Скопски сообраќај (општо)

На првата работна седница, Советот на Општина Аеродром донесе Одлука за формирање Комисија за спроведување на постапките за експропријација на подрачјето на општината, со што ќе се забрза и постапката за реконструкција на патот што ги поврзува Горно и Долно Лисиче. Со формирање на ваква комисија, ќе се очекува да се утврди пазарната вредност на недвижниот имот, поточно на градежното неизградено земјиште.

По формирањето на Комисијата за експропријација на подрачјето на Општина Аеродром, надлежните општински служби ќе остварат директни средби со граѓаните во Горно и Долно Лисиче, се со цел што поскоро, да се преземат сите неопходни активности за спроведување на постапките за експропријација и конечно решение за прашањето околу локалниот патен правец Горно - Долно Лисиче. Средствата кои се предвидени за реконструкција на овој пат се обезбедени од меѓународни финансиски институции, кои се спроведени и администрирани од страна на Фондот за магистрални и регионални патишта, во рамки на проектот на Владата на Република Македонија за реализација на Програмата за рехабилитација и реконструкција на регионалната и локалната патна мрежа.

Во текот на изминатата година во сообраќајки овде животот го загубија три лица. Не знаеме уште колку не дај боже треба да има за овде да се постават семафори, загрижено велат жителите на Карпош 1 и 2

Еден од примарните проекти на привремените и сега новоизбраните власти на општината Карпош, а тоа е отстранување на таканаречената сообраќајна црна точка која се наоѓа помеѓу улиците Орце Николов и Никола Тесла во Карпош 1, изгледа остана примарен проект за некои подобри денови во иднината. Нов последователен случај на тешка сообраќајна незгода во која имаше двајца повредени, се случи изминатиот викенд, повторно на ова веќе кобно место за скопјани во Карпош 1 спроти Технолошкиот факултет. Овој пат во сообраќајка подебелиот крај го извлекоа украински државјани со автомобил марка "матиз", кој најверојатно сакале велигденските празници да ги поминат овде, но за жал беа спречени во тоа токму од ова.

Жителите на оваа скопска населба и покрај битката која ја водат со локалните власти за поставување на светлосни уреди на според нив најцрната раскрсница во градот, досега немоќни со нивните барања до општината.
- Еве уште една за жал немила случка и факт дека овде треба да стојат семафори. Во текот на изминатата година во сообраќајки овде животот го загубија три лица. Не знам уште колку не дај боже треба да има за да се постават семафори. Поставените знаци се покриени со лисја и наместени на несоодветно место. Децата со страв ги испраќаме до училиште, но со поголема неизвесност ги чекаме да се вратат живи и здрави, - вели жител од локалните станбени згради.
Саша Димиќ, поранешниот в.д. градоначалник, велеше дека за решавање на проблемот постоеле технички проблеми каде тој во крајот од мандатот тврдеше дека биле надминати и прашање на време беше кога ќе се постават соларните семафорите за кој веќе има поставено инсталација. Засега не знаеме дали ова и понатаму ќе биде мистерија и за старо-ново избраниот градоначалник на Карпош, Стефче Јакимовски, кој поради велигденските празници не беше достапен за изјава околу овој проблем.

Од СВР Скопје информират дека проблемот е настанат од детерминиран несразмерен урбанистички развој и изградба на несоодветна сообраќајна мрежа пред дворот на Технолошкиот и Машинскиот факултет.
- Доставени се показателите за интензитетот и густината на сообраќајот на раскрсницата и во најбрзо време ќе се постават семафори велат од СВР Скопје, секторот за сообраќај.

Градежните активности со проширувањето на булеварот Видое Смилевски-Бато во Ново Лисиче доцнат веќе еден месец. Таму се уште се изведуваат градежните работи поврзани со тампонирањето на булеварот, а сега по краевите на лентата се поставуваат рабници. Булеварот се проширува на потегот меѓу крстосниците со булеварите Србија и Февруарски поход. Проектот, кој почна да се реализира на 18 февруари, беше предвидено да трае само 45 дена. По завршувањето на градежните активности што се во тек, предвидено е да се асфалтира проширената лента, со што значително ќе се олесни сообраќајот во станбениот дел од општината Аеродром. Сепак, покрај задоцнетото изведување на градежните работи за проширувањето на булеварот, од Град Скопје велат дека работите би требало да завршат наскоро. - Досега се завршени градежните зафати за дислоцирање на подземната мрежа од кабли под трасата и обележувањето за проширувањето на булеварот. Поставена е и нова атмосферска канализација, со сливници за атмосферската вода. Во моментов се работи на тампонирањето и на поставувањето на рабниците долж проширениот дел од коловозот. По завршувањето со тампонирањето, ќе се почне со асфалтирањето на булеварот “ велат од Одделението за односи со јавност на Град Скопје. Реализацијата на проектот е предвидено да се одвива во две последователни фази. Во првата се изведуваат градежните работи за изградба на уште една коловозна лента со должина од 510 метри, со што се очекува да се растовари протекот на возила во овој дел од градот. Во неа е вклучено и поставувањето на нова сообраќајна сигнализација и соодветно осветлување за подобра прегледност во вечерните часови. Во втората фаза, пак, на булеварот ќе бидат изградени нови тротоари и велосипедска патека по целата должина на новата лента, како и жардиниери во средишниот дел, за хортикултурно уредување и наводнување по системот „капка по капка“. Пред да се заврши изведбата на проектот, предвидено е да се постават и две автобуски постојки, на необележаните места кои и досега ги користеа автобусите на јавниот градски превоз. Парите за проширувањето на булеварот се обезбедени од градскиот буџет, од каде што се издвоени и средства за поставување подлога за изградба на трамвајската траса, која ќе минува тука. Градежните работи ги изведува градежната фирма „Инструктор“. Надлежните служби од Општина Аеродром и од Град Скопје велат дека додека траат работите на булеварот, сообраќајот нема да биде прекинат, туку ќе се регулира со посебен режим.