Продолжи уредувањето на коритото на Отиња во Штип

Општина Штип по вчерашните подготвителни активности од денес продолжи со уредување на коритото на река Отиња. Заради врнежите од дожд, нестабилното време а пред се заради текот на вода низ коритото, беше невозможно да се преземаат градежни зафати. Со зголемување на темперетурите, создадени се услови за продолжување на овој важен проект за Општина Штип:

- Остануваме на заложбите да го уредиме целосно коритото на Отиња, бидејќи тоа е еден од најважните проекти на локалната самоуправа. Она што беше наша замисла, да го прибилижиме внатрешниот дел на Отиња до граѓаните го постигнавме. Со уредувањето на реката, пешачките патеки и поставувањето на клупите, добиваме се повеќе пофалби и честитки. Коритот заживеа, има и млади и стари кои одмораат и затоа сме решени да го реализираме комплетно овој проект до крај – изјави Захариев.

Исто така, паралелено со продолжувањето на активностите во Отиња, денес беа промовирани четири паркови површини во строгиот центар, веднаш до градскиот плоштад. Проектот е на ЈП „Исар“ и со него се заокружува средувањето на централното градско подрачје:

- ЈП „Исар“ нема да застане тука, секоја урбана заедница, секое место кое е погодно за тоа, ќе биде преуредено, ќе добие парк, зеленило, хортикултурно уредување. Тоа се мали зафати, со малку пари но покажуваат колку се грижиме за градот и дека можеме да направиме убави нешта за граѓаните. Тие плаќаат вода, а средствата од тоа повторно се враќаат кај граѓаните…индиректно, бидејќи ние сме сербвис кој треба да им служи на граѓаните – изјави Ангел Бојаџиев, в.д. директор на ЈП „Исар“.

Четирите паркови кои беа подѕидани, украсени со бехатон и павер елементи, засадени со разно цвеќе го чинеше ЈП „Исар“ околу 8000 евра. Воедно Бојаџиев напомена дека се работи и на парковите површини во населбата 8.ми ноември како и на новата пешачка патека зад градскиот Исар.