Скопје 2014

Лавови ќе се надвиснат и на колонадата

Од Центар не кажуваат какви скулптури ќе има на објектот

Скулптури ќе ја красат и колонадата што треба да се гради на левиот брег на Вардар. На секој столб ќе се надвисне по една скулптура. Со колкави димензии, од каков материјал и што ќе претставуваат тие, надлежните на откриваат. Тајна е и колку пари ќе издвои Општината Центар за леење на се' уште мистериозните скулптури. На анимацијата, пак, на „Скопје 2014“ може да се забележи дека на крајните столбови на колонадата се наоѓаат бронзени лавови.

Општинарите од Центар единствено информираат дека е во тек јавна набавка за идејно решение за 11 скулптури согласно со утврдените барања во конкурсот. Скулптурите е предвидено да се постават на колонадата, која, очигледно, ќе почне да се гради во почетокот на новата градежна сезона. За неа од неодамна се бара фирма-изведувач, која објектот ќе го гради по проект на проектантската куќа „Мегаор“.

Колонадата е планирано да биде висока 8 метри и за неа е резервирана локацијата меѓу новите објекти на Агенцијата за електронски комуникации и на Финансиската полиција. Веќе извесен период во јавноста се шпекулира дека колонадата ќе биде изградена од десетина столбови изведени во антички стил поврзани во венец, но надлежните не сакаат да го коментираат планираниот изглед на објектот. Пред неа, согласно со ДУП, е предвидена изградба на мини-амфитеатар.

Инаку, и колонадата и скулптурите ќе бидат финансирани од општинскиот буџет. Но, колку средства се издвоени за таа намена, општинарите, вообичаено, не откриваат. (Дс.Т.)