Општинска зграда Центар

Измина рокот за склучување договор за уредување на обврските помеѓу „Пера Констракшн“ и Општина Центар, во врска со изградбата на нов објект за локалната самоуправа на местото на сегашните општински бараки. Ова е епилогот на најновиот обид да се најде инвеститор кој според планот треба да изгради зграда со 15 ката и со површина од 31.000 метри квадратни, од која 51% од површината треба да ја отстапи на Општината.

Градоначалникот Владимир Тодоровиќ денеска ја повлече од дневен ред на седницата на општинскиот Совет, точката за продажба на атрактивното земјиште во Дебар Маало на кое требаше да се реализира проектот. На ваквиот расплет му претходеше протест на група граѓани и серија препукувања помеѓу централната и локалната власт од една, и опозицијата од друга страна. Опозицијата обвини дека се работи за сомнителна и евтина предизборна продажба и дека инвеститорот е обврзан објектот на општината да го изгради само до фаза на карабина, додека градоначалникот Тодоровиќ и Министерството за транспорт и врски, кое ја спроведуваше постапката за отуѓување на земјиштето, реагираа дека ваквите тврдења се шпекулации и груба манипулација на јавноста.

„Пера констракшн“ беше најповолен понудувач на наддавањето организирано на 26 ноември и за земјиштето со површина 7.528 метри квадратни понуди вкупно околу 370 илјади евра или околу 50 евра за метар квадратен. Ова беше трет обид општината да добие нови административни простории со помош на приватен партнер. Првиот обид за реализација на проектот беше спроведен во февруари минатата година, а првичниот план предвидуваше изградба на објект со приземје и четири ката, во барокен стил.

Повторно пропадна обидот за продажба на градежното земјиште на кое треба да се изгради новата административна зграда на општина Центар. Драстичните промени во критериумите за купување на атрактивната парцела во Дебар Маало и за изградбата на општинскиот објект во „барокен“ стил не им се допаднаа на инвеститорите. Денешното електронско јавно наддавање на градежната парцела со површина од 7.528 метри квадратни заврши неуспешно, иако почетната цена за отуѓување на земјиштето изнесуваше 2.800 денари за метар квадратен и беше намалена за повеќе од 50% во споредба со претходно распишаниот оглас на Министерството за транспорт и врски, кога за истата парцела се бараа 6.480 денари за метар квадратен.

На последниот неуспешен оглас, на заинтересирани инвеститори им се понуди да задржат за себе 49% од планираниот објект со приземје и 15 ката, сегмент од зградата со намена за големи трговски единици, големи угостителски единици, деловни дејности, мали комерцијални и деловни дејности и за култура. Најдобриот понудувач за возврат требаше да ја изгради општинската зграда со свои средства. Од надлежното министерство и од општината Центар не дадоа објаснување зошто се одлучија претходната понуда на објект со приземје и 4 ката и со висина од 18 метри да ја заменат со огромно здание со висина од дури 55 метри.

За разлика од оваа, минатата понуда од министерството подразбираше купувачите на земјиштето да задржат до 40% од објектот во кој треба да се смести локалната самоуправа на Центар. Општина Центар уште во 2009 година се одлучи да гради нова општинска зграда како адекватна замена на досегашните руинирани бараки. Засега не е познато кога и под кои услови ќе се распише нова објава за отуѓување на оваа градежна парцела. Локалните власти од Центар и Министерството за транспорт и врски денеска не излегоа со соопштение дали имало заинтересирани инвеститори на наддавањето и кои се причините за вториот по ред неуспешен обид за продажба на земјиштето.