Соб.храм Успение на Пресвета Богородица - Струмица

Кампања за донација на Соборниот храм!

• Friday, 21 September 2012 16:41

Градоначалникот на општина Струмица, Зоран Заев, кој е и претседател на Иницијативниот одбор за изградба на Соборниот храм “Успение на Пресвета Богородица”, денеска од пред оваа велелепна градба ја промовираше кампањата за прибирање на донации за изградба на храмот.

Во изминатиот период од Велигден, кога беа започнати работите на изградбата на соборниот храм “Успение на Пресвета Богородица” во центарот на Струмица, па до денешниот христијански празник Раѓањето на Пресвета Боогородица се поставени темелите и основните ѕидови.

Како што нагласи градоначалникот Заев, во овој период се завршени најзначајните работи во делот на статиката, а што се однесува до финасиската состојба, до денеска на жиро сметката, која на почетокот имаше 34.518 денари, самоиницијативно 21 граѓанин донирале вкупно 423.675 денари и 10 стопански субјекти кои донирале 1.667.000 денари. Во досегашната изградба помош во градежни материјали донирале седум граѓани и шест стопански субјекти, а вкупната вредност на реализираните работи во оваа фаза од изградбата на Соборниот храм “Успение на Пресвета Богородица” се проценуваат на 600 илјади евра.

“На денешниот прекрасен христијански празник, Раѓањето на мајка Богородица, ја промовираме кампањата за прибирање на донации за изградба на овој Соборен  храм. Практичното започнување на кампањата ќе биде од први октомври, кога до сите домаќинства и правни субјекти ќе испратиме уплатници со кои ќе можат директно во рамките на своите можности доброволно да донираат во довршувањето на изградбата на овој Божји дом“ - рече градоначалникот Зоран Заев.

За целосната изградба на Соборниот храм “Успение на Пресвета Богородица”, кој се планира да биде готов до следниот Велигден, се потребни околу два милиони евра. (Р.Ѓ.)