него е зацртан на просторот на бившата голема градежна база на АДГ Маврово која е речиси расчистена. На 31 јануари таму беше поставен камен темелник за четири тениски игралишта, а на почетокот на месецов Министерството за транспорт и врски на лицитација понуди и две парцели за хотели, кои исто така треба да бидат дел од комплексот.

Вчера во Битола со свеченост почна изградбата на спортски сали во средното медицинско училиште „Јован Калаузи“ и во средното земјоделско училиште „Кузман Шапкарев“. Салата во медицинското училиште ќе има површина од 1.300 метри квадратни и рокот за нејзино завршување е девет месеци, додека салата во земјоделското училиште треба да биде изградена за шест месеци и ќе располага со 650 метри квадратни. Покрај ова, на локалната самоуправа и беше предадено на раководење фудбалското игралиште „Павел Шатев“ кое се наоѓа во градскиот парк, а го изгради Агенцијата за млади и спорт. Од Агенцијата најавија изградба и на четири тениски терени и четири отворени мултифункционални игралишта во основните училишта „Тодор Ангелески“, „Ѓорги Сугарев“ и „Даме Груев“, како и во битолското село Кравари.