Роза Петкова

Проширувањето на булеварот Свети Климент Охридски, кој според Генералниот урбанистички план на Скопје треба да биде изграден со шест сообраќајни ленти, наместо со сегашните четири и натаму останува табу-тема за градските власти. Оваа сообраќајница, која поради слабата проточност веднаш се полни со возила, стои нечепната со години затоа што властите не знаат каде ќе најдат простор за да ја шират. Проблемот постои и за возачите, кои нервозно тапкаат во место во сообраќајниот метеж, но и за пешаците кои наизменично треба да се префрлаат од пешачките патеки во зеленилото, затоа што на места тротоарите се претесни, па не може ни двајца да се разминат. Поради планот за проширување на улицата, не се поправаат тротоарите кои се испокршени и преполни со дупки, не се средува средишниот појас, кој е своевидно шеталиште со ширина од 12 метри и дрвореди со огромни крошни, а единствено се интервенира, доколку има некоја пукнатина на коловозот. Во последниот период, градските власти направија минимални интервенции, па почнаа да поставуваат заштитни столпчиња за да ги ослободат пешачките патеки од паркирани возила, а деновиве поставија нови дрвени клупи за минувачите во средишниот булеварски простор. Сепак, паѓа во очи тоа што клупите се ставени во уништените патеки, а околу нив наместо трева зјаат празни земјени површини, па така бледнее и првичната намера на Градот да го разубави просторот. Згора на тоа, и дрворедот не се одржува, па некаде може да се видат празни места каде останале само трупци од исечените дрвја. - Поставувањето на клупите за седење во средишното зеленило на булеварот Св. Климент Охридски е дел од поширок проект на Град Скопје за уредување на овој простор. Покрај обновувањето на урбаната опрема, наскоро ќе бидат поставени заштитни столпчиња и ќе се изврши хортикултурно уредување на земјените површини - велат од Одделението за односи со јавност. На прашањето кој е планот за булеварот и дали тој ќе се проширува за сметка на средишниот појас во Градот, не добивме одговор. Во програмата на градоначалникот Коце Трајановски е наведено дека ќе се разгледа можноста за проширување на булеварот, со додавање на уште по една лента во двете насоки, но и во втората година од неговиот мандат нема повеќе информации околу ова предизборно ветување. Идејата за Св. Климент Охридски како сообраќајница со шест ленти датира од Генералниот план за градот изработен веднаш по земјотресот. Оттогаш, речиси 50 години, се одложува решавањето на булеварот. Сообраќајните инженери коментираат дека тој е предвиден со два коловоза, кои ќе имаат по три сообраќајни ленти од секоја страна, а регулациона линија на булеварот била зградата во која се наоѓа Сојузот на возачите. Тоа значи дека сите објекти кои се изградени понапред, односно поблиску до улицата треба да се рушат. Во ГУП се задржува раскошното средишно зеленило со сегашните 12 метри ширина, а плус се предвидени велосипедска патеки од двете страни, зеленило и пешачки патеки. Сето тоа сега е загубено, затоа што просторот е видоизменет и изграден, па како единствена варијанта останува да се узурпира средишниот појас. Во последната верзија на деталниот урбанистички план „Дебар маало 2“ на Општина Центар, Св. Климент Охридски е исцртан со шест ленти, со ширина од 3,5 метри и средиштен зелен појас со ширина од пет метри. На двете страни од булеварот се предвидуваат по една лента зеленило со ширина од еден метар, велосипедски патеки од два метра и тротоари со широчина од четири метри.