Скопска обиколница [A2/A4]

БЛОКАДА НА СЕВЕРНАТА ОБИКОЛНИЦА ПОРАДИ НЕИСПОЛНЕТИТЕ ВЕТУВАЊА

Волковци не сакаат автопат без пристап

Од Фондот за патишта велат дека сите клучки ќе бидат изградени навреме и дека ќе бидат поправени оштетените локални патишта

Со камиони, трактори и автомобили и во присуство на полицијата, десетици жители на Волково, Никиштани, Орман и Пржина, вчераутро ја блокираа северната обиколница, на потегот од реката Лепенец до селото Стопански Двор. Тие се револтирани поради тоа што клучката кај Стопански Двор се' уште не е довршена и што не се асфалтирани локалните патишта, кои се многу оштетени од минувањето на градежната механизација при изградбата на автопатот. Жителите стравуваат дека наскоро грчкиот изведувач „Терна“ќе си замине и ќе им ја остави обиколницата неупотреблива, затоа што без клучката тие не ќе можат да ја користат. Тие инсистираат Фондот за регионални и магистрални патишта што побрзо да го исполни ветувањето за изградената клучка и асфалтираните патишта.

ПРОТЕСТ ЗА АСФАЛТ


- Денеска се собравме на предупредувачки протест до Фондот за патишта и изведувачот „Терна“ поради тоа што договорените работи не се завршени. Оштетените локални патишта не се асфалтирани и преполни се со дупки. Атмосферските води се слеваат низ канал што не е спроведен до реката Лепенец, па течат по нашите домови и ни предизвикуваат големи штети. Беше ветено дека клучката кај Стопански Двор ќе биде завршена, меѓутоа и тоа се' уште не е сторено. Уште два месеца изведувачот „Терна“ треба да си оди, а ние нема да имаме никаков благодат од обиколницата, туку само штета - вели Драгољуб Ристовски, претседател на месната заедница „Волково“.Тој побара на жителите да им се овозможи пристап до обиколницата и со асфалтирање на патот кон селото Никиштани.И ние од Никиштани го поддржуваме овој протест што го организираа четирите месни заедници. Трасата што го поврзува Волково со Никиштани требаше да биде асфалтирана за и нам да ни биде пристапен автопатот. Исто така „Терна“ не го исполни договореното да го дислоцира мостот од Волково во Орман, за да можат Орман и Никиштани да се поврзат со автопатот преку Лепенец - вели Беадин Османи, претседател на МЗ „Никиштани“.Според жителите, Фондот за патишта вината ја префрла на изведувачот, а изведувачот, за да ги исполни обврските, бара писмено барање од Фондот.Сега сите бегаат од обврските. Затоа, ова е само предупредувачки протест, а во наредните денови ќе направиме помасовна блокада - велат жителите.Од Општината Ѓорче Петров велат дека во целост ги поддржуваат жителите во нивните барања, бидејќи Фондот дал ветување што сега не сака да го исполни. На протестот вчера беше и градоначалникот Сокол Митровски.

ФОНД ЗА ПАТИШТА И ЗА ВЕТУВАЊА

Од Фондот за регионални и магистрални патишта смируваат дека жителите напразно стравуваат дека обиколницата за нив ќе биде неупотреблива и дека ќе останат со разорани патишта. Изградбата на клучката кај Стопански Двор е во завршна фаза, односно поставен е првиот асфалтен слој. И локалните патишта ќе бидат направени. Жителите нема потреба да стравуваат, а од Фондот имаат и писмена потврда дека обврските ќе бидат исполнети - вели Катерина Танова, портпарол во Фондот за регионални и магистрални патишта, не прецизирајќи до кога е крајниот рок за исполнување на обврските.Таа уверува дека до јули северната обиколница ќе биде комплетно завршена и дека дотогаш ќе бидат изградени сите девет пристапни клучки. Не можеме да кажеме дека обиколницата е комплетно готова и да ја пуштиме во употреба доколку не се направени сите девет клучки, односно пристапните патишта - вели Танова.Обиколницата е долга 26,7 километри, а се простира од Хиподром, преку Инџиково, Стајковци, Оризари, Орман, Волково и Сарај до Кондово.

Анела Петрова
Фото: Слободан Ѓуриќ