Скопска обиколница [A2/A4]

ВОЗАЧИТЕ ГО ИЗБЕГНУВААТ АВТОПАТОТ

Обиколницата празна, камионите во центар

И по три години од пуштањето во употреба на скопската обиколница, таа не е дел од мапата на возачите од скопските населби, особено на тешки товарни возила. Предвидувањата дека до 2020 година по неа ќе се движат околу 15.000 возила дневно изгледа како недостижна, ако се извози автопатот како што направи екипата на „Дневник“. За еден час може да се видат како поминуваат едвај десетина возила, но затоа пак среде центар и по булеварите ги има на претек. Тој факт и не е така наивен ако се земе предвид дека уништувањето и оштетувањето на градските коловози од тешки камиони се голем проблем и чинат пари. Тоа ја натера градската власт летово да воведе едномесечна забрана за движење на камиони во Скопје. 

Обиколницата спојува два краја на градот - Хиподром и Сарај. Беше изградена за растоварување на метежот во центарот на Скопје, а и општо на улиците што водат кон населбите. Еден вид алтернатива за возачите да не транзитираат низ центарот, особено оние што одат кон Тетово, Kосово и обратно - Kуманово, Велес, Грција. Заклучокот од слабата фреквенција која може да се види на терен, десетина возила на еден час, од кои само половината товарни, е дека обиколницата е нешто што сите гледаат да го заобиколат. 

Екипа на „Дневник“ го помина целиот автопат со четири ленти. Од Хиподром до Сарај, со возење од 100 километри на час, се стасува за 15-ина минути. Нешто незамисливо ако истата релација ја возите низ метежот што владее по градските улици. Патот е уредно обележан со табли и патокази, а јасно се изведени клучките и надвозниците. Онаму каде што патот се приближува до куќи од населени места поставени се табли за заштита од бучава. 

И додека состојбата на терен е очајна, извештаите, бројките и податоците на Агенцијата за државни патишта говорат нешто друго. Од Агенцијата вршат мерење на густината на сообраќајот, на влезот и излезот од обиколницата. Уверуваат како дневниот просечен сообраќај на автопатот е во постојан пораст.

- Според податоците од годинава, вкупниот сообраќај во однос на 2010 година е дека сообраќајот кај Сарај се зголемил за 46,1 отсто, а кај Хиподром за 29,3 отсто. Тоа зголемување во најголем дел се должи на автомобилскиот сообраќај, додека бројот на тешки камиони и автобуси горе- долу се движи во истите рамки - изјавија задолжените за односи со јавноста од Агенцијата.

Нема осветлување - украден бил бакарот

Возењето по обиколницата навечер на моменти ужаснува - нема осветлување. Освен само на неколку места (кај клучката за Мирковци). Притоа, фреквенцијата на возила е до толку намалена, што може да се случи по должината на целиот автопат, од 26,8 километри, да поминат само две-три возила. Луѓето што патуваат во тој целосен мрак мора да се многу внимателни - ем за да се исклучат од автопатот навреме ем да не им се случи незгода. 

Од Агенцијата за државни патишта изјавија дека проблемот со осветлувањето трае веќе неколку месеци поради украдениот бакар од неколку трафостаници по должината на обиколницата. Нивната поправка е во надлежност на „Македонијапат“, која имала неколку неуспешни тендери.