Не дрпајте ги седиштата, ќе ве снимаат

Новина во автобусите, меѓу другите поволности, ќе бидат камерите со кои ќе се снима однесувањето на патниците, а граѓаните нема да смеат ниту да ги отвораат и затвораат вратите со сила и да носат со себе оружје, животни и храна

Јавното сообраќајно претпријатие деновиве на големо ги учи граѓаните на правилно однесување во новите украински автобуси. Односот кон новите автобуски седишта кои, за разлика од досегашниве, ќе бидат сошиени во материјал, е приоритет број еден за раководството на ЈСП "Скопје". За таа цел, тие го допрецизираа кодексот на однесување, како за патниците така и за возачите.
Прва работа, според новите правила, е да не ги кинат седиштата за да можат да се зачуваат здрави подолг период. Како важни нешта на кои граѓаните треба да вмимаваат при влез и излез во украинските возила е да не ги отвораат и затвораат вратите со сила, да не носат оружје и животни со нив, да не јадат, пијат и пушат, а не смеат да зборуваат ниту на мобилен. Задолжително да му се насмевнат на шоферот, кој ќе биде облечен во униформа, а никако да не му прават муабет за да не се случи да изгуби концентрација.
Возачите, пак, освен да се смеат и да гледаат напред, не смеат да прават ништо друго, а најмалку да се расправаат со несовесните патници.
Новина во автобусите, меѓу другите поволности, ќе бидат камерите со кои ќе се снима однесувањето на патниците.
"Мора да ги предупредиме граѓаните, пред да пристигнат автобусите, да се однесуваат дисциплинирано во нив. Она од што најмногу се плашиме е веднаш да не ги искинат седиштата. Но камерите ќе бидат вклучени постојано, па така ќе може и да ги ловиме сите што ќе направат каква било штета", вели Билјана Јанкуловска, портпарол на ЈСП "Скопје".
Како превентива пред да почнат новите автобуси да возат во градот, ЈСП ги ангажира и општините да ги средат проблематичните улици. Скоро сите општини имаат наредба да ги пополнат отворените дупки и да ги поткастрат гранките каде што ќе поминуваат автобусите. (М.Ѓ.)

Автобусите и официјално на Градот

Град Скопје од вчера и официјално ги презеде украинските автобуси. Со одлука на Влада, Министерството за транспорт и врски му ги предаде 15-те автобуси на Градот, кој потоа треба да му ги додели на ЈСП "Скопје".
"Владината одлука помина, останува да излезе во 'Службен весник', по што Советот на Град Скопје ќе донесе одлука да ги преземеме ние.
Веднаш потоа ќе ги регистрираме и ќе ги пуштиме да возат по улиците", велат од Јавното претпријатие.

Еве затоа што имаме најава дека автобусите ќе бидат пуштени наредната недела... Кој сака да се кладиме дека нема да бидат пуштени дисплеите...? 

Или ако бидат пуштени ќе стои бројката и ќе се избаци некоја Руско-кирилична буква.