Скопска обиколница [A2/A4]

Обиколницата ќе биде погодок во центар

Товарниот сообраќај ќе замине од центарот на градот, ќе се намалат бучавата и загадувањето, ќе се зголеми безбедноста на сообраќајот, ќе се овозможи побрза комуникација помеѓу населението, а се очекува и забрзан економски развој со новите индустриски зони

Втората фаза од обиколницата, Оризари - Сарај, е долга 12 километри, а нејзината изградба заврши во јули минатата година: клучката кај Сарај

Скопската обиколница треба да донесе нов квалитет во живеењето на градот. Најголеми ќе бидат еколошките и економските ефекти, но секако дека ќе има други придобивки по завршувањето на изградбата, планирано за првата половина од годинава. Обиколницата како дел од Коридорот 8 ќе не' поврзува со Бугарија и со Албанија. Скопје ќе го добие својот „ринг роад“ како секоја метропола, што е важно за имиџот и на градот и на земјава.

Обиколницата ќе го одвлече товарниот сообраќај од центарот на градот кој оди кон Косово и дел од товарниот сообраќај кон Тетово. Со комплетното пуштање во употреба на обиколницата се очекува сообраќајот во градот да се намали за околу 30 проценти, со што ќе се намалат бучавата и загадувањето на воздухот. Ќе се овозможи полесна и побрза комуникација помеѓу населението, а со тоа ќе се зголеми и безбедноста на сообраќајот. Општините низ кои минува обиколницата очекуваат да се зголеми економскиот развој, бидејќи со детаљните урбанистички планови е предвидено деловите покрај обиколницата да станат индустриски зони.

ИМОТНО-ПРАВНИТЕ СПОРОВИ ЈА ОДЛОЖИЈА ПРОМОЦИЈАТА

Изградбата на обиколницата како проект на Владата почна во август 2002 година, а требаше да заврши кон крајот на 2005 година, но поради нерешените имотно- правни односи се одолжи. Како што објаснуваат од Агенцијата за државни патишта, средствата за експропријација на земјиштето се обезбедени од Буџетот и случаите етапно се решаваат.

- Најголем проблем кој ја оддолжи изградбата на првата фаза од обиколницата е поместувањето на трасата кон север, како и решавањето на имотно-правните работи. Голем дел од земјиштето низ кое треба да поминува трасата од првата фаза на обиколницата не беше целосно експроприрано. Ги решававме овие проблеми во 2004, 2005 и во 2006 година. Има мал број нерешени предмети за кои водиме преговори со сопствениците на земјиштето и во најкус рок очекуваме нивна завршница, објаснуваат од Агенцијата за државни патишта.Интензивно се работи на довршување на обиколницата.

- Се довршува кракот 3 од Миладиновци кон обиколницата, кај клучката Хиподром. Завршува и изградбата на клучката кај Стајковци, а се изведуваат земјени работи и се поставува тампонскиот слој на главна траса по подвозникот на т.н. Радишански Пат. Исто така, се поставува тампонски слој кај Кучевишка Бара и на други локации. Се поставуваат и одбојните огради за одводнување, се бележат вертикалната и хоризонталната сигнализација, а се поставуваат и звучни ѕидови за заштита од бучава - изјави Катерина Панова-Илиевска, портпарол во Агенцијата за државни патишта. Таа додаде дека очекуваат овој месец, изведувачот „Гранит“ да ја активира асфалтната базаако дозволат временските услови.

ДЕВЕТ КЛУЧКИ

Населбите со обиколницата ќе се поврзат преку девет клучки: Хиподром, Сингелиќ, Стајковци, Бутел, Оризари, Стенковец, Волково, Стопански двор и Сарај. Преку нив ќе се пренасочи сообраќајот од скопските населби покрај автопатот, на исток кон Велес и кон Куманово и на запад кон Тетово.

Се предвидува дека до 2020 година, над 12.000 возила дневно ќе ја експлоатираат оваа сообраќајница. По овој кружен пат тие ќе можат да се движат со максимално дозволена брзина од 120 километри на час. Ќе биде осветлена по целата должина со канделабри, поставени во средната разделна лента. Бидејќи е автопатско решение, за неа нема да се наплаќа патарина.

Обиколницата е со четири ленти. Широка е 27,5 метри и долга 26,5 километра. Се состои од делниците Хиподром - Оризари и Оризари - Сарај. Вредноста на целиот проект е околу 130 милиони евра. Првата делница е финансирана од Европската инвестициска банка, а втората од Европската банка за обнова и развој (ЕБОР) и од Европската инвестициона банка (ЕИБ), откако пред неколку години Тајванската влада се повлече од учеството во проектот.

Прв официјален документ во кој фигурира обиколницата како решение е Основниот урбанистички план на Град Скопје од 1965 година. Проектот за обиколницата го правеа „Прима инженеринг“ и „Балкан консалтинг“, а ревизијата ја врши Градежниот факултет.

Втората фаза од обиколницата, Оризари - Сарај, е долга 12 километри, а нејзината изградба заврши во јули минатата година. Изведувач беше грчката фирма „Терна“. Првата фаза, од Хиподром до Оризари, е долга 14 километри и треба да заврши до првата половина на годинава. Изведувач е Гранит АД Скопје.

ПОТТИК НА ЕКОНОМСКИОТ РАЗВОЈ

Општините низ кои минува обиколницата, пред се', Гази Баба и Ѓорче Петров, очекуваат таа да им донесе значајна придобивка на економски план .

- Веќе се донесени ДУП-овите за делот од обиколницата, кој минува низ нашата територија. Со нив се предвидува изградба на индустриски капацитети по целата должина на новиот пат. Во принцип, во сите поголеми градови, индустриските капацитети и стопански објекти се сконцентрирани на периферијата, околу обиколниците. И ние се поведовме од тие искуства - објаснува Неделчо Крстевски, портпарол во Општина Гази Баба.

И Општината Ѓорче Петров, на чија територија минуваат осум километри од овој пат, со своите ДУП-ови предвидува изградба на индустриски капацитети покрај сообраќајницата. Со доизградбата на излезот кај Орман, во должина од 400 метри, жителите од населените места Даме Груев, Ново Село, Волково, Стопански Двор и Кисела Јабука ќе можат да се приклучат на обиколницата, а ќе се растовари сообраќајот на булеварот Ѓорче Петров - вели Момо Николовски, портпарол во Општината Ѓорче Петров.

Според првичниот проект, трасата требаше да поминува низ две населени места, Ченто и Стајковци, и да се урнат 60 куќи. Поради тоа, тогашниот Фонд за регионални и магистрални патишта, сега прекрстен во Агенција за државни патишта, кој е и реализатор на проектот, одлучи да ја помести делницата кон север, околу 7 километри од источната половина на обиколницата. Сега почнува во близина на Хиподром и завршува кај езерцето кај Смилковци и клучката кај Стајковци. Северно од Стајковци новата траса на некои делови ќе биде блиску до станбени објекти, а на други две места ќе треба да се уриваат куќи. Експертите велат дека со изградбата на оваа клучна инфраструктурна артерија нема да се промени нивото на миграцијата.

- Во последните децении, не е вообичаено да се населуваат луѓето покрај вакви обиколници од проста причина што градот е релативно близу, а дел од оваа обиколница минува низ населени места поврзани со неа со приклучни јазли. Но, не верувам дека ќе дојде до некој пресврт во однос на миграцијата, вели Илија Ацевски, професор по социологија на Филозофскиот факултет при Универзитетот „Свети Кирил и Методиј“. Според него, миграцијата нема да се зголеми поради тоа што во тој дел не се решени имотно-правните односи, па никој не би се осмелил да гради на нерасчистен терен.

ЗАШТИТА НА ЖИВОТНАТА СРЕДИНА

Главната студија за процена на влијанието на обиколницата врз животната средина беше изработена во 2000 година. Во студијата стои дека системот за одводнување ќе го сочинуваат цевки, а водата ќе се собира преку сливници на патот, со испусти кои ќе бидат опремени со сепаратори за масло за да се спречат еколошките штети на постојните подземни и површински водни системи.

Целата зона околу Ченто и Стајковци има ниска вредност на природната флора, но езерцето кај Смилковци има висока еколошка вредност поради карактеристичната вегетација и ретките влажни живеалишта. Од 57 вида птици што живеат на делот од Хиподром до Смилковци, четири вида се заштитени со Европската директива за птици. Особено загрозен е белиот штрк од густината на веќе постоејните надземни далноводи, близу трафостаницата во Бутел. Исто така, според Студијата нема да има загадување од олово поради законски предвиденото исфрлање од употреба на оловните бензини. Предвидена е и изградба на еко-дренажни системи. Во делот кај Стајковци, каде што зградите се многу близу до трасата, негативното влијание од загадувачите на воздухот ќе биде избегнато со поставување ѕидови, кои ќе бидат изолатори и од бучавата.

- Станува збор за проѕирни ѕидови, кои ќе се постават по целата должина на обиколницата таму каде што има поголема фреквенција на возила и каде што таа минува низ населени места. Вакви ѕидови првпат се применуваат во Македонија - вели Радојка Дончева, професор на катедрата за патишта при Градежниот факултет. Како што објаснуваат од Агенцијата за државни патишта, ѕидовите се од лексан и со алуминиумски профили и се во согласност со сите европски стандарди.

- Со проектирањето на обиколницата се проектирани и самите заштитни ѕидови.Целта на нивното поставување е да се доведе бучавата до законски пропишаното ниво, а тоа е 40 децибели - вели Панова-Илиевска од Агенцијата.Анализите од Студијата покажуваат дека количините на емитираните загадувачи во воздухот ќе се намали за најмалку 70 проценти . Квалитетот на воздухот се мери според амбиентот, а тој во делот на трасата се смета за рурален. Емисиите на загадувачите на воздухот, создадени од сообраќајот по обиколницата, ќе се проценуваат со метод, прифатен од Германија. За процена ќе се користи напредна технологија и имплементација на законите на ЕУ за употреба на еко-горива и мотори со технологија за ниски емисии.

ГРАДСКИТЕ ВЛАСТИ НЕКОНСУЛТИРАНИ

Иако станува збор за проект што ги засега скопјани, при изградбата на обиколницата градските власти велат дека воопшто и не биле консултирани, освен за издавањата на привремени сообраќајни решенија кога се правени приклучоци во делот на Бутел, Радишани и на другите места каде што градските сообраќајници треба да се приклучат на обиколницата.

За Јован Христовски, раководител на Секторот за сообраќај во Градот, граѓаните на Скопје првично и нема да имаат корист од обиколницата, иако таа треба да го олесни сообраќајното оптоварување во поширокото централно подрачје, што во случајов, според него, нема да се постигне.

- Дури за 10 години обиколницата би ја исполнила својата цел со проширувањето на градот во тој дел. Исто така, обиколницата не е изведена во согласност со Генералниот урбанистички план за Град Скопје, бидејќи е подигната кон север и е оддалечена од урбаното градско подрачје. Затоа и во наредните неколку години обиколницата не ќе има никаква искористеност од граѓаните - истакнува Христовски.

http://dnevnik.com.mk/?ItemID=BD42F04729DA794590F1395B31440B1A