Возен парк (ЈСП - ЛАЗ)

Во Софиjа во минатото автобусите беха црвени, сега наjмного са оранжеви /портокалови/. Има и зелени и бели, но тоа са предимно приватните компании /като Jунион Ивкони и Карат-С/.

ОБНОВАТА НА ВОЗНИОТ ПАРК НА ЈСП ЌЕ ЗАДОЦНИ НЕКОЈ МЕСЕЦ

Украинските автобуси наместо во јуни ќе стигнат во септември

Македонските власти биле информирани дека испораката на четирите зглобни и 11-те единечни автобуси е пролонгирано и ќе биде извршено само три месеци пред истекување на последниот рок за првата транша, а не, како што ветија, шест месеци порано од договорот

Најавите дека најдоцна до први јуни треба да стигнат првите автобуси за градскиот превоз во Скопје од украинската компанија Лавовски автобусни завод", биле преамбициозни. Украинската компанија ги информирала македонските власти дека испораката на четирите зглобни и 11-те единечни автобуси е пролонгирано до септември, три месеци пред истекување на последниот рок за првата транша.
- Нашата експертска група од составена од стручни лица на ЈСП Скопје и од Машинскиот факултет неодамна се врати од фабриката во Лавов, каде што веќе почнало производството на автобусите. Целта на нивното патување беше да го исконтролираат производството на автобусите, дали тие се произведуваат во согласност со европските стандарди и дали ги исполнуваат условите за хомологација на македонскиот пазар, што е согласно со договорот. Менаџментот на фабриката ги информирал нашите претставници дека планираниот почеток на производството на возилата морале да го одложат поради тоа што имале проблем со нивните добавувачи на суровини, па затоа, наместо во јуни испораката ќе ја извршат најдоцна во септември. Се надевам дека тие проблеми се надминати и дека 15-те нови автобуси ќе ги добиеме до септември, информираше директорот на ЈСП Мишо Николов.

Според договорот што на почетокот на годинава во Киев го потпишаа министерот за транспорт и врски, Миле Јанакиески, и менаџментот на Лавовски автобусни завод" за набавка на едноподните автобуси, првите 15 возила ќе треба да бидат испорачани до декември, годинава, а останатите 69 најдоцна до февруари следната година. Доколку производителот не се придржува кон обврските, Министерството за транспорт има право да го раскине договорот и да распише нов тендер.
Оваа компанија беше избрана на јавен повик, бидејќи имаше најдобра понуда од 617.267.510 денари за единечните и 41.968.191 денари за зглобните автобуси.

Украинските автобуси доцнеле поради неплатен аванс

Во септември ќе дојдат 11 нови автобуси од Украина

Украинците се обврзани да испорачаат 15 автобуси најдоцна до декември, а останатите 69 до крајот на идната година

Деспина Трајковска

Првата тура 11 украински автобуси ќе биде испорачана најдоцна до септември, најавиле од компанијата „Лаз“. Неодамна делегацијата од Македонија по втор пат беше во Украина за на самото место да се увери во процесот на производство на владината набавка од вкупно 84 автобуси, вредна 11 милиони евра.

Мишо Николов, директор на ЈСП „Скопје“, е оптимист дека овој пат навистина ќе се остварат најавите за предвремена испорака на првите автобуси, кои Украинците веднаш по потпишувањето на договорот ,преоптимистички ги најавија за почетокот на јуни. Сепак, договорот не е прекршен, оти „Лаз“ е обврзан првите 15 автобуси да ги изработи и да ги испорача најдоцна до декември, додека останатите 69 до крајот на идната година. Четири од автобусите ќе бидат дупли, а останатите се единечни возила.

„Автобусите се готови речиси 80 проценти и според увидот на претставниците од ЈСП, од Машинскиот факултет и од Министерството за транспорт, возилата се работат согласно со договорот како во однос на квалитетот, така и според најавената динамика. Во оваа тура очекуваме да стасаат 11 единечни автобуси. Сите ќе бидат црвени со драп покрив, слични на постојните во нашиот возен парк“, вели Николов, кој планира за десетина дена повторно да замине во Украина во последна проверка.

Во меѓувреме, вели Николов, се очекува да се официјализира и договорот за сервисирање на автобусите. Имено, ЈСП и „Лаз“ договориле сервисирањето да го врши јавното претпријатие.

Надлежните од ЈСП наскоро ќе треба да одлучат и на кои линии ќе бидат пуштени новите автобуси. Најверојатно, привилегирани ќе бидат жителите на Аеродром, Карпош, Кисела Вода...

„Иако се' уште не се утврдени трасите на кои ќе возат новите 11 автобуси, планираме тие да сообраќаат на оние линии што се рентабилни, каде што нема инциденти, а патниците уредно плаќаат за возењето, како што се ‘3‘,‘5‘, ‘15‘...“ вели Николов.

Реализирањето на испораката на овие 11 „обични“ автобуси во септември, практично, ќе значи предвремено исполнување на обврската на „Лаз“ за првата пратка што треба да се реализира до крајот на декември. Останатите од пазарените, вкупно 84 автобуси, треба да стасаат до крајот на идната година. Со каква динамика ќе се работат и ќе испорачуваат тие, од компанијата се' уште не најавиле.

Инаку нереализирањето на ветениот прв рок од 1 јуни, „Лаз“ го правдаше со интерни проблеми со доставувачите. Истовремено, оттаму информираа дека погонот од оправдани причини доцнел со работа еден месец. Сепак, неофицијално се зборуваше дека Украинците го пролонгирале производството, бидејќи Министерството за транспорт и врски не го исплатило потребниот аванс што беше окарактеризирано како шпекулација од страна на Министерството.

Роза Петкова

Новите едноподни автобуси скопјани, најверојатно, нема да ги испробаат ниту наредниот месец, туку дури во октомври. Според објаснувањата на раководството на јавното сообраќајно претпријатие „Скопје“, рокот се поместува од месец за месец затоа што мора да се земат предвид сите технички проверки што треба да се направат на возилата пред да бидат ставени во употреба. Директорот на ЈСП вели дека првите 11 автобуси од украинската фирма ЛАЗ ги очекува до крајот на септември, а останатите 73 до крајот на март идната година. Во меѓувреме, паралелно тече и производството на кинеските двокатни автобуси. - Со кинеската компанија ги дефинираме техничките карактеристики на автобусите. До крајот на декември или почетокот на наредната година треба да донесат два автобуса прототипови, од кои едниот ќе го донесат во Скопје, да го видиме и да го повозиме, а вториот во Германија каде што ќе му биде извршена хомологација на најдобриот Институт за оваа дејност - вели Мишо Николов, директорот на ЈСП. Кинеска компанија „Јутонг“ треба да испорача 200 даблдекери во периодот од 2011 до 2013 година. Првата испорака на 66 двокатни автобуси, според склучениот договор, треба да се изврши до крајот на наредната година. За нив Владата ќе издвои 35 милиони евра, а за едноподните автобуси кои ги произведува украинската компанија околу 11 милиони евра. За разлика од ЈСП, приватниот превозник „Слобода превоз“ веќе успеал да смени половина од својот возен парк со половни автобуси. - Околу педесетина нови автобуси се пристигнати. Нив ги увезе една странска фирма и тие сега се во фаза на репарација, па за околу два месеца очекуваме да се пуштат во употреба. Досега во сообраќај пуштивме 20 нови автобуси и со останатите, кои се во подготовка, може да се каже дека половина од нашиот возен парк е обновен со модерни возила, кои имаат мотори со ЕУРО 2 стандарди, со рампи за инвалиди и други карактеристики - вели Ленин Јовановски, директор на „Слобода превоз“. Освен набавка на нови автобуси, заедничка за јавните и за приватните автобуски превозници е и идејата за нивна единствена организација во еден систем, во кој би важела иста цена, ист билет и исти правила на работа. Спроведувањето и на оваа идеја очигледно ќе се одложи за извесен период затоа што тендерот со кој Град Скопје бараше консултант за модел на организација и управување на системот на превоз на патници деновиве пропадна. Неофицијално, понудата од три милиони денари за консултантски услуги била прескапа за Градот, па поради тоа тендерот е поништен.